菲常任務 MISSION SPECIAL

仍想身體健康

2009-08-27T18:17:00.002+08:00

上次寫 blog 係 19 號，今日已經係 27 號。由上次寫完之後，第二天就開始病了，病完一樣又到第二樣，直到今天我都仲未有精神過一日。長期處於身體不適既狀態真係好令人氣餒。我好想快 d 回復精神，繼續培育我呢間新成立既心血結晶，我仲好想夠力抱 BB 耐 d，佢成日都好想我抱佢的…

生日願望要加上身體健康…

身體健康

2009-08-19T16:49:00.003+08:00

又一輪冇寫 blog 了…

呢排工作繁重，用超強意志力頂住，終於應在我既一句說話︰意志力同健康係成反比既。

而家我身體既狀況應該係我有生以黎最差既時候，差到我自己開始擔心了。本來由今個星期開始，我應承左自己要好好休息，但係事與願違，我仍在搏命中。

打工仔只理自己有冇糧出，係唔會理佢既工作表現係唔係達到佢既薪酬水平。現時我新張都只係80日，未有能力換血，唯有頂多個零月，等生意真係穩定左先至換血。

其實呢80日既生意額都叫做中規中矩，不過因為開波時資金週轉唔多暢順，而家要跑多少少數先至追平。

就黎又生日了，我都係祝自己身體健康最實際！

又係女人心

2009-06-17T23:42:00.002+08:00

星期一︰同班同事傾完心事，大家都滿載正能量。
星期二︰兩位同事又因小事火拼，其中一位更揚言要辭職。
星期三︰這兩位同事有說有笑彷彿沒有吵過一樣。

女人心，真係海底針…

今天我說︰「你們打生打死我都不會再理你們了，都唔知你地攪乜！」

她們好有默契地都沒有理會我…

我開始懷疑自己是不是女人。

費解

2009-06-16T23:24:00.007+08:00

昨天有一友人多次致電給我，說她的美容院一位主管突然離職，只發了個電話短訊就不辭而別了，一時之間不知如何是好。我們的對話大致如下︰

我︰「請另一個人補上，之後你可以去勞工處告那一位不負責任的員工啦。」
她︰「那主管不是我的正式僱員，大家只是合作拆賬的關係。」
我︰「這樣你別無他法，只有正正式式請一個員工回來補位吧。」
她︰「我實在不知怎辦，現在有很多客，每天都有客人來，只有一個美容師不知可以怎辦。」
我︰「你有客人就不用擔心啦，你肯花錢請人就一定有人來做。我沒有客都未驚啦。」
她︰「我有太多其他生意要兼顧，實在沒有時間打理美容院，但是仍有客人，結束了實在太可惜了。不如你幫幫忙吧！」
我︰「我都是新公司，怎幫？」
她︰「我有很多客，每月都有穩定生意額，但是沒有人管理真是可惜。我知你攪了間美容院，你都想有分店的，可以考慮一下嘛。」
我︰「吓？我開張都未有一個月就開分店？」
她︰「我信你一定得，你明天來看看再說吧。」

人都是貪心的，包括我在內，聽見她說有穩定客源，對於我來說是吸引的。於是貪心的菲菲就好像街頭的大嬸一樣被哄了上她的公司，哈哈哈！

今天去到她的美容院，知道客是有的，但經營方式太落後了。不過這不是問題，只要有客，點石可以成金嘛！於是我就直接地提出︰「如果你不想煩了，可以頂了給我做，你開個價錢吧。」

但是她好像聽不到般，沒有回答我。之後她想了想就說︰「你打算頂了來做嗎？」

不是吧？你不是要找我來執你的爛攤子嗎？現在我決定要了，你卻有所猶豫，究竟葫蘆裡賣甚麼藥？

「我不是缺錢花，只是覺得你是一個人才，想找你合作，但不是想這樣。」
「那你想怎樣？」
「我還未組織到，我想想後再找你傾細節。」

這個約會就胡里胡塗的結束了。到現在我也不知她想怎樣，有人可以整理到一些倪端讓我參詳嗎？

瞭解員工

2009-06-15T19:34:00.004+08:00

今天和員工開每週例會，一般開會時都都商討工作上的事，但今次例會就例外地只和員工們閒話家常，藉此多些瞭解及關心員工。

以往我把百份百的開會時間處理公事，從未試過談任何私事。今天我們談的是大家的入行經過，大家平時相處時的苦與樂，大家對自己的期望等等。大家都談得很開心，亦將心中的一些鬱悶吐了出來，會後大家都展現了久違了的笑顏。全女班的工作環境，是是非非、恩恩怨怨特別多，久而久之就會由心病演變成對立，黨派就由此而生。如果我是一間大企業，我絕不介意有黨派，因為公司內要有良性競爭才會有進步。但我現在的蚊型規模，要團結才有力量，爭鬥只會導致滅亡。所以知道她們有少許心病就要即時處理，以免後患無窮。

而且這次的例會都有意外收獲，就是她們願意每星期一都早一小時上班，因為我們需要多些內部訓練，她們都想多學點東西去充實自己，這個變化實在是意料之外的禮物！

09 第一次

2009-06-14T11:57:00.006+08:00

已經是夏天了，原來09年我完全沒有寫過 blog，我想除了我自己之外已經沒有讀者了。

停寫了的這一段日子，生活工作都改變了很多。其實一直停寫的原因，並不是要湊仔。家中有個好印傭，我到現在都不懂照顧已經九個月大的小寶貝，哈哈哈！停寫的最主要原因是我要密謀離開公司自立門戶。經過幾個月的籌備後，公司已經於五月底開業了，現在才有時間和空間去抒發一下，讓自己可以透過文字沉澱一下紊亂的思維。

由打工仔變成老闆，原來是一個很好的學習過程，會令人成長的。打工時的我很衝動，動輒大發雷霆，回想起來有點恃才傲物。但當身份一變，就體會到發脾氣是銷售煉金術師的所謂特權，並不是老闆應有的態度。做老闆要寬宏大量，要處事不驚，應變要更快，對待不快事要儘快放下，要任何時候保持正面思維，要面面俱圓，還有更多仍未學懂的事等著我。

現在生意初起步，最需要解決的不是生意問題，而是軍心問題。我有4位舊同事都來了我的公司工作，包括我的好拍檔，現在她是我的頭號猛將。同事們在舊公司有穩定客源，現在由零開始，她們都有適應方面的問題。在沒有足夠客源時，她們就有信心問題，擔心做不到公司要求的營業額。而且我由她們的同事變成了老闆，在角色衝突上也出現了磨合期，大家都需要時間去適應，這才是我急需解決的問題。

敢自稱是銷售煉金術師也不是浪得虛名的，尋找新客是我的強項，我從來不擔心客源問題，只是同事們仍未見到成效才會擔心的。我不會怪責她們，如果她們都有這份能耐就自己做老闆了，還用打工嗎？哈哈！我只會盡力提升士氣，令她們有更強戰鬥力，到新客開始出現時就不會浪費我的一番心機。

昨天知道同事們暗地批評我的態度不好，初時我都有認真反醒自己的說話是否過火了，令她們不開心。但想深一層，這是一個僱主與僱員之間的自然現象，打工仔會要求老闆是個百份百完美的人，老闆有任何言行上的差異都會被員工批評，既然如此又何必介懷呢！只要我抱著對事不對人的態度，就問心無愧了。

復工一星期

2008-10-26T20:58:00.002+08:00

產後復工，短短一星期已經做左好多野。

首要的是，剷走了 2 件冗員。適逢經濟環境一片愁雲慘霧，生意直插谷底，再加上獅子銀行再一次向小企業下毒手，響種種不利因素底下，老細終於忍唔住要提出精簡人手既要求。好丫！既然係公司有裁員既需要，我就連私仇都一併報了。其實我唔介意同事吞 pop 或者間唔中渣流攤，不過最好唔好要我背黑鑊甚至要做善後工作。就算真係要執人手尾，我真係 expect 犯錯果位同事會表示多少歉意。如果佢成日整鑊杰撻撻既要我執手尾，仲要一鑊甘過一鑊兼完全唔認為係佢既責任，我就真係忍受唔到。響放產假之前我已經極力要求炒左某一位成日同公司攪對抗既同事。我唔係對公司特別有好感，而係佢既所作所為激嬲左老細之後，老細會成日黎搵我解決本來唔係我要解決既問題。久而久之，我就會對果位同事產生極度不滿既情緒。所以當老細要精簡人手時，果 d 食野唔做野，做野打爛野既人就會首先拜拜。

炒左 2 個人之後，我就要發揮補位王既功效。不過我情願做多少少都唔想又要做又要煩。

無人性

2008-10-14T09:07:00.010+08:00

星期五要復工了，根據同事每日既匯報，我已經有一隻腳踏左入棺材了，有冇咁多野留返比我做呀？仲有，老細問我同事，我湊仔湊成點，同事就話比佢知我個工人湊得個 BB 好好。老細即時話︰「咁佢返黎之後就可以走哂 2 間舖了。」聽完之後真係火起三千丈，我個仔有人湊姐，但係我個傷口未好返哂喎，點走哂 2 間舖呀？佢有冇人性 ga？大把野自己唔做仲要專登留返等我開完刀未好返哂黎做，有冇攪錯呀！

人仔細細個樣咁囂張

2008-10-13T11:32:00.009+08:00

初出生時懶可愛

一星期後就好囂張

火未燃而煙先至

2008-10-09T15:20:00.004+08:00

昨晚同事打電話黎同我訴說公司既苦況，一講就講左 2 粒鐘，越聽越苦，同埋已經預知我返工之後會有咩工作，真係鑊鑊新鮮鑊鑊金！

公司內發生既事，對於我黎講係陳腔濫調，一早已經預知公司會發生咩問題。原因好簡單，老細有幾多料，同事有幾多 bargaining power，同事之間有咩衝突，呢 d 已經係不變既定律，我理應係會從容面對復工後既工作問題。不過，當我知道問題發生後老細不但無去解決，仲要深化問題既嚴重性，攪到 2 間店勢成水火，日日家嘈屋閉咁。之後佢攪唔掂，就同所有同事講，有咩問題都等我放完假之後返黎解決，佢就咩都唔理，我就真係把幾火。頂丫！間公司係邊個 ga？我唔響度就由得 d 問題係咁滾大，自己又唔做返 d 野，之後等所有問題蘊釀左十星期之後要我攪掂佢？真係一邊聽個電話一邊爆哂粗！一直以黎公司好數，就係佢「眼光獨到」同埋「有遠見」，公司生意唔好就係我既工作質素出現問題。大佬呀，行行都有淡旺季，佢又唔睇下整體升幅有幾多，我地既 increment 全部係雙位數字，大把行業都做唔到呢個成績呀。公司入既每一個員工都係我 train 出黎的，銷售業績有進步有乜理由唔關我事？呢下野先至氣頂！只要有一個月生意唔及旺季好就 be li ba la 係咁怪責下屬辦事不力，同佢打工真係冇心機。

男人老狗作風如此龜縮，好似細路仔打爛野之後匿埋唔敢見人咁，我睇佢唔起呀！

3 號

2008-10-01T12:14:00.005+08:00

有朋友同我講，話最討厭 3 號仔 (註︰此 3 號係指九型人格入面既第三類型性格)，因為覺得佢地太勢利，凡事只向錢看，只想和有錢人打交道，看不起不是大富大貴的「朋友」。在這裏我要為 3 號仔平反！

首先，要判斷別人是九型人格中是屬於哪一類，絕對不是靠一個人的外在行為而決定的。九型人格的分類是建基於動機而非行為的。有太多人急於為別人定型，見別人有甚麼舉動就狠批別人是甚麼類型，實在過份輕率。除非已經真正充分掌握了別人內在的動機，否則有好大機會是不能準確判斷別人是哪一種類型。而且學性格學的大前提，不是到處為別人貼標籤，為別人冠上號碼。學性格學是要令你更認識自己及別人，理解與不同的人相處要有不同的方式。要令自己對別人更有同理心，而不是用來分化和攻擊別人的。

在九型人格中，第三類型人是怎樣的一種人呢？以下是一個簡單介紹︰

第三型的人有自信、野心、成功、耐力、行動敏捷，他們一生追求金錢和地位，是極佳的推動者，能給別人一種「無所不能」的信念。他們時常會出現假面具的一面，用變色龍來形容他們可說非常對稱。

當他們專注目標時，會發揮無論如何的精神，他們的生命、工作、休閒都是全部列入安排，而且一個目標未完成時，下個計劃又準備開始了。他們有無窮的精神，只要達到目標，從不計較，他們的腦袋裡有多重任務，許多目標。而每個目標有需要時也會給予時間去專注，但至於過程的細節，他們會沒有那麼投入。

第三型的人有強烈競爭性，因為他們將焦點放在「勝利」，但有點不同的是，他們只是向自己挑戰而已，並沒有擊敗他人的意圖。

他們很少冒險，除非他們有靠山，而且他們只接受那些感覺到成功在望的計劃。若真的失敗了，他們會把失敗定義為「部份的成功」或「一個學習經驗」來看待，除即迅速展開下一個新計劃。

對第三型的人來說，受讚同及被喜愛是成功的一部份。他們甚至以為每個人都是這樣想的。而令他們最具破壞影響的事情，就是一致公認他為「失敗者」，他們很重視形象，很在意別人怎想他，也很重視別人的回應。

他們很少和自己的感覺連繫，並不是說他沒有情緒，而是到空閒的時候他們才去感覺。

一般的第三型因事業有成，動力足夠，有時候在無聲無色之間產生到一股魅力，很容易受到異性垂青 (特別是男性)。但因第三型目標實在太多，他們會認為伴侶會影響到他們的目標，伴侶對他們來說只是一個伴侶，甚至乎會覺得身邊的另一半只要人生計劃必須實行的一部份而已。而對第三型的人，講出「我愛你」這3 個字是他們的死穴。

積極的第三型是具同理心及社會意願的領導者，能用熱情鼓勵他人，努力向上爬，重視賽果和成就，自信而精力充沛，環境適應力強，有魅力及受歡迎。

消極的第三型是輕蔑傲慢，野心份子、不帶感情、為達到目的支配他人、恐懼失敗與恥辱、高估或低估自己、不擇手段、高處不勝寒。

喜愛成功和「勢利」是有分別的。成功的定義很廣泛，不一定限於事業和金錢。要建立一個家，要培育出色的人才都是「成功」的一種，很視乎當事人的取向。因為第三類型人都有機會傾向第二類型而將目標變成助人的目標，或傾向於第四類型而將目標變成感性的滿足。這些都不是金錢可以衡量的，但都有目標這個重要元素。而且對於第三類型人來說，沒有目標可達，就彷彿沒有了生存意義。目標這回事，對於第三類型人來說，是最內在的動機。

勢利，只是某部份仍未成長的人有待改善的地方，並不是性格定位的元素。

換季

2008-10-01T11:45:00.003+08:00

今天是十月一日，過了秋分就到寒露，開始有點點秋意。

昨日和拍檔傾電話時講起，天氣開始轉涼了，要趕快為 BB 準備厚一點的衣服了。本來我們兩個血拼皇后，而家換季首要的血拼目標已經不是新出的秋裝，而是 BB 的衣服。做了媽媽之後，BB 的一切已經放在第一位，平日最愛打扮的我，己經有好耐冇特別照顧自己的外表了。好在月中就復工，返工時要見人，一定會變返事業女性的打扮，如果唔係變左做黃面婆就大件事了！

其實而家心情都有 d 矛盾，冇返工咁耐，平日只係食共訓，整整下個人好似一盆散沙咁。平日拼博慣的我，一時之間沒有了目標，真的很失落。所以我都想返工，想有返工作目標，咁個人都會醒神 d。不過我又唔多想返工，因為工時太長的關係，我會掛住 BB 的。心情真係有 d 唔知點，哈哈！

BB 的哭聲

2008-09-17T10:05:00.002+08:00

對左 BB 一段時間，已經識得分辨佢既哭聲係代表咩。

如果佢只係丫丫丫哭幾聲，即係要換片，只要即時同佢換完片，佢就會安靜訓返。

如果佢係不斷大聲哭，仲要典黎典去，即係要食奶了。佢會一直哭一直典，直至比個奶樽塞住佢把口先至會停，哈哈！呢下野幾似我，不達目標係絕對唔會放棄的！

如果佢發惡夢 (但係點解咁細個 BB 會識得發惡夢呢？)，就會突然好大聲丫~~~~ 咁哭，但係一安撫又或者抱下就會收聲。不過同佢掛左個玉墜響件衫仔度就少左發惡夢勒。原來玉真係可以定驚的。

仲有，國內既奶粉出事，香港都不能夠獨善其身，而家每人只限買2 罐，打仗咩？同埋連我平日飲開既蒙牛都唔敢再買，迫於無奈要轉返香港牌子先。至於 BB，遲下會同佢轉日本奶粉，冇咁燥同埋平過美國奶粉好多呢！

亂

2008-09-16T20:15:00.002+08:00

有位同事今日打電話黎補祝我生日，兼訴下工作上既苦。自從我同我拍檔放產假之後，老細同老板娘時不時都會返我坐鎮果間店度巡視業務。盤生意係佢既，當然鐘意巡邊就巡邊間啦，不過老細大細超既毛病令到同事們非常之不開心。早 2 年，老板娘睇住尖沙咀間舖，我同我拍檔就睇住另一間。表面上係各有各做，其實係互相鬥數。講到鬥數，我敢自稱係煉金術師就梗係贏佢九條街啦，老板娘唔會因為其中一間舖多左生意而開心，反而要諗盡辨法去踩低我地，想我地 PK。佢既奇異思維已經係公司內人所旨知，所以都幾唔得同事既人心。不過我做事都幾 tough 下，絕對唔會怕老板娘呢 d 無聊手段，舊年仲成功令佢返少左公司，令大家好過左一段日子。

不過好境不常，我同拍檔一唔響度姐，佢就返去我管間舖度日日抽同事後腳，令士氣急挫，就算我放緊產假都聽唔少訴苦既電話。今個月響冇哂大頭支持既情況下，條數都仲 keep 得唔錯，其實係應該開心的，不過老細真係盲 Q 左，仲要日日話同事唔落力，簡宜令人洩氣到極點。響佢口中，一句衷心既讚美都冇，見親同事唔係彈呢樣就係彈果樣，你叫人點會有心同你搏呀？聞說某同事昨日同老細炒左一鑊甘既，跟住今日老細就唔出現勒。我成日都覺得老細既行徑非常小家，平時就因為雞毛蒜皮既小事多多聲氣，一比人理直氣壯講幾句就即時龜縮，都唔知係唔係男人黎既。

同事叫我悶就返公司，我發誓響放完產假之前，我返去都只係搵同事飲茶姐，係絕對唔會理老細 d 野既！佢仲未夠 pk，等佢同 d 同事炒多幾鑊，睇下有冇機會開下竅先至講啦。不過以我認識佢既為人，佢係唔會開竅的，佢老婆告 2 句枕頭狀就會返公司亂吠，都唔用自己個腦思考下先既，又點會開竅呢？

多謝關心

2008-09-16T11:36:00.002+08:00

昨日收到一位稀客的電話，打電話黎既係我響 05 年時上一個 course 既同學，佢同我都有共同朋友，所以「感覺」上係好似比較 close。不過自視甚高既菲菲唔係輕易將「相識」升格成為朋友，果位小姐，我只會當佢係相識一場，並未係朋友。所以我冇同佢講過我有左 BB 同埋已經生左。昨日佢打電話黎就係恭喜我生左 BB，我都好奇怪佢點解會知，原來上個月班「同學」有聚會 (不過冇人通知我，即係冇人會預我去)，其中有人知我生左 BB，所以消息就咁傳開去。

我份人都比較奇怪，生仔呢 d 開心事，本來應該大鑼大鼓周圍同人講的，但係我既私事一向保持低調，除左家人同埋菲菲心目中既朋友之外，係冇其他人知的。突然間我生左仔既消息響我不喜愛既圈子中流傳，其實我係唔開心的。最唔鐘意就係問我結左婚未，未結婚唔生得仔咩？有人認頭，出世紙有老豆個名就得啦，我都唔會走去問亞媽拎張結婚證書黎睇啦。佢地問黎又唔係真係關心我，只係純粹滿足佢地既好奇心，我真係冇咁好氣招呼佢地。

之後又話下次約埋班同學黎探我喎，唔好客氣勒。我唔想 BB 比班無謂人騷擾，同埋我真係唔想見返果班所謂同學。除左一兩個真係可以做到朋友之外，其他既人只係會踩低別人黎抬高自己，我冇心機應酬呢班友仔呀。而且佢地都唔係好想應酬我，如果係真心祝福的，唔打電話黎都會有個 SMS 丫。既然大家都冇心應酬對方的，希望果位小姐唔好真係約人黎探我呀。咁大個人，連少少眉頭眼額都唔識睇，吹漲！

又大一歲

2008-09-16T11:25:00.002+08:00

許下了三個願望，希望全部達成！

珍藏

2008-09-13T00:55:00.005+08:00

自從數碼相機普及之後，好多父母都會同 BB 喪影寫真，我就係其中一個。加上而家坐月日日響屋企冇野做，唔同個仔影相，真係冇咩好做，哈哈！

而家 BB 仲細，平時都係食奶、訓覺、換片、沖涼同埋扭計，所以影黎影去都係咁上下，睇多幾張其實都好似差唔多。不過其中有一張，絕對係我既珍藏，就係 BB 出浴後既「全相」勒，哈哈！因為怕 BB 會冷親，所以係趁工人同佢沖完涼抹乾身正準備著衫時偷雞影的，BB 仲響度撐手撐腳，好攪笑既一張相。

影完一大堆之後，又「忙」於為 BB 整相簿，send 埋條 link 比親朋戚友，攪下攪下又消磨左一日，都幾開心的。之後，響食完飯煲完電視劇之後，又忍唔住睇住亞仔既相簿，睇完一次又一次，原來媽媽真係會迷上自己個仔的。

大家唔好問我要 BB 相條 link 勒，響度分享一張咁多啦！

恭喜恭喜！

2008-09-12T11:12:00.001+08:00

昨晚我既拍檔生左個 8 磅 10 安既 BB，今日我妹妹亦都順產了！

恭喜 2 位新媽媽同埋祝 2 位 BB 身體健康！

百無聊賴

2008-09-11T13:05:00.002+08:00

產假不經不覺已經放左一個月了，仲有6個星期先至復工。響放假之前係好想好想快 d 放，因為有成 10 個星期唔駛返工，都幾過癮！之但係日日響屋企食共訓，原來都幾悶下。

其實我真係幾幸運，請到一個好好既印傭，湊仔家務廚藝樣樣皆精，我咩都唔駛做只係專心休養，其實都幾少奶，哈哈！不過忙碌慣既我，當精神回復返 d 既時候，就會慨嘆自己好無聊。其他媽媽會響呢個時候好努力咁刨育嬰書，不過我刨黎都多餘，因為出左院咁耐，我只係有機會同個仔換過一次片咋，其他時間個印傭一腳踢攪掂哂，咁我睇育嬰書黎做乜？家中有既書，好多我都睇過，未睇過既有好多都係「硬野」，唔係講心態，就係講工作，好似唔多適合休養中既我去睇 (懶人係多辯駁 ga 勒~ 哈哈！)，唯有睇下電視，睇下雜誌啦。

今個月尾新既八字班又會開勒，我決定左一定要去返學，見下 d 同學，如果唔係我會悶死的！

公司的事

2008-09-09T12:47:00.003+08:00

由 8 月 8 日開始放產假，到而家已經有一個月了。雖然老細冇打電話比我，不過公司入面既事我想唔知都唔得。

除左我之外，我既拍擋都放產假，如無意外佢今個星期會生了。響佢放產假之前，佢都不時比電話我呻下公司內既問題。既然我都放緊產假，當然係採取齋聽唔比意見既態度啦。當時我都勸佢︰「你都就放假啦，仲咁勞氣做咩姐。你老細都唔緊，你緊又冇人理，不如慳返啖氣生仔好過啦。」如果老細知道我咁講，一定激到七孔生煙，哈哈！

到我既拍擋都放埋產假勒，滿以為可以暫別公司既是是非非啦，點知同事們打電話黎慰問我時又講公司最近又攪緊乜乜推廣，人事又點，老細又點… 真係多得佢地唔少！

請大家放過我，有咩事都等我放完產假先至同我講啦。唔通你叫我而家返去主持大局咩？老細有返工嘛，有咩問題未等佢攪 lor。攪得掂又好，攪唔掂又好，盤生意係佢既，皇帝唔急太監急都冇用 ga。老細只會認為同事們未夠水準去批評佢如何去營運佢盤生意，咁又何必浪費自己既精神時間去做 d 徒勞無功既事呢？

打左呢個老細工咁耐，都睇化哂勒。而家佢認為自己既決定係無敵既，未由得佢玩下先 lor。有咩後果，都係佢自己負責之嘛。

產房趣事

2008-09-07T12:19:00.003+08:00

去公立醫院度生，除非醫生一早診斷左你要開刀，否則係一定要你自然分娩的。其實我係好想自然分娩的，因為想我同 BB 既身體都好 d。先唔講開刀既問題，既然醫院係要我地先自然分娩，好順理成章成班待產既孕婦都要響產房度等待最關鍵既一刻。

星期一既早上我開始陣痛，所以直接入左待產 ward 待產。最初半日都幾優閒，雖然每 5 分鐘就陣痛一次，但係都仲行得食得，所以響一般檢查完畢之後都出左 lift lobby 度行圈圈，因為行多 d 有助生產順利。當時我已經覺得幾痛下，同埋每 5 分鐘陣痛一次都幾密，男友見到我咁樣，已經嚇到佢面都青，好在佢唔可以去陪產，如果唔係實嚇死佢… 哈哈！

到左黃昏，我已經開始痛到行唔到，要響床上等。而且陣痛開始越黎越密同越黎越痛，所以我都叫家人返去先，到生得時醫院自然會通知佢地。響床度等待既時候，見到其他孕婦痛到呼天搶地，都幾恐怖下。當時自己心諗，我一定唔會好似佢地咁失控，一定要保持返少少儀態，生仔都要生得高貴 d。不過事實上係，去到十級痛時，真係會失控 ga，哈哈！

好奇怪，有個孕婦入左待產房都未夠幾個鐘，就要求醫生比佢出院，因為明天要返工。唔係掛？生仔喎，唔通仲有公司會怪責你因為生仔而唔返工導致公司運作混亂嗎？護士同佢講︰「你而家入左院喎，公司既事由得其他同事去攪啦。」但係個孕婦都仲要堅持，又話自己負責一切後果，最後佢都係出左院的。究竟係佢公司既問題丫？定係佢自己太重視份工呢？工作狂我見得多，我自己都係一個工作狂，不過響工作同孕育生命之間要選擇，唔駛問一定係後者有絕對既重要性。

又有另一個孕婦經醫生催生左十二小時都生唔出，醫生決定要同佢開刀，以保住大小既性命。但係果位孕婦既屋企人就求醫生唔好同佢開刀，因為佢地想生多一個。有時真係唔明 d 人諗咩，第一個都未生得出，咁快諗第二個？而且開刀生都可以生第二個 ga，有咩問題呢？同埋我身同感受，去到醫生決定開刀既一刻，真係唔到你再等，因為公立醫院係唔會隨便同你開刀的，一定係去到非開不可既時候先至同你開的。唔通你既醫療知識會比醫生多？最後佢都係去左開刀，如
果唔係真係驚會大小不保。

又有個孕婦一開始就呼天搶地，一叫就叫左半日，護士比左止痛劑佢吸，佢攪左半日竟然冇吸過。佢同護士講話唔識用，比護士鬧佢咩都唔願學，第時點教仔？真係幾攪笑。我都有用止痛劑，唔可能唔識用的，笠住口同鼻呼吸之嘛，唔駛學喎… 真係咩人都有。

最好彩既係有 2 位孕婦，一個響待產房已經痛到生左，另一個係入左院唔夠一小時已經去到十級可以生了。如果我都可以痛咁少就好了。

初級媽媽

2008-09-06T11:44:00.003+08:00

BB 終於在9月2日出生了，最可惜係我堅持左三十個鐘自然分娩之後都冇辦法要開刀，生產過程真係有死過返生既感覺，大家真係要多 D 孝順媽媽呀，生仔既過程認為唔容易！不過而家最緊要係 BB 身體健康，咁就咩都抵返哂勒。

初初學做媽媽真係雞手鴨腳，淨係換片餵奶呢 D 基本功都攪到我手忙腳亂。響醫院既最後一日，佢地會比返個 BB 我照顧，最後果日真係訓都冇得訓，係返左屋企之後有工人幫手照顧 BB 我先至正式可以休息一下，今日終於有返 D 精神知道自己做緊乜… 哈哈哈！

BB 個樣初初睇好似我，再睇真 D 係似爸爸多 D，只係對眼似我姐。岩岩生完見到個迷你男版既自己，個感覺真係好奇妙！不過 BB 一生出黎時唔識哭，要送去兒科度，好在佢 5 分鐘內都識哭，嚇得我丫。生完之後因為 D 止痛劑同麻醉藥既影響下，迷迷糊糊左成日，先至叫做有返 D 知覺。點知開完刀既第二日就要即刻落床，真係痛到想死。終是又要靠止痛藥黎維持日常活動，如果唔係行都行唔到。呢個星期所食、吸同埋注射既止痛劑加加埋埋多過哂我生之前果幾十年既總和，真係大鑊…

最後，多謝大家關心！等我精神再好 D，會寫下醫院內見到既趣聞比大家知。

等子又等

2008-08-27T21:33:00.002+08:00

BB 的預產期係昨日，但係到左今日都仲未有跡象出世，真係等到我頸都長。下星期一係最後限期，如果星期一都仲唔出世，就要入院催生了。原來要等一個生命出世都唔係咁容易…

稱職

2008-07-30T18:49:00.003+08:00

點為之稱職呢？哈哈~~

返左工只有一星期既 part time 已經 pick up 哂我所有既 admin work，所以今日我咁得閒可以係咁寫 blog。哈哈~~ 而呢位 part time 同事 Winnie 都需要同尖沙咀果邊既 admin 有所交流，先至可以完成佢既所有工作。呢幾日，Winnie 發現到好多尖沙咀果邊既同事交出黎既 report 係做錯既。經過一輪 back and forth 之後終於改好哂所有 report。之後 Winnie 忍唔住問︰「點解果邊既同事成日都做錯野既？」。我既答案係︰「因為佢唔鐘意做 admin work。」Winnie 聽完之後 r 哂頭，我都唔知點同佢講好。

其實上個月我已經同老細好鄭重咁講過要炒左尖沙咀既 admin，因為佢不單止冇做好 admin 既本份，仲多次主動干涉公司既人事同埋行政運作，令公司既行政大亂。要令公司既政策執行得公平同埋公正，我絕對唔容許有人為求私利而擾亂哂成間公司既秩序。所以我提出要炒左果位同事，以免公司陷入更大既混亂之中。老細最初都支持我炒人，點知去到埋門一腳，老細唔單止唔炒，仲比佢得償所願，響不合格既工作表現下仲可以縮短工時以作「鼓勵」。

之後老細同果位同事又因為工作上既問題嗌左 2 次大交，佢竟然仲有面黎搵我吐苦水。我採取積極不干預既態度，又係你自己話唔炒既，有問題你黎搵我又點呀？都痴線既，你係老細有生殺大權都唔敢炒個不稱職既伙計，我都係打你工咋，你咁既做法只會令我覺得你優柔寡斷同無能。我係唔會同條癈柴講野既，所以佢黎親吐苦水我都當佢冇到。佢話驚我放左產假之後又冇左個 admin 會好麻煩，其實美容院冇左個 admin 係唔會死既，況且我都請左人返黎幫手，佢仲可以有時間兼顧埋尖沙咀既工作，我真係諗唔到點解佢仲要留一個幫唔到手仲要倒米既人響度。反而當我放產假時只有 Winnie 幫手，我仲安心過繼續擺個計時炸彈響尖沙咀。好明顯佢而家仲忌我幾分，到我放左假時佢要玩野，老細一定比佢玩到謝。我唔想放完產假返黎要執佢 d 手尾…

樂得清閒

2008-07-30T16:01:00.002+08:00

老細終於向現實低頭，願意請一個 part time 幫我手，起碼響我放產假時都有人做下 admin 既野。其實響請呢個 part time 之前，老細見我好似好輕鬆咁做哂 d paper work，就諗住連 part time 人工都慳返自己做。不過老細始終冇 office work 底，同埋電腦知識極度貧乏，所以我教左佢 2 個星期，佢都 pick up 唔到一半既野。終於佢頂唔順 (其實我一早已經頂佢唔順！學野咁 Q 慢，教到我把幾火) 就批准我請人黎幫手勒。好在有朋友介紹，請左個好幫手，我只係 train 左佢唔夠 8 粒鐘，佢已經知道哂 d 野點做勒。加上而家我不理朝政，開會零輸出，所以我既工作已經去到一個好清閒，返工等放工既地步勒。哈哈！本來我想花多 d 時間響提高管理同埋銷售既質素，不過老細而家變左秦始王，順我者昌，逆我者亡，為左保住命仔，我只有唔出鼙由得老細自己想點就點勒。

距離我放產假仲有 2 個星期，希望呢段時間可以繼續安穩地渡過啦。

工資問題

2008-07-30T10:46:00.002+08:00

最近多番工潮，又再惹起我既不滿情緒。踏入 2008 年，公司既生意勁升，破紀錄當食生菜，上半年既累積生意係 07 年同期既一倍。因為我地係預繳式服務，所以多左生意即係對人手既需要會多左。為左保持服務質素，就一定要請人。黎見工既 expected salary 都比上年略為上升左 10 - 20%。本來我地都 keep 返原本既招聘待遇去請人，不過冇人肯返工，即係我地既 offer 應該係跟唔上市場既要求。於是我同老細提出不如提高招聘新入職員工既待遇啦，老細就唔想新入職既同事比舊人既人工仲要高。咁我就提出整體加薪約 5%，咁就可以解決到呢個問題。老細對我呢個提議表示不滿，認為同事已經有佣金，唔應該再加薪。但係佢又唔記得 08 年初既時候調低左新入職員工既佣金比率。即係表面上係「多勞多得」，實際上係玩數字遊戲將同事既部份佣金收歸國有。

雖然我唔係食佣既，不過作為管理層，面對呢件無良僱主又真係幾氣頂。做左咁耐一毫子人工都冇加過，只係識得搵機會扣我錢，我仲要個個月幫佢破生意紀錄，做得唔夠多又比佢卒，如果唔係有產假放，年頭我都唔撈了。而家連前線搵生意既員工應得既收入都係咁 cut，自已賺 double 但係連 5% 既人工都唔願加，唔單止請唔到新員工，仲會令原有既員工流失，咁我地年頭收左客人錢既服務真係唔知點提供。老細好似唔理解呢個問題既連鎖反應，只係一味 ban 我，認為工潮只係大公司既專利，唔關佢事。事實上我地見到既工潮只係冰山一角，有好多中小企都會面對呢個問題，只不過中小企既員工數目少，就算發老細難渣都未必有人知。一係就選擇搵工跳糟，費事浪費時間爭取。

如果中小企既員工大換血，就會影響到日常運作，作為老細既都幾頭痕下。其實好多人既要求加幅都唔係好高，只要肯加 below 10% 已經可以解決大部份既問題，響生意環境上升幾乎一倍既時候，點解仲要勒住果 5%？真係不解。

卜卦見證

2008-06-26T00:12:00.002+08:00

學左卜卦只係三堂，已經發現卜卦真係好準！不過可惜既係，我識卜唔多識解，往往係事後先至證實到。原來開卦一 d 都唔難，最需要學習既係睇通支卦。

最初貪得意卜下公司既單日生意，出左個 3 字。當時 r 哂頭，都唔知係三張單丫，定係三百丫，定係三千呢？最後果日既生意係三萬~ 哈哈！之後上一堂我地要練習卜下老師收埋左 d 咩物件響個箱度，我都卜對左個卦象，不過解卦時出現偏差，所以唔可以好準確咁卜到出黎。

最近有 2 份重要文件唔知去左邊，今日又開左卦睇，卦象係講明搵到既，最初我從卦象既方位找尋，不過搵極都搵唔到，仲懷疑係唔係開錯卦。點知最後 2 份文件都搵得返，而家正左研究開出黎既卦究竟響邊度顯示左正確位置，抑或顯示出搵到既時間。

學卜卦真係好有用！哈哈！

卜卦

2008-06-07T00:08:00.002+08:00

呢排除左學八字之外，仲開始學梅花易數。梅花易數係中國遠古傳落黎既卜卦學問，有一大堆基本資料要熟讀之外，仲要識得靈活運用卜卦時既現場環境、人物同埋時機，都幾好玩。雖然我只係上左一堂，仲有大把野未學識，不過響應用上比八字更易掌握，因為我唔擅長記好多野，不過好擅長靈活運用丫嘛。哈哈~~

其實學梅花易數既同學，全部都係不同既八字班既同學所組成。其一係學梅花易數要有八字根基，其二係八字比較多人認識，比較少人一開始會走去學梅花易數。上左第一堂之後，發覺處事比較靈活既同學就學得投入 d，而處事比較愛有規律既同學就好似唔多接受咁。同埋響上堂既期間，都見到唔同既同學有唔同既特質，都幾過癮。

仲有，老師響上堂之前卜左一支卦，就係卜下第一堂有幾多人出席，真係好堅，連我肚入面果個都卜埋，哈哈！

睡寶寶

2008-06-06T23:30:00.004+08:00

今日有返少少精神寫 blog，一睇之下原來我已經有個幾月冇寫 blog 了。最大原因係我有左 BB 之後就極度渴睡，響任何時候同任何環境都可以訓得著，仲一日訓得比一日多，所以今日有心機寫下 blog 都叫做幾難得。

響呢幾個月既期間，工照返，數照跑，仲連續 2 個月破單月紀錄，比著係以前既我，一定開心到不得了。不過老細始終係老細，連續 2 個月爆數，不但一句都冇讚過，仲不斷搵工作上既錯處黎挑剔我，真係做到人都癲。所以，呢幾日趁我有少少唔舒服，就連請左 2 日病假，一黎真係需要休息，二黎真係提唔起 EQ 去應付麻煩老細，唯有唔返工作無聲抗議。

做美容院既工時不嬲都比較長，自己一個人就話可以頂住，要孕育生命原來真係要好多 energy，到咁上下睡魔就會急 call，只要唔夠訓就會病，所以呢一兩個月既病假就密左。可能老細唔鍾意我請病假，所以對我既工作挑剔左，響呢段時間我唯有盡量忍啦。而家我只係希望快 d 可以放產假，等我可以有十星期唔駛對住呢個老細。

技術訓練

2008-04-23T18:50:00.003+08:00

美容業的技術發展日新月異，美容師本身都必須不停學習新事物才可以與時並進。

最近公司請了一位新同事，她為我們引入了一些新技術，對於公司來說是一件好事，因為新技術可以帶來新生意機會，我最喜歡同事之間互相交流最新技術，大家都有進步嘛。

不過有時老細都幾攪笑，佢唔想教識左同事之後，同事會另謀高就，咁就浪費公司既資源去訓練勒。呢個思維都幾不長進，呢個世界就係咁，打工既唔會同你打一世，我地既員工走左，又會請返人地訓練好既員工，其實都係 fair deal 丫，又有乜問題呢？反而公司太過固步自封，唔肯比同事進步，最終惡果都係公司受返哂姐。

好勒，到我講掂老細放開懷抱去傳授新技術比同事勒，又到班女唔長進，唔肯學，問你死未！哈哈！

收利是

2008-04-17T18:01:00.002+08:00

呢半年學八字既時候，為左要多練習，就要不斷問身邊既人既出生資料然後加以印證。人地比得出生資料我，就預左我會「贈」返佢地幾句。初學時唔夠膽講太多，因為真係怕講錯。不過既然係學神，就唔應該怕錯，反而要多 D 搵唔同既人切磋一下。

幾個月前有個客 (係美容院既客) 比左佢幾個女既八字我，當時我完全唔敢即時答佢任何野，仲走左去問老師出貓先至敢答佢。哈哈！始終個盤唔係自己睇既，就算出埋貓都講唔到個客既重點。今日個客又黎做 facial，順手又問下我佢果 3 個女女既八字，唔知點解今日心血來潮憑自己記得既野係咁講，竟然全中！哈哈~ 響同個客講緊既同時，有位新同事聽聽下忍唔住話又要問我，我話︰「當然冇問題啦，不過要收利是喎。」佢都一口答應。今日個客見我講明要收利是，都話要補返封利是比我兼有餐食，真開心！

之後有同事見我講幾句就有錢收，就走黎問我︰「你比左幾多錢去學八字呀？」
我答︰「比左幾多錢唔係問題，最緊要係我真係有比心機去學姐。」

講返生意

2008-04-15T14:20:00.002+08:00

雖然我都係躲懶中，不過工都依然係要返，生意都依然係要做。

08 年既每月生意目標 (當然係老細 set 果個啦) 係 07 年既 1.5倍。一般黎講，同事們響年頭知道老細又加 target 之後，Q1 既生意一定係軟哂既，因為同事們仲未接受到挑戰而有放棄既「跡象」。當然我都因為私人問題而都放軟埋一份啦，哈哈！不過響每間店都增聘左一位 sales 之後，睇黎今個月有機會首次 meet 到老細既目標。因為到今日為止 (即係月中)，已經做左一半有多勒。呢個數字響幾個月前，係一個要開香檳興祝既數字，但係而家老細既要求高左，做到呢個數都只係換黎老細埋怨少幾句姐，哈哈！

其實以我呢幾年既業績走勢，要搵一份比而家高 25% 薪金既工真係唔難。好！衰衰地同佢博到我放產假，等我個 track record 靚仔 d，再去搵過份工先~

躲懶的原因

2008-04-13T22:41:00.002+08:00

近來我對工作的熱誠大不如前，可能係老細對業績貪得無厭令我有少少氣餒 (業績升左咁多，2年黎我一毫子人工都冇加過，花紅雙糧欠奉，你話氣唔氣餒？)，亦都可能係老細對我既工作諸多挑剔令我唔開心，其實呢 d 全部都係結果，真正既原因係我將要做媽媽，老細要比 10 個星期有薪產假我感到極之不滿，所以佢成日有意無意都響工作中雞蛋裡挑骨頭。我唔會認為佢想迫我走，等佢唔駛白比 10 個星期人工比我，不過佢對公司入面有 2 個高層同時懷孕確係有 d 不知所措。最大件事係，我地 2 個係同時放產假，即係公司有 2 個半月既管理係會出現真空。

老細為左填補呢 2 個半月既問題，就積極咁請人，希望佢地可以響管理真空既時間可以幫到公司手。我都真心希望佢地可以幫到公司手，因為自從知道將會做媽媽之後，我既諗法都有左好大既改變。之前工作永遠係我既第一位，不過到新生命誕生之後，BB 就會係我既第一位。其實而家我都錫身左，唔再 OT (做左冇錢兼多謝都冇句，我情願返屋企訓下好過)，亦都唔再提出新 idea (提出左即係加重自己既工作負擔，而家冇咁好精神真係頂唔住)。

菲菲既最新任務，已經唔關工作既事，黎緊既挑戰應該比工作更加刺激！

非理性

2008-04-05T12:22:00.003+08:00

3月份，公司生意勁升，追返哂之前既失地，按道理公司既氣氛應該向好，不過老細趁大家做到生意既時候 cut 哂所有獎金同埋花紅，即時令大家謝哂。

老細既強項就係整謝 d 同事，之後要我攪返起 d 士氣。佢都痴孖筋，打工既野，尤其要跑數既人，梗係會向住報酬既制度而出力啦，唔通會同你講心咩！最大鑊係，佢連我既有薪病假都扣埋，擺明係想迫我走。OK，我會響我拍檔放產假時，即係佢最需要人既時候成全佢的。

匿名信

2008-04-03T16:11:00.003+08:00

今日收到一封寄去我公司既匿名信，收信人係︰狐狸精。拆開一睇，原來係衝著我而黎既一封信。信既內容好簡單，只係鬧我賤格同搶人老公，哈哈哈！友人認為係老板娘既所為，因為佢一直以為我同佢老公有路，不過細心 d 睇下個郵寄地址既寫法，我除左懷疑係老板娘之外，仲會懷疑佢既「朋友」。因為佢周圍同人講我同佢老公有路，可能有心人想為佢出頭，所以整左封無聊既匿名信黎鬧我。如果有真憑實據既，請兜口兜面黎同我講，如果唔夠理直氣壯既，就唔好做埋d 咁既野啦。

成件事，得啖笑。

反射

2008-03-08T13:06:00.002+08:00

每一個人對你既行為，其實反射左佢既本質同埋佢對你既睇法。

最近老細對我既行為，反射左佢對我既信任度似乎大幅下降，因為本來忙碌既我突然被投閒置散，開會時唔接受我既建議，而且佢仲會以尖酸既言詞質疑我。佢對我既態度有極大既轉變，我諗我地既僱傭關係正在備受挑戰。事情發展到呢個地步，實在係發生左好多事，其中有一件事確係令佢唔開心，不過果件係突發事件，我都預料唔到。自從發生左果件突如其來既事之後，佢就打我入冷宮了。

我老細係個孤寒既人，跟佢做野咁耐當然知佢想我走 (因為我人工比起其他同事貴，加上呢排生意唔好，佢好容易會諗埋一邊)，不過佢唔想補返一個月比我，所以用埋哂 d 幼稚手法想迫我自己走。哈哈！我又同你玩下野先！野又唔駛我做，只要我唔辭職就繼續有糧出，我又何樂又不為？反正而家都未諗到轉咩工好，未響度 hea 住先。

遲 d 我會透露究竟發生左咩事，同埋點解我會選擇 hea。

箭靶

2008-03-08T13:01:00.000+08:00

人有時都好奇怪，喜歡將自己既快樂建築響別人既「痛苦」身上。尤其美容院入面既同事，平日最鍾意就係搵一位同事做箭靶，然後拉攏其他同事一齊針對佢。呢位被選中既同事就慘勒，做對唔會有人讚，做錯少少野就比成班人圍攻，平時食野傾計唔會預埋佢，仲會專登講 D 難聽既針對說話去令人感到難堪。呢 D 咁幼稚既行為，我仲以為只有小學生會做，原來大人大姐出黎做事都係咁，真係唔成熟。

其實一直都只有一位同事會做埋哂 d 咁無聊既野去證明佢既存在感同埋重要性，而其他同事就唔一定會比佢拉攏到，不過都會因為箭靶既個別工作失誤而被同事們怪責多左。最近同事們相處融洽，箭靶呢個角色懸空左一段時間。不過愛出位既同事係唔會忍受到平靜既工作氣氛，終於因為卒數同埋少少私人磨擦既問題，我成為左佢今期既「箭靶」。呢單野都幾好笑，我話哂都係佢地亞頭，其他同事都唔敢埋佢堆同我玩作對，所以呢排只有佢自己一個響度唱獨腳戲。好在我天生對口舌是非既抵抗力極強，可以完全唔理會所有兜口兜面既「冷言冷語」，所以佢都極度無癮。加上其他人都唔參與呢單野，更顯得佢好無聊。

其他人如果有同樣不幸既事發生響你身上，請保持鎮定，一動怒或者反擊就中左人地既圈套勒。

假期

2008-03-07T13:14:00.002+08:00

好耐好耐都冇真真正正放過假，以前就算唔駛返工，去埋外地旅行都好，我個腦都係不停諗工作既野，即係自己唔放自己假。

呢幾個月，工照返，不過心情就好似放假一樣。唔好話放左工，連返緊工都唔多想諗公司既野，一反我多年既常態。可能橡筋拉得太「行」所以拉斷了，我想重拾心情，不過事與願違。我諗我真係需要一個悠長假期，等我重新思考一下自己既定位。好有可能響我思考完畢既時候，就係我同呢份工講拜拜既時候。

行運一條龍

2008-03-05T11:56:00.005+08:00

運氣呢回事，真係唔到係唔信。

踏入08年，公司既發展即時呆滯，一月同二月既生意谷極都冇起色，老細既面色當然好黑啦。生意唔好只好怪我地做管理既冇料到或者失職，千其唔好賴運滯。不過響呢個星期，幾間供應商同時大幅加價、又有同事辭職、有好幾間合作伙伴都表明想同我地終止合作，一次過發生咁多事，都幾行運。

而家同事們 (包括我) 都好唔想見到老細，因為佢呢排心情太差，不但口黑面黑，仲多左好多無理要求，係大家都冇辦法做到既要求。其實要老細唔黑面，只有一招，就係突然爆數…

討厭返工

2008-03-02T14:35:00.002+08:00

可能有好多人都試過，不過我好少會有咁既諗法，就係討厭返工。

最近同老細既磨擦越黎越多，事無大小都有火藥味，令到工作氣氛急轉直下。一向視工作為樂趣既我，都有討厭返工既諗法。我都以行動實踐左，就係放多左病假。我公司放病假唔單止冇 medical claim，仲要扣人工。響 d 咁惡劣既條件底下，我都選擇放病假，我好肯定我真係幾討厭而家既工作環境。

而家仲考慮緊聽日返唔返工，因為星期一既例會已經變成毫無意義…

新一年

2008-02-17T14:50:00.002+08:00

原來已經有個幾月冇寫 blog 了，呢排過份忙於私事，莫講話寫 blog，連正事都幾乎荒廢了，哈哈…

新一年有好多新事情，包括我既親密戰友有喜了，為左分擔工作，公司請左新同事幫手。新同事幫唔幫到手都仲係未知之數，只知佢響公司內既人事關係攪得極差，所有同事都唔鐘意佢，都幾犀利！哈哈哈！

新一年大家有咩願望呢？無論大家有咩願望都好，都祝大家心想事成啦！

時間管理

2008-01-09T12:43:00.000+08:00

菲菲對時間非常敏感。因為每天既工作都非常多，非常密集，必須於限定時間內完成好多野，所以我對時間 (連同工作效率) 都極為敏感。好處係老細好喜愛，唔好處係我既下屬好大壓力。我已經唔比太多野尖沙咀果邊既行政同事做，不過唔知點解佢都係慢吞吞咁，永遠 meet 唔到死線。有時我忍唔住都冇辦法去催下佢，不過我都唔想催得佢太多，因為唔想令佢有太大壓迫感。昨日同老細開足一日會，有好多野要跟，我只係比左一樣野佢 follow，其他我做哂，點知我做左好幾個 task 之後，佢果一千零一個 task 都未做完，頂！有冇慢成咁？

我地工時比較長，每天正式十粒鐘，有時會唔止。但係長工時不等於工作輕鬆，因為工作量真係勁多，我地呢 d 中小企個個都要一腳踢，時間稍為捉得不緊，好多野都會有骨牌效應。本來請個同事返黎係幫手既，點知我仲要花多 d 時間去跟佢既進度，唉… 不過冇辦法啦，要培養一個人才，係要比多 d 耐性的，當係工作中既另一種訓練啦。

歸位

2008-01-09T12:24:00.000+08:00

搬屋既事攪左成個月，加埋病到得返半條人命，本來想休息下的。但係工作既野已經堆積如山，今日終於必須面對現實，要正正式式咁回歸工作了。

一月份過左一星期，條數偏軟，係時間開波卒定數，如果唔係會冇肥年過。昨日頂唔住走左去睇西醫，食左藥個人有 d wing wing 地，對住部電腦都集中唔到精神，於是打左個電話去尖沙咀度問下數。一問之下，成個醒哂！醒哂既原因唔係因為條數，而係班女既工作態度。

班美容師有客唔願 call，d 客黎到又唔出力 sell 單，又話 d 客冇錢，又話 d 客開左太多 course。個行政同事叫佢地落力 d，班女竟然叫個行政同事幫佢地 sell 埋單。頂！聽到我火都黎，有冇攪錯呀？美容師既責任除左做 facial 之外就必須要 sell 單，有乜理由人地走黎 remind 你做返你應該要做既野就叫人地做埋你果份？公司冇糧出比你咩？唔通有老細會願意出糧比你返黎 hea？

個行政同事道行又未夠，竟然同班女講自己冇佣分所以唔會幫佢地。呢個根本唔係 main point，各人有各人既職務，行政就應該做返行政既野，銷售既就要跑數，呢個係公司既基本架構。太多不長進既銷售人員成日會將失敗歸咎於客人，其實問題本身就在銷售人員本身不願負起責任。如果其他同事都做埋銷售，咁成間公司既運作豈不會亂哂？

今日我拍檔會去尖沙咀度洗太平地，星期五到我去。再係咁既工作態度，真係要過年換血了。如果唔係點跑 150% 呀？

可惡的熱水爐

2008-01-04T15:30:00.000+08:00

新居係一座舊樓，舊到係連煤氣都冇既。浴室係用石油氣熱水爐，咁大個女都係第一次用石油氣熱水爐，都幾新鮮！

過年前個熱水爐壞左，師傅睇完話要換爐，但係要到 1月2日先至同我換，所有響未有新爐用之前又要過返原始生活，就係要煲水沖涼。最大鑊係我剛剛駁左一頭長髮，必須每朝洗頭先至攪得掂，於是又捱左幾日響寒冷天氣警告下用凍水洗頭，認真透心涼！

點知故事仲有下文，個新熱水爐昨晚又唔多聽駛，出完一輪勁熱既水之後出冰水，有冇攪錯？新爐再加新換既石油氣都唔掂？睇黎同個熱水爐搏鬥仲慘過老細加 50% 銷售目標。

天氣太冷

2008-01-04T15:16:00.000+08:00

我個拍檔連續病左 2日，今日返工見佢把聲仲好沙，好明顯仲未病好。今日，我似乎開始病了，有幾聲咳仲有少少精神不振。可能天氣太冷、可能唔夠訓、可能工作太忙、亦都可能係上月既追數後遺症，點都好啦，今晚都要早 d 訓，希望可以快 d 好返。

剛才 check email，先至發現原來前度男友響 24 號 send 左個 email 比我。內容都係 d 婉惜既說話，睇完有少少咁多感慨，始終 8年唔係一段短時間，不過既然已經決定左，而家講咩都冇用。只係希望儘快可以解決埋 d 手尾，咁就可以完滿結束，唔想再有任何事要我繼續同佢聯絡，大家都需要時間去適應新生活，再拖落去對大家都冇好處。

加碼

2008-01-03T14:27:00.000+08:00

今日開大會，要回顧 07年業績同埋宣佈 08年既銷售目標。本來老細已經決定左要大展拳腳，08年既銷售目標要加 37.5%，昨日埋門一腳，老細決定要加碼，最新升幅係 50%！

雖然我唔駛跑數，不過要諗方法令到班女跑到數，都幾大挑戰。唔緊要，有挑戰先至好玩，如果做黎做去都係差唔多既野，我好快就會想轉環境。

講返今日既大會，同事們知道 08年既銷售目標勁升，有少少愣然。不過佢地既反應比我預期中輕微，可能佢地已經習慣左呢間公司既文化，就係目標會一加再加，所以已經冇咩好大既反應。記得 07年頭公佈銷售目標時，同事們既反應好激烈，不過一年過後，佢地都已經習慣破紀錄既文化，我諗呢一樣係我 07年比到公司最大既貢獻。

由初出茅廬至現在，破紀錄係我既工作精神，而家可以將呢種精神帶比同事，當中既滿足感真係好大。跑左咁多年數，見慣起起跌跌。其實數多數少有時真係唔係問題，今個月唔夠數，下個月跑返未一樣。最重要係夠堅持，堅持到最後就一定可以突破，12月既數係全年最好數既一個月，又一次印證左夠堅持係會達成目標的。

08年一開始抖左幾日，又要再戰江湖，因為 1月要跑埋 2月條數，黎緊既二十幾日，就會決定我有冇肥年過了。希望孤寒既老細會比返少少花紅或者加我人工啦。

08 展望

2007-12-27T18:34:00.001+08:00

仲有一星期就係 08年，出年既銷售目標比今年多出 37.5%，即係出年要比今年更出力先至 meet 到 sales target。至於 07年既達標率，拉上補下都只有八成，即係下年要開多幾副 turbo 先至做到老細既目標。

跑左咁多年數，銷售目標一年比一年高都係平常事，不過一加就加三十幾個巴仙又真係狼左 d。老細有大展拳腳既抱負，今年會投資一筆錢去裝修尖沙咀舖，所以尖沙咀既目標定得非常之高，高到有 d 嚇人。都係果句，打工既只有照老細吩咐做，佢話幾多未幾多 lor。而家要改一改 08年既 action plan，如果唔係37.5%都幾牙煙。

轉變

2007-12-27T18:13:00.001+08:00

隨著新生活既開始，生活習慣都有所轉變。

搬左出市區住，好明顯可以訓晏 d，而家每日都可以遲一個鐘起身，不知幾爽。不過另一個轉變係，住響市區，自不然可以肆無忌憚咁玩夜左，實際上係有機會訓少左既。

最奇怪既係，飲食習慣都改變了。食飯時間相對定時，仲不經不覺戒埋甜品，比起住元朗時有規律好多哩。雖然有時一個人響屋企時都會悶，不過我相信呢個都係適應期，遲 d 應該會適應到既。

唔知係唔係心情輕鬆左，工作上既壓力都好似比較易處理，成個生活環境都比以前愉快。其實工作中出現既問題冇少到，反而到年結仲有數要追，不過心情輕鬆確係對解決問題有正面幫助。

回顧過去在元朗的日子，真係想鬧自己，點解唔早 d 搬出黎呢？要堅持，都應該選擇值得既事去堅持嘛。

佳節

2007-12-21T18:37:00.000+08:00

十二月，又係派對狂歡既節日。今年回復單身，節日都只會同家人過，反而覺得比以往更開心。

與前男友的「浪漫」日子過得太少，連我生日都不會興祝，又點會興祝耶穌生日呢？今年雖然唔會食咩聖誕大餐，亦都唔會去睇燈飾，不過會同家人共渡一整天，已經係一個最好既興祝活動了。

大屋搬細屋

2007-12-21T11:34:00.000+08:00

由於搬出黎都係自己一個人住，所以響搵地方時都唔會搵好大間，最後搵左一間響我心目中係「細屋」既單位。因為我覺得間屋細，所以同亞媽講我屋仔細細擺唔到好多野，唔駛比大型傢俱我。

昨晚亞媽同細佬黎我新居度尺諗下比咩傢俱我，我亞媽話︰「呢間屋一家四口都夠住啦，唔細呀！」。可能以前住開個單位比呢間大，同埋元朗既空間感比較強，所以我一直覺得呢間500呎既單位真係「細」。而家一個人住，理論上500呎都應該OK既，不過我對自己有要求，希望呢度只係過渡，遲 d 可以換返個大 d 既單位啦。

屋企仲係未有電視同埋上網，生活好原始呀！哈哈！

大事件完結篇 - 新生活開始

2007-12-17T16:43:00.001+08:00

纏繞左我好幾個月既大事件終於告一段落，而家要忘記過去過新生活。

雖然仲要適應新生活帶黎既衝擊，不過呢個係我既選擇，點都會適應到既。

而家返工方便左，不過生活既「必需」品仲未齊全，生活上反而簡樸左。原來冇網上同埋冇電視睇既生活真係幾悶下。今個星期要儘快攪掂！

好久不見

2007-12-07T17:46:00.000+08:00

最近公私兩忙，連睡覺既時間都唔夠，昨日終於病到了。

踏入旺季，工作上有好多野都要加倍，連 sales target 都要加倍，真係做到得返半條人命。而家最緊要係跑掂 12 月份條數，最後衝刺希望有年尾花紅。呢排會少左寫博，過多一排就可以寫返密 d。

又沉澱中

2007-11-24T22:00:00.000+08:00

頭先自己占左塔羅，有重大挑戰等緊我，我又需要沉澱一下…

沒有膠袋

2007-11-24T20:16:00.000+08:00

屋企樓下只有一間福佳超市，自從呢間機構忽然環保之後，我就要放棄響超市不顧一切地掃貸既習慣。

菲菲係好支持環保的，亦都贊成福佳或者其他零售業減少派發膠袋，不過就唔多同意售價冇下調空間既講法。超市慳返不少膠袋既成本，冇理由冇減價空間掛？呢 d 大話都呃到人既？唔好用「環保」黎美化自己想增加利潤既行為啦。其實唔派膠袋本身唔係問題，因為我買野盡量都唔用膠袋，不過如果顧客希望有膠袋時就要人捐錢就唔多妥勒。

首先，福佳而家應顧客要求而提供既膠袋，同以往印哂福佳 logo 果種大有分別，可承受既重量一定唔夠有 logo 果種好。即係作為顧客，我已經得唔到以前應有既服務 (可以承受重量既膠袋)，而且為左得到次一級既服務 (薄如蟬翼既膠袋) 竟然要強迫做「善事」，呢種商業邏輯都幾弔詭。先唔理佢收左 d 錢會點推動環保，既然福佳想扮「負責任企業」，請佢將件事包裝得深入 d 丫。做生意既個個都想增加利潤，不過以環保作掩飾就令人反感。

備戰

2007-11-24T19:25:00.000+08:00

踏入旺季，為左年尾有機會出下花紅，自不然工作方面都比多幾錢肉緊。經過一星期既舖排之後，己經為一連串既密集攻擊響起戰鼓。美容展過後，我地入左新機同埋新產品，諗住雙管齊下攻陷客戶既錢包同信用卡，響聖誕新年呢 d 消費高峰期又破下紀錄，咁就有肥年過勒。

響昨日既最後拍板會議中，我同我既拍檔以極速 plan 哂所有新項目既定價、處理流程、訓練內容、推廣內容同埋時間表、客人既 objection handling、美容師既拆賬、銷售目標同埋 side products。攪掂哂呢堆野之後，今日又極速完成左上星期積壓既 paper work，一時之間，我都忍唔住要寫個服字比自己，哈哈~~~

隨遇而安

2007-11-24T18:53:00.000+08:00

做銷售既人，習慣創造條件去達成目標，所以做左老銷咁耐既菲菲，其實都好抗拒「隨遇而安」既心態。呢排自己腦震盪左好多野，令我體會到隨遇而安都有好既一面。

商業活動少不免互相計算，呢個思想以經深植於我既潛意識，演變到所有事都計算一下利害衝突同埋前因後果。當有非理性既事情出現時，往往會當哂機，唔知點比反應。上天正好要比個考驗我，整左單完全非理性既 case 比我 handle，當左成個星期機之後都係諗唔到有咩處理方法，最後決定投降，唔諗住，等自己沉澱同發現。原來，我要處理非理性問題，隨遇而安反而係最好既處理方法。

早幾個月已經發現自己既感性天線失靈，可能個天仲睇住我，所以比左一個試煉我。我仲需要時間去適應理性與感性之間既互動，果然係一堂好有意義既課。

唔知呢篇野講咩唔緊要，我只不過係舒緩下自己既情緒姐。

出現片刻

2007-11-24T00:21:00.000+08:00

上星期係美容業一年一度既大型展覽會，去左 2 日，行到腳痺，今個星期仲同好多間供應商傾合作事宜，加上一星期返三晚學，一直超忙，荒廢左個博，請大家多多包涵！

十一月響極高密度既時間表下渡過，唔經唔覺又到左追 target 既時候，所以呢幾日都可能會寫少左博，過埋旺季就可以輕鬆下勒。(旺季會持續到農曆新年…)

除左忙於工作同埋學習之外，仲忙於友儕間既活動，生活既多姿多采真係一時無兩，差 d 頂唔住。

本來想寫多幾句，不過仲有功課未做，所以只係響度打返個招呼，希望下星期可以抽到少少時間寫下近排既心聲。

工作效率

2007-11-15T00:45:00.000+08:00

工作效率原來同學習能力係掛鈎的。如果你既學習能力強，工作能力就自己強。

已經請到人幫我手，呢個月我都會幫佢適應新既工作環境。第一日，我教左佢做 daily reports，呢 d routine 野，一般我 15 分鐘之內攪掂。我唔 expect 新同事可以響 15 分鐘內完成，但係我估唔到，佢竟然響我既提點下都要做一日先至勉強攪得掂。第二日，佢竟然從新再問我一次 d 野點做，都唔緊要，再教多次。第三日… 都仲係問緊相同既問題，以我咁急燥既人黎講，已經發揮左最大既 EQ，再教多佢一次。

希望，佢唔會問我第四次。

再係咁落去，佢幾時先至 pick up 得哂佢既 duty list 入面既野？

NLP

2007-11-15T00:22:00.000+08:00

近年多左人認識 NLP，連靚女主播張慧慈都教 NLP，我雖然未上 practioner，不過對 NLP 都有少少認知。

NLP 入面有好多涉及催眠既部份。每個人都識「催眠」，對象往往係自己。舉個例，如果你成日將「困難」呢個字掛響口邊，你自不然潛意識地認為好多事都係困難，導致面對挑戰時不敢舉步向前或採取行動。又例如，你成日講「我驚比人笑」、「我驚比人鬧」之類既說話，都會影響自己做事船頭驚鬼船尾驚賊。又或者你同自己講「我唔知點做」，你就真係唔會諗解決方法，只會用「唔知點做」黎掩飾過去。以上種種，都係自我催眠既最普遍例證。

仲有更深入既，例如你成日批評別人，你就會吸引人地更用力地批評你。如果你習慣欣賞別人既，其他人都好自然會識英雄重英雄，令你更受別人欣賞。簡單 d 講，你想人地點對你，你就要點對人。世事就係咁奇妙，施予既同時，就係收獲既時候。

最近有同事常常抱怨事事不如意，工作感情都唔理想，終日皺埋眉頭。老老實實，如果你新認識一個成日皺眉頭既人，你都會有好大既意欲去接觸佢啦，更何況發展感情？唔好妄想啦。想受人歡迎都要識得令人感覺舒服先得 ga，埋怨係唔會增加收視率的。有部份女性「朋友」，佢地好唔妥我，因為我成日都係眾人既焦點，間接令到佢地受人冷落。焦點呢樣野，唔係你想做就做既，都要有人肯黎「圍」你先至有得做 ga，呢 d 野冇得迫，只會越迫越有反效果姐。回頭是岸呀！

學黎做乜？

2007-11-14T00:44:00.000+08:00

學習似乎已經成為我生活既一部份，不斷地學習除左可以增加知識之外，仲可以豐富我既心靈。

最近開始學八字，同事知道之後，其中一位問我點解要學。其實我都唔係好知點解，只係覺得呢門學問日常生活會用到，兼且都幾 match 我鍾意研究性格學既取向，所以就走左去學勒。同事又再問︰「你想做麥玲玲呀？」呢下就真係幾 R 頭，學下唔等於要用黎搵食掛？其實我不斷去學唔同既野，只係想擴闊一下自己既視野，從來冇諗過學左既野要黎搵食，哈哈~~

今晚返左屋企，忍唔住搵下自己有咩學左又有 CERT 既，原來都有好幾瓣，如果全部都變哂做搵食工具，都幾和味！

男人的尊嚴

2007-11-07T23:07:00.000+08:00

我老細對八字都略有研究，成日響我面前講一大堆我唔明既八字術語。上個月起我開始上八字班，跟既果位老師我老細都認識。老細似乎唔多 like 我跟其他人學八字都唔去請教佢，成日有意無意之間話我學 d 野太膚淺。我只不過係上左一個月課，學既野就當然係皮毛啦，如果我學一個月都叻過你，你仲驚啦。

話分 2 頭，老師又唔鍾意我老細成日識少少扮代表，話佢論八字太狹隘，唔夠全面，仲話我學多幾個月都可以叻過我老細。

原來男人要維護自己既尊嚴，都可以好多「方式」的。

物極必反

2007-11-07T22:43:00.000+08:00

響持續既高壓工作環境底下，我終於有反應勒。今日好明顯係 hea 住等放工，因為當工作堆積太多而引致無法即時處理時，我就當機了。我部電腦真係好拍檔，陪我一齊當機，等我有機會休息下。

而家我淨係諗緊月尾點去玩，雖然冇請大假，但係一個短途旅程都叫做聊勝於無啦。

大事件衝擊篇

2007-11-07T00:20:00.000+08:00

Bubie︰

我諗，我要 set 返個死線比呢件大事件，我唔想再拖了，好累。不過呢個死線唔會響今年，希望 08 年中可以得以解決。

其實，呢單野真係幾煩的。

挑戰極限第一回

2007-11-06T23:43:00.000+08:00

唔經唔覺，又到左十一月。由十月至農曆新年前我都係非常之忙，今晚有少少興緻又寫下野先。不過呢篇博打得比較辛苦，因為我貪靚之過，整左水晶甲，打字都要就住就住。

呢個星期我既 partner 有家事返唔到工，幫開我手既同事又 resign 左，迫於無奈我要身兼三職 (嚴格黎講係 4 職，因為老板娘突然潛水，無啦啦交返老尖既管轄權出黎)，做到就黎精神分裂。咁都仲未夠，逢星期一晚仲走去上八字班，除左要背一大堆口訣之外，d 功課都唔野少，呢鑊真係杰。去上堂除左想學八字之外，仲想比自己叉下電。做 training 做得多，個腦會 dry 的，如果想多 d 腦震盪同埋令自己既 training 仲有貨賣，多 d 上唔同既堂係有妙不可言既功效的。我好享受上堂既過程，純吸收零輸出既感覺好令人振奮！而上堂仲有一個 side effect，就係見多左男人。哈哈哈！美容院係全女班，想搵個男人望下都冇，公司入面唯一既一個男人 (我老細) 我又唔想成日見到佢，所以都係搵 d 堂上下見多 d 人，刺激一下自己既視覺神經先。

呢個月我長駐尖沙咀，因為老板娘突然唔返工同埋幫我手既同事 resign 左之後，老尖就變左無主孤魂。好在新同事星期五返工，希望佢會做得長啦，再 train 過一個幫到我手既人真係好疲累。話時話，老細昨日話我要求太高，令到同事有壓力云云。你估我想比壓力同事咩？只要公司冇數時唔好走黎轟我，我就絕對唔會比壓力同事的。老細既名言係︰「我只係想要生意，唔想 d 同事太辛苦。」。聽完之後真係想遁入空門，恕我慧根有限，仲未參透大師既禪機。如果公司要生意，但係同事又唔辛苦，咁 d 生意點黎呢？唔辛苦又邊得世間財呢？ R 哂頭…

唔知係我主觀定係我有義氣，呢大半個月，公司入面最辛苦果個應該係我。

考核

2007-10-25T22:38:00.000+08:00

唔知除左專業人士之外，仲有冇打工仔響工作既地方需要考試呢？

為左達到評估各美容師對公司既服務既認識同埋客戶處理方面既能力，今日公司舉行左一次大型既考試。2 間分店既同事們全部都要考 2 粒鐘既筆試，大家為左今日既考試都好努力咁溫書。其實呢個考試除左係要黎評估下佢地既能力之外，仲係佢地明年加人工既指標。簡單 d 講，考得好既就會有人工加，考得唔好既就冇得加。以呢個方式去決定加人工與否，響某程度上係免卻左部份冇人工加既同事認為公司唔公平。每到加人工時候，總不能人人平等，有能力既同事有得加，未達公司要求既同事當然係冇得加啦。如果冇左呢個考試，冇人工加既同事就會一口咬定公司處事不公。

當然，冇得加人工既同事當然唔會認同自己能力不如人，只會認為公司既考試制度係多舊魚。唔緊要，你入得黎呢間公司就要玩呢間公司既遊戲，唔鍾意既可以去其他公司度做。

雖然我地係細公司，不過響好多方面既處理手法比好多「大」公司都嚴謹同有系統。因為女人多就是非多，唔用嚴謹既系統係唔可能處理得哂咁多雞毛蒜皮既問題。好多時美容師因一己私利而影響其他同事既，一律公事公辦。久而久之，做得耐果班同事仲會幫手做埋糾察隊，協助維持秩序，因為佢地有 ground 可以跟，知道如何去訖理某 d「公平」問題。

其實呢個考試，曼辛苦果個係我。因為我要出卷、改卷同埋寫報告。如果呢度有教師朋友就知咩一回事。

人造美麗

2007-10-24T23:51:00.000+08:00

做美容行業既，自不然係靚女雲集，就算先天條件不足，都必定會後天培養。

化妝 set 頭呢 d 基本功不在話下，整下水晶甲都已經係初級玩意，因為公司內都有好多同事已經整左。

近來我發現有部份同事忽然靚左好多，雖然佢地冇去整容，不過都用左好多方法去改變自己既外形。

有同事突然「發育」，原來係矯形內衣既功勞。
有同事既頭髮只係及肩，第二日就突然變左一位長曲髮美女，原來去左駁髮。
有同事雙眼突然變大左，原來係戴左黑框隱形眼鏡。
有同事睫毛好似洋娃娃，原來去左植睫毛。

同事們話我天天化妝唔夠 natural，我相信畫皮比起以上各項，都叫做係最 natural 既扮靚方式掛。

又事實證明，世上沒有醜女人，只有懶女人。

我諗，我要勤力返少少勒…

笨蛋

2007-10-24T01:42:00.000+08:00

唔識炒股同埋拒絕涉足金融市場既菲菲，時常比有炒開股票既同事笑我笨，有快錢都唔識搵。

我真係好笨的，我只係識用自己既力量賺錢，到而家都唔明點解同事次次炒股都有微蝕都要繼續炒，唔通佢堅信「響邊度趺低就要響邊度爬返起身」既正極思維？就算係，都應該做返少少賽後檢討先至再落場掛？今日有同事又興緻勃勃咁講炒邊隻股，跟住我問果間公司係做咩行業佢都唔知。唔係掛？話哂拎去炒股果 D 都係真金白銀丫，連自己買果間公司做咩生意都唔知就走去買？股瘋了…

63%

2007-10-24T01:16:00.000+08:00

今日同公司既會計師開完會，佢已經準備好 audit 既所有工作，一睇之下，最刺激既係，今個財政年度既業績比上一個財政年度上升左 63%！一個令我極極極度鼓舞既數字，我冇枉費老細對我既信任。我以行動證明左我份人工係超哂值的。唔知我加人工時有冇 63%既升幅呢？哈哈哈哈~~~

今年，我要更上一層樓的話，要再加倍努力了。因為 UTD 既升幅 (我都係粗略估計)，只係剛過既財政年度既 1.45 倍左右，要破呢個升幅既紀錄，仲要再開行 D 副 engine 先得。

大事件反思篇

2007-10-24T00:59:00.000+08:00

有件神秘大事件已經纏繞左我好一段日子，呢件事暫時係唔會解決的。

今晚同妹妹血拚兼食飯，大出血之後邊食飯邊同妹妹傾下我單大事件 (亞妹，我知你有睇呢度既，今晚我同你傾果單野就係神秘大事件勒。哈哈~ 連你都唔知哩~)，佢既角度令我對呢件事有另一個睇法。

橫掂呢單野都唔係可以即時解決既，我唯有再詳細 d 考慮下各方既觀點啦。

多謝你既意見！

眼淚

2007-10-18T00:46:00.000+08:00

可能我響公司既訓練要求高同埋訓練手法都幾魔鬼，幾乎所有同事都因為上 training 時未能達到要求而忍唔住會喊。今日又有一位同事上 training 時落淚。呢 d 場面實在見得太多，而家見到同事喊已經冇感覺，只係比左 5 分鐘同事平復心情之後繼續訓練。

以前 sell 客，d 客拒絕你既理由黎黎去去都係果幾味。初出道時唔識處理就會比 d 例牌 objection 嚇窒，不過累積多左經驗同埋聽黎聽去都係果幾款 objection 之後，自不然響處理客人既路障方面既心理障礙會慢慢減少，到最後係已經預計好哂 d 客會彈咩藉口同埋諗哂處理辦法。久而久之就煉成金剛不壞之身，無論客人出咩招都有得拆，同埋都可以達成交易，仲要係個客笑住比錢果隻。

而家做訓練都係一樣，d 同事都會比好多「障礙」我，喊係其中一招。最初我見同事比我迫到喊，我都會留一留手，但係慢慢發覺眼淚只不過係佢地既絕招，目的就係要令我停止催谷佢地。而家，我都煉成一副鐵石心腸，同事喊唔單止我唔會收手，仲會對佢地更嚴厲。嚴厲既意思並唔係繼續鬧，而係要佢地知道，喊係改善唔到任何野，只係軟弱同不思進取既表現。

今日訓練同事如何向客人講解美容療程，教左成粒鐘都未改善到聲調既問題，我仲錄埋音比佢自己聽返，佢都聽唔到自己 up 乜。聽完冇耐就喊勒，我只係同佢講︰「如果你喊完之後會講得好 d 既就繼續喊啦，如果唔係就繼續練。你一日練唔好都唔使旨意我地會派大客比你做。練唔練你自己決定。」5分鐘之後果然收哂聲繼續上堂。

表面上我係冇同情心，不過我相信佢遲早會明白的。

Heart

2007-10-14T14:37:00.000+08:00

做野要有 heart，即係 d 咩呢？

故事一

有一間 marketing 公司幫我地聯絡報館雜誌做下採訪寫下鱔稿，老細用呢間公司既目的係想美容院增加知名度同埋 sell 下我地既特色服務。呢間公司第一次幫我地安排採訪既時候，我已經不滿佢地既做野手法。首先佢地唔會 concern 美容院響星期五六日都係最忙的，佢地搵到一間報館肯黎採訪，不過要我星期五安排一間獨立房同埋一名美容師比佢地採訪，響最繁忙時間，美客師忙到連飯都唔得閒食，好多唔係 VIP 既客都冇獨立房用，你叫我點即時安排？當時我都要求佢地為我地設想一下，就算做採訪都唔「一定」要星期五的，而且佢地亦都冇一個 strategic plan 比我地，冇認真消化我地比佢既資料，只係某報館想報導咩 topic，就硬銷我地去配合報館。甚至有 d service 我地冇做既，都叫我地比報館黎採訪，有冇攪錯呀？有冇腦的？

我地假假地都係客，你收得我錢就要將我地既 benefit 擺響第一位，而唔係要我地遷就報館，呢 d 行為簡直係 bull shit。第一次既採訪響不愉快既氣氛之下進行，登出黎既效果都係強差人意，似係反宣傳多 d。見到 d 咁既採訪稿，我即時炮轟左間 marketing 公司，佢地話報館點登佢地控制唔到，不過會補償返比我地，老細先至冇咁慶。上星期果間 marketing 公司突然通知我地某雜誌會同我地登返個服務介紹做 compensation，但係果間雜誌社係唔會黎採訪的，因為 marketing 公司會比哂 d 料果間雜誌社云云。最後，我地既所謂 compensation，只係一小角既篇幅，似一個 cheap 廣告多過似一份宣傳稿。

呢單野激到我彈起，又打電話去炮轟一返。對話大致如下 (詳細內容太長，以下只係 main point 節錄)︰

我︰「有冇攪錯呀？今次份「compensation」仲衰過上一次，張相又肉酸又唔比我 approve 就出街，咁既野點見人？」
對方︰「唔關我地事 ga，我比左幾張相佢地揀，呢幅相係 Editor 揀的，唔係我揀的。Editor 揀咩相我控制唔到的。」 (推卸責任！)
我︰「你唔識比幅好 d 既相比人揀咩？點解比相之前唔比我地 approve？」
對方︰「d相都係你地比我地既。」 (又係推卸責任！)
我︰「我比左咁多相你就係比你有得揀，你求其 send d 相比 editor，又唔問我地，呢單野做仲衰過唔做。我地唔收貨呀！」
對方︰「唔係呀，我地未幫你登左個稿 lor，點可以唔收貨呀？」 (賴皮)
我︰「唔係你求其搵份雜誌是但塞幾隻字一幅相入去就叫做做左野 ga。做野要有效果先至為之做到 ga。」
對方︰「而家你即係話有效果先至叫有做野，冇效果就係我地冇做野啦。我地真係幫你登左份稿喎。上面寫哂你公司既資料 ga！」 (又係賴皮)
我︰「做 marketing 係要 do right things 呀！唔係寫左公司資料就叫做宣傳呀！篇野冇重點，張相又唔靚，又唔係 plan 好用邊個 media，下下都失驚無神要我地遷就報館，你地咁既做野方式我認為你地唔 qualify as 一間 marketing firm！」

之後我都費事浪費口水，cup 了線。

對話當中，我多次提出佢地收得我地錢就要同我地做 promotion plan，而唔係當我地係貨物咁，邊間報館想採訪就搵我地做佈景板，之後仲要理直氣壯「踩」我地細公司唔識野。反而我覺得間 marketing 公司只識吹水，完全冇 heart 幫客戶做 marketing planning 既野，同呃飯食冇分別。

故事二

老細為左貪平，搵左一間報價最「靚」既 design house 幫我地設計宣傳單張。當初我極力反對用呢間野，老細話我大花筒，有平既公司唔用反而要用一間貴既。呢間 design house 交貨慢同埋冇 follow up 就係人都知，佢地做出黎既 design 仲要係完全唔 match 我地公司既形象，只係識整 d 大眾小型美容院既街坊口味，完全上唔到大檯，整 cheap 哂公司形象，間接趕走有質素既客，因為客人見到我地 d 咁冇品味既宣傳品，自然會界定我地係冇質素既美容院。大眾既眼光就係咁，你幾有料都好，只要你既宣傳品唔吸引唔高貴，你就唔駛旨意搵到有質素既客。

早幾日，終於收到呢間 design house 交黎既設計，四個字「慘不忍睹」。我冇 call 返佢地，佢地交左貨比我 2 日之後先至識打電話黎。打黎第一句就問 outstanding invoice 幾時 settle，完全唔係應有既客戶服務態度。追完數之後先至問我收唔收到個 design。我冷淡地話個 design 完全唔得，我都唔識點同你講如何去改，因為之前所有 design 都係改黎改去都唔合符我地既要求，你地都係唔需要做勒。對方好似好愕然咁，仲話佢已經睇過哂 d design 先至比我。我打蛇隨棍上話︰「你睇過都係比 d 咁既野我呀？即係你公司根本冇辦法做到我地公司既野啦。既然係咁就唔需要再合作勒。」

佢重申佢地有做野，係我地要求太高云云。大佬呀，比得錢你賺就梗係有要求啦，仲有我既要求真係唔高，起碼有 2 間其他 design house 都做到。人地都係收貴你少少咋，但係我比得條氣順呀。做之前人地會好詳細瞭解我地既動機，交貨唔駛我三催四請，做出黎既 design 只需少許 fine tune 唔駛大執，呢 d 先至係有心做野丫嘛。

呢個故事既重點都係果句︰「Do right things！」

做野唔該有 heart 丫，做野前唔該思考一下你要做果件事有咩 purpose，要達到 d 咩效果先至好做丫。點解咁多人都只係識講︰「我做左野。」？係人返工都做野 ga 啦，問題係你做出黎既野 work 唔 work 丫嘛！做左野但係唔 work 即係浪費人力物力同埋寶貴既時間。做野唔係交功課比人睇，唔係你 OT 十九幾個鍾叫做有心，係你做出黎既野有冇 quality。

真係好討厭做野冇 heart 的人。

輕鬆一下

2007-10-14T14:03:00.000+08:00

呢排寫少左 blog，因為公務超繁加上有少少私務纏身 and then 想比腦筋休息下，所以 blog 都冇乜點寫。今日心情輕鬆，又寫呢排既事先。

Louis 單野就唔駛多講啦，呢舖真係自作自受勒。順便響度奉勸大家一句，無論你幾唔鍾意你份工都好，直至你離開公司果一刻，都唔好過份表露出黎甚至做 d 破壞公司既野。出得黎行就預左要還，今日你以為玩轉舊公司，你永遠唔知聽日既事。你既舊公司一份惡劣既 reference check 已經足夠令你入唔到大公司了。

另外，老板娘效應正在席捲全公司，整個管理層在地震中。不過我地既地震係唔會有人需要離隊的，只係大家互不理采甚至 cup 下老細線之類既小型行為而已。老板娘極力要搶返尖沙咀既管理大權，我地打工既當然係唔會同佢爭啦，嫌仲未夠多野做咩。好勒，老板娘管返老尖之後，所有野包括 petty cash、inventory control、客人既 booking、美容師既紀律等等全部出現問題。老細見到有問題就打電話黎我度叫我攪返掂佢。

為左表示我既不滿，我係冇理佢既。於是佢就大發雷霆轟我。我只係回應左佢一句︰「尖沙咀既同事要負責攪返掂佢。」佢就有少少氣結咁唔出聲。我要佢自己食返個惡果。當初又係佢大大聲聲要我去管尖沙咀既，之後佢老婆唔高興要管返。我實唔同你爭 ga，老細又批准佢老婆重掌政權，到出左事就搵我黎執手尾？以前我會為左博表現義不容辭，而家就要比老細自食其果。如果唔係歷史會不斷重演，我真係冇你咁好氣。有咩事你地兩公婆拆掂先至好 order 我做野。

至於私務方面，呢排 d 桃花好似幾旺盛下，突然多左幾件觀音兵，哈哈！連去上堂都有人同我霸位、買飲品 (有一次仲有一大抽提子)、請食宵夜甚至想送我返屋企 (我住元朗，佢送完我都唔知識唔識返出市區 XD)。雖然佢地好熱烈，不過真係唔好意思，timing 錯了。哈哈~ 不過都好多謝佢地，令我既自信心又多返好多。

但係，上個月已經纏繞住我既「大事件」仲未有解決定案，我仲要為呢件大事件舖排一下。

地球係圓的

2007-10-13T22:37:00.000+08:00

初出茅廬時，媽媽不厭其煩咁叮囑菲菲，地球係圓既，千其唔係胡亂得罪人，今日留一線，他朝好相見。昨日，我印證左亞媽既道理係非常正確的。

昨日正在同個起緊既 database 博鬥之際 (係呀，我連 MIS 果份都撈埋呀，要攪公司個 database 呀陰功，我仲要係一名電腦白痴！)，老細打電話黎問我有冇 check email，我當然唔得閒 check 啦。不過老細叫到就即睇，原來 Louis 而家搵緊工，佢見果間公司既 HR send 左個 email 比我老細做 reference check。老細叫我以 HR Manager (我就黎精神錯亂了，都唔知自己係咩 ger) 既身份去回覆。

我問︰「你想我點寫呀？」
老細諗左一陣之後答︰「梗係有仇報仇啦！」

於是，Louis 既準僱主會收到一份極度劣評既 reference check。老細仲好緊張，要 make sure 對方一定收到先至罷休。

地球真係圓的，昨日比佢玩轉，今日輪到我地。

做生意

2007-10-06T01:22:00.000+08:00

今日同一位做美容儀器生意既朋友飯局，傾開佢盤生意，最近遇到麻煩，所以想搵我傾下。我做美容院嘛，即係佢既客戶群，所以佢都想聽下我既意見，唔多唔少都比到 d 市場資訊佢。不過同佢傾落，原來問題並唔係出於生意既本身，而係老細 (即係我朋友) 既身上。

作為獨資經營既老細，可以掉低盤生意唔理走左去讀書同旅行，之後佢既伙計赻佢唔響度時開左另一間公司做哂佢班客，而家佢既生意只剩下十份之一，跟住問我點算。哈哈哈！有冇攪錯，自己盤生意唔理，比人搶哂 d 客都仲有十份一生意做，快 d 去還神啦。

做生意係要經營的，唔好諗住搵左班伙計返黎就坐定粒六唔理等收錢。如果佢真係咁諗，我估佢都唔係太適合做獨資經營既生意，起碼都要搵返個 partner 做營運掛？老細唔理，伙計見有利可圖就梗係會惹人越軌，比伙計搶哂 d 客都冇得好怨。

可能我道行唔夠，未做到令員工百份百忠誠，所以都唔放心一個唔該行左去唔理所有野等收成。好似美容院咁，是但邊一間分店去少 d 都會影響士氣同生意。始終香港既打工仔有幾多個會當份工係自己生意咁做丫，就算有，好多人都會自立門戶啦，唔係好多人會好似我咁，當左盤生意係自己既不過都唔願做老細。

同朋友傾左一晚，唔知佢會點處理佢而家既境況呢？

Trainer 的神仙旅程

2007-10-04T23:46:00.000+08:00

學習，可以隨時隨地，可以隨心所欲。只要，你仲想學習，何時何地都有教材。

雖然我係公司既 Trainer，公司內只有我教人，係冇人教我的，不過我時常找到學習既素材，尤其是響教人既過程，我都學左好多野。而我所學既野，完全唔係 academic 既野，亦都唔係 soft skills 既野，籠統 d 講，係一種只有自己先至體會到而旁人又一定學唔到既野。

今日上 training，好老實我冇事先準備教 d 咩，只係按一般程序 check 下佢地既進度，之後就即興同佢地上左個幾鐘既 training。上完之後，大家都好 enjoy training 既過程，同埋我好清楚佢地真係學識左某 d 野，而果 d 野係冇 syllabus 可跟的，同埋最重要係對佢地黎講係好有用的。最有趣既係，我響為佢地上 training 之前，對課題本身只係掌握左七八成左右，不過響 training 既過程中，自己自動腦震盪，即時通埋餘下果兩三成，我諗好多 trainer 都經歷過類似既神仙旅程。響教人之前，無論你做幾多準備功夫，你所掌握既都唔係十足十。不過當你同學員 interact 既時候，腦部自然運作，將你未掌握既部份全部迫哂出黎，簡直係思想既高潮。

響呢個過程，我充分感覺到去到咩位要落咩藥，到咩時候要教 d 咩，好有揮灑自如既感覺，好 high！呢 d 野，我唔可以稱之為 skill，不過絕對係我做 trainer 時比我學到既一門絕技。而呢門絕技，唔係教就得的，真係要自己體會過先至會明白。

做我秘書有時都幾執生，因為我一口氣「爆肚」左個幾鐘，仲即席響 whiteboard 度邊諗邊寫埋一大堆筆記，佢要即時抄哂我「飛紙仔」既 notes，仲要幫我打埋，諗落佢都幾陰功。跟我做野既人，有時學野都會好隨時隨地，不過未必有得隨心所欲。哈哈~

故態復萌

2007-09-29T20:01:00.000+08:00

上個月，老細誓神劈願話要改革尖沙咀店，想老板娘既 involvement 淡出。可能佢抵受唔住佢老婆既一哭二鬧三上吊，佢又要比老板娘多 d involve 店務。真係風水佬呃你十年八年，老板娘一返工，店務、客務、行政甚至 petty cash box 全部都亂哂。基本上佢掂過既每一件事都出問題。哈哈哈！

老細又走黎叫我地去多 d 尖沙咀幫手，攪返好佢喎。呢一舖，我采佢都傻。

大事件

2007-09-26T23:30:00.000+08:00

剛剛經歷左一次大事件，但係都未知自己想點，心情需要休假。

有 d 野，真係好複雜。

地理常識

2007-09-20T00:13:00.000+08:00

有批貨我地趕住要，澳洲供應商果邊遲遲未比 invoice 我，於是我地比唔到錢，即係未有貨。追左幾次 email 都唔覆，唯有打電話啦。因為我間店係冇 IDD 服務的，只有尖沙咀店有，於是我叫左尖沙咀果邊既同事幫我打電話去追。

十幾分鐘過後，尖沙咀既同事打電話黎，我地既對話係︰

同事︰澳洲 (雪梨) 而家幾多點？
菲菲︰早香港 2 個鐘。
同事︰乜澳洲唔係早香港一日咩？
菲菲︰唔係勒掛？只係早 2 個鐘之嘛，邊有一日咁多呀！
同事︰唔係喎，澳洲唔係好遠咩？點解只係早 2 個鐘既？
菲菲︰(已經有 d 出煙) 睇時區地圖啦，澳洲只係早香港 2 個鐘，咁張單幾時比我？
同事︰我仲未打電話呀，諗住人地早我地一日丫嘛。

啤~~~~~~~~~~~~~~

而家學校取消左地理科呀？認真救命！

介意

2007-09-18T23:43:00.000+08:00

菲菲真係好小器的，我介意好多好多野，其中一樣最介意係老細對我既工作方式有「意見」。

我唔係橫蠻地唔比老細 comment 我，不過我唔鍾意老細 comment 我既工作方式。我係一個 result oriented 兼高效率既人，你唔好用你既方式去「指導」我做野，盞我攪到 2 頭唔到岸姐。總之你落左柯打同埋死線，而我接柯打時冇意見，即係代表件事一定會準時或者更早完成，當中既程序，請你唔好理我！我點去同人 deal，你最好唔好理我！我點編排時序，你更加唔好理我！

好在，聽日老細不在港，等我抖返啖氣兼 cool down 下 d 抑鬱情緒先。

有件事雖然我成日都做，不過我唔多想再做，就係發老細脾四。

外交

2007-09-18T23:14:00.000+08:00

唔知老細係唔係見我平時鬧班女時好兇狠，就認為我鬧 biz partner都應該一樣咁兇狠呢？

雖然我係一個魔鬼教練，不過我唔係癲的，唔會係又鬧唔係又鬧，只會揀有效果既野黎鬧。老細唔多識教練技巧，只係見到表面就以為鬧係一個好方法，因為好多時我鬧完都有「成果」的。其實都係回返頭先果句帶，「我只會揀有效果既野黎鬧」，所以有一個錯覺就係我鬧完之後所有事都會擺平。(如果事實真係咁筍就發達咯！)

呢排有 d biz partner 做野唔掂，老細叫我打電話去鬧下佢地，可能諗住我把口係開過光的，鬧下又會有好結果。其實菲菲既外交不嬲都好圓滑，莫講話鬧人丫，連用詞同埋語氣都要好注意，原因有幾個︰1. biz partner 唔係你下屬，冇必要比你鬧。2. 要人地將你既 priority 擺高 d，你首先要比人地覺得你擺得佢高 d，at least 要尊重人地。3. 地球係圓的，我唔知將來會發生咩事，都係得罪人少為妙。

今日老細投訴我鬧某 biz partner 太少，我好認真咁諗過呢個問題，我決定唔會鬧呢間公司，基於 2 個原因︰1. 我堅信鬧左都係冇結果，即係浪費口水。2. 我聽日會接見 3 間同類公司，直頭換左個佢，費事勞氣。

生日快樂

2007-09-14T23:35:00.000+08:00

生日願望不多，希望可以全部實現~

花紅

2007-09-14T22:28:00.000+08:00

好多公司如果一年落黎既生意好，都會響年尾分花紅。我公司比較特別，為左推動美容師唔係等到年尾先至追數，會發季度花紅。

今個季度仲有半個月就完勒，有冇花紅分，絕對好睇生意達唔達標。如果分店達標，就全店人都有花紅分，如果唔達就冇。

我店今季份花紅就袋硬，問題係可以再袋多幾多姐。雖然我冇份分季度花紅，不過都好鄧佢地開心。如果佢地下季都分到花紅，我就有機會分到年尾花紅勒。

為左我份花紅，同事們，衝埋佢呀！

每天 $20

2007-09-12T23:44:00.000+08:00

有咩需要你每天花 $20？供保險？ (好似又唔夠) 食飯？搭車？定係其他必要開支？

經菲菲不正式既統計，菲菲平均每天花 $20 響塊面度。即係平均每月花六舊水響買護膚品同埋化妝品上。好在我唔去美容院做 facial，如果唔係條數仲勁。呢個數字，對好多愛美既女士黎講可能太少，但係對於收入不高既女仔，可能已太多。我已經係比少左好多錢了，因為護膚品一概響自己公司度買，因為有員工價！哈哈哈~ 如果唔係，必定每月過千。(註︰菲菲係出左名超孤寒的，要我駛錢好比割左我忽肉出黎)

女人 (尤其係我呢亭仲想風韻猶存既亞毛) 實在太需要花錢花時間同花心思響面容上。唔係女為悅己者容咁簡單，而係不論商業社會定係男人，都係先以貌取人的。先唔講你有幾叻幾勁幾醒幾有內涵幾有愛心，只要你係一件吉列豬扒，起碼有八成既僱主同埋男人都唔會比機會你發揮內在美。

為左飯碗同埋情途著想，每日 $20，絕對係必要開支。

少林寺十八銅人

2007-09-12T23:00:00.000+08:00

星期一，老細話佢老友有 2 隻新產品想批比我地美容院 sell。
星期二，老細拎每樣一件再加各一份既簡短亦不知所謂既「catalogue」比我，要我即度定價、promotion plan 同埋準備產品及銷售訓練。
星期三，經菲菲閉門上網 (仲有 d 係日文，睇死人！) 專注修煉產品特性同埋 check 產品認證之後，攪掂哂成 set 定價、推廣期限及優惠價、宣傳品初稿、同類產品比較、客戶 Q&A 同埋 training material。同場加影，搵左個相類產品既 supplier 上黎公司 present，乘機吸料。
星期四，即係聽日，就要披甲上陣滿懷自信地教同事賣呢 2 隻我只係接觸左 2 日既野。

由零到全部齊哂，只需三日 (嚴格黎講，我只有 2 日時間)。

雖然兼任 product marketing 都係近呢幾年既時間，不過呢幾年，全部都好似以上既情況咁，要極速打哂少林寺十八銅人。承蒙上天眷顧，我做過既 product 都幫老細搵到錢。

不日放影︰仲有 2 隻產品老細都躍躍欲試，不過要試下呢 2 隻既吸水力有幾強先。

探討

2007-09-11T23:48:00.000+08:00

遊走博文，好多博客都論政、論金、講股、評時事。

菲菲既博，完全冇以上既野。只係將生活片段加少少個人感想就整碟揚州炒飯出黎，出唔到大場面。承蒙幾位博友得閒黎睇下留下言，感激不淺！

菲菲唔識玩股票，唔識金融市場，唔知邊個政客有咩政績，亦都唔想講時事。我只想有一個比自己內省既空間，想令自己響唔同既領域進步。其實，大多數係想自己既心靈響煉歷得以提升。

環境如何好如何差，生活都一樣要過。
開心不開心，生活都一樣要過。
有錢冇錢，生活都一樣要過。
有男人冇男人，生活都一樣要過。
甚至去到某一日，有家人冇家人，生活都一樣要過。

問題係，我想過咩生活，同埋想點樣體驗自己既生活。

寫博比左一個好好既內省空間我，睇返一年前寫既野，好開心知道，菲菲長大了。

好快，我又會過生日，今年菲菲長大左幾多？

手勢

2007-09-11T23:08:00.000+08:00

美容師或按摩師要見一份工，有一個指定動作，就係要試手勢。始終美容係一門手勢，唔係話你做左幾多年就一定做得好。今日又有一個好例子。

今日黎見工既係一個做左八年美容行業既人。頭六年係做面部護理，近 2 年係做纖體同按摩。見佢有年資又好似識好多野咁，於是就試左佢多方面既手勢。一試之下，真係有 d 嚇人，做左 6 年 facial 都只係識基本動作，冇變化亦談唔上有技巧。我有部份初級美容師既手勢都好過佢。之後試按摩，又係只得基本動作，穴位同淋巴都識分，點做按摩？之後再試纖體手勢，只可以講句有待改善。同埋每試一樣野都問佢︰「如果我係客，你會比 d 咩建議我？」佢都答唔出。即係佢以前每天既工作就係機械式咁做。不過又唔怪得佢既，好多大美容院既分工都好細，美容師只需跟公司既指定手勢照做就得，開單既野就交返哂比 sales。所以響大公司度做左好耐既美容師，事實上係做又唔係好做得，talk 又完全唔 talk 得的。

手勢呢關合格邊緣，之後再考埋佢 sell 野，果然係完全唔掂。但係佢既叫價就係我既比出黎既一倍，佢仲話之前都搵開咁多。美容業真係咁多水位？可以出咁高既價錢請一個樣樣都半桶水既人既？自問我地公司請佢唔起勒。響中小型美容院度做，看似辛苦，不過我既美容師個個都比佢做得好同識 sell 野，識得自己搵位入客，識得比建議客人，識得一條龍服務，簡稱「全能」。我唔駛請個全能既人返黎，但求佢既手勢 ok 同埋肯學 sell 客，同埋唔好以為自己做過大公司就巴巴閉嫌我地細就已經得勒。見左咁多美容師，我對大公司出品已經不存任何希望了，因為佢地出產既只係一副機器，並唔係美容師。

學校沒有教的事

2007-09-11T22:50:00.001+08:00

星期六才剛返工既學徒，聽日極有可能要面對社會既一個殘酷事實，就係被解僱。佢既命運如何，要等聽日 Annie 返黎之後決定。不過相信佢都凶多吉少。

小妹妹冇做錯事，亦都冇唔聽話，不過佢既性格實在太太太太太被動了。唔識笑，唔識同客打招呼，唔識做野時唔識問人，唔識講說話時有少少抑揚頓挫，唔識接電話，唔識同同事相處… 太多太多了。其他同事都忙於自己既工作，唔係咁多時間可以教佢野。不過佢既工作其實都係 d 手板眼見功夫，只要見到野就做就已經冇問題。同事對學徒既期望不嬲都唔高，只要唔好攪亂檔同埋識得幫頭幫尾就得勒。

呢位妹妹仔雖然都算聽話，不過響商業社會，唔係單憑聽話就可以的。美容行業係服務行業，教過佢要笑，要講說話時唔好太平板，見到客人要打招呼之類既基本野，但係佢完全做唔到。佢把口撬極都唔開，同佢傾計都冇反應，有時想幫佢融入工作都幫唔到。今日有同事走黎問我︰「點解請個啞既返黎既？」。其實佢黎見工時，我都同老細講過呢個妹妹仔好 dry，講野太簡短，唔識表達自己，有少少隱青 feel，不過老細過請唔到人，是但請住一個先啦，咁佢返左工勒。都係我唔好，我應該堅持唔好請佢，咁佢就唔駛返工幾日就要面對被解僱既窘境。

而家好多年青人都慨嘆搵唔到工，其實我仲慨嘆。點解而家既年青人咁冇活力，咁冇能量既？徒具軀殼卻沒有靈魂，你話幾可悲？雖然學校冇課堂係教培養心智、人際關係、溝通等等既知識同技巧，所以而家既新一代會如此…

仲有，今日見左另一個妹妹仔，把口就 be li ba la，不過一睇就知佢神經質。我只不過係想請一個普通既女仔姐，點解咁困難？

盡興

2007-09-11T02:04:00.000+08:00

今日早放工，去左銀狐既 office 旁聽八字初班。去既目的並唔係上堂咁簡單，係因為當中有 2 個學員係我既朋友，我諗住等佢地放學之後去打邊爐。

到十點終於放學勒，我就好似一個大細路咁同成班同學一共七人去食野。打邊爐真係好開心的，唔駛等上菜，唔駛理 manner，鍾意時可以企起身打撈心愛既食物，又可以玩下自己碟乾蒜鼓油，仲攪到人地碟辣椒亂七八糟，將 d 辣椒撩哂出黎排圖案，係極度輕鬆好玩既一種進餐方式。工作太多會令人皮質醇偏高，同朋友食返餐不顧禮儀既飯可以極度減壓，同唱 k 有異曲同工之妙。尤其我同其中三位 (包括銀狐) 實在太老友了，席間多次胡言亂語惹黎哄堂大笑，當中既樂趣非筆墨所能形容。銀狐想挑戰我既記性，好在我響酒過三巡都仲記得某一系列課程既刁鑽問題同埋答案，同佢玩到不亦樂乎，佢返而比我問到唔識答。另一老友見我玩到興起，想同我鬥咀，最後都係比我講羸佢，佢好唔忿氣，我就話︰「我靠把口搵食 ga，咁易比你講羸仲有得撈既？」似係串人，又似打圓場，其實係自誇，都幾抵死！

如果唔係要趕尾班車返屋企，可以玩得仲癲！

而家呢篇 blog 係半醉之下寫既，睇唔明唔緊要，可能到我酒醒時都唔知自己寫乜。哈哈哈~

鬧人

2007-09-10T18:57:00.000+08:00

做左咁多年野，一向都好反對以「鬧」去管理下屬，畢竟每一個人都有自尊心，鬧並唔係一個最有效既管理方式。自從入左美容行業之後，我對「鬧」呢個字有另一種睇法。

原來美容界真係好流行「鬧」呢種管治手法。初時我喜用循循善誘既方式，希望大家響一個友好既氣氛中工作。不過久而久之發現謙謙君子響美容業係企唔住腳的。美容師見你笑容滿面，唔會大聲鬧人，就會認為你講既野係唱歌，聽完就算，完全冇執行既意欲，而且諗住唔做你都吹佢唔漲。後來積壓太耐一時火起，鬧左幾句之後，真係頂班友仔唔順，鬧完之後就好聽話咁做好哂所有野。之後試過幾次都係咁，好聲好氣係冇用既，真係要下下出聲鬧，仲要整個惡形惡相先至有效既。面我就比足哂勒，原來佢地有 D 咁特殊既嗜好，鍾意比人鬧的，我唯有順應民意啦。

有時真係唔怪得 D 上頭惡死的，因為我都係被迫咋~

Coaching

2007-09-10T18:46:00.000+08:00

響平日既工作中，我時常需要用到企業教練既技巧，當中有好多係發問同埋探索問題既藝術。今日同老細食飯，響言談間發現老細都意識到教練式既發問技巧響邊，因為佢開始識得到返轉 coach 左我幾野。哈哈！

好在我都唔係流的，好快我就暗中從說話中搶返發球權，coach 返佢轉頭。旁人就咁聽係聽唔出倪端的，因為 coaching 既發問方式都係地球人會講既野，絕對唔係火星專用文字，不過響邏輯同思維層面上就同一般傾計有分別。Coaching 最基本既發問方式係抽絲剝繭發掘問題重心，老細今日竟然可以好集中咁問一個問題既核心，果然有進步！

響度做野，最開心既係見到身邊既人有進步。以前見同事有進步已經好開心，早排見店長都有進步就更開心。今日見老細都有進步就更加非常開心！間公司既上上下下都朝一個方向行，必勝！

免責聲明

2007-09-09T21:54:00.000+08:00

響網路遊走，見好多博都有免責聲明。

我想好多人寫博既原意係抒發自己既見解或者感覺，到博越來越出名，或博客本身就好出名，響寫博時都要「免責」，唔知係唔係好事呢？

如果有一日，菲菲既博都有刊登「免責聲明」既需要，我想，可能係好事… XD

專業人士

2007-09-09T20:16:00.000+08:00

當年考大學時，基於興趣既關係，本想讀法律或者心理學。因為冇錢去外國升學，唯有寄望港大。但係菲菲成績唔夠驕人，所以 2 瓣都入唔到，入左另一間性質完全唔同既 U 讀 marketing，就係咁我就冇涉足呢 2 個專業領域。當時老爸極力要求菲菲讀會計，但係我連 LCCI Higher 都係勉強合格，對呢科又冇咩興趣，所以完全冇諗過讀呢科。後來妹妹攻讀會計，已經 chartered，都可以叫做完成左老爸既心願掛。

事隔咁多年，我都讀過好多野，不過全部都唔係 academic 的 (丫~ 唔係，我都讀左張營養學既 cert 的~) 。我讀過性格學、NLP、coaching 同埋接受過嚴格既銷售訓練 (包括響工作之內及自行報讀)，呢幾瓣就算有牌可考，都唔係咁多公司會承認你既「能力」。明明自己係有專業的，但係社會唔係普遍認同。我正在等社會蛻變，等 Coaching 普及，咁我既專業就得以認同勒。呢段等待既時間，我會好好磨練自己，以更多既 coaching 經驗去豐富我既人生。

學徒

2007-09-09T19:15:00.000+08:00

為左減輕美容師既「非生產性工作」(即係增加美容師既「生產性工作」)，同埋為公司加添一個比較聽話既員工，我地請左一個學徒。

初初登招騁廣告時，有好多女仔打電話黎應徵。同其他工種一樣，make 左 appointment 又真係有黎見工既人只得兩三成。以前 in 人時會好小心安排時間，仲會響 in 人之前刨下份 CV。不過事實上，好多約好左會黎既 candidate 最終都係冇出現過。而家我唔會再放咁多心機響準備功夫上，只係隨便同個 candidate 約個時間，黎既就見下，唔黎既都唔會影響我既日常工作丫嘛。最近老細問親我有幾多人黎見工我都答唔出，因為我已經唔再相信打黎問工既電話。

響幾位有出現既女仔當中，只有一個唔係「啞」的。其他幾個都係我講多過佢講。問佢點解想入美容行業又答唔出，問佢地有咩優點缺點都答唔出，真係啤一聲。最後，我選左唯一一個有反應既女仔，講好左返工時間同埋日子，到最後都係冇返工既。哈哈哈~ 而家既年青一代就係咁，問你死未！響冇得揀既情況下，又搵左另一個女仔返工。呢個女仔中選既原因好簡單，因為佢既 expected salary 係最低！撗掂個個都揀唔落手，不如揀個最平既，如果佢做得住就加佢少少人工當獎勵，如果佢做唔住都可以將公司既損失減到最低丫。

個女仔有返工，真係有責任感！個女仔 17歲卜卜脆，呢份工係佢中五畢業既第一份工。可能係第一次工作，見佢返工時係戰戰兢兢咁。說話唔敢多講，有野唔識唔敢問，係我同 Annie 發現佢呆企響度等人「打救」先至知佢遇到工作上既問題。我諗我地真係要付出大量既愛心先至可以栽培呢個女仔成為一個幫到手既學徒。佢要成為初級美容師，唔知又需要幾耐呢？

仲有，請左呢個學徒之後，又體會到美容行業既一 d 傳統問題。要入美容行業，唔係讀幾張 cert 或者 dip 就可以入行的。如果有讀過，只係代表對美容行業有基本認知，同正式做客仲有好大段距離。客人真金白銀比左錢出黎，唔會希望有未滿師既學徒掂佢塊面的。所以學徒係冇機會為客人做面部護理。初入職既美容學徒只可以做店內清潔、執床、準備及收拾物品、清潔工具之類既「下欄」工作。直至美容學徒掌握到店務既工作之後，店長先至會慢慢教授實際做客既技巧。呢段時間既長短，就視乎學徒既吸收能力勒。學得快既一年左右滿師，之後就可以接唔醃尖既客人黎做。換句說話，所有美容師響初入行時都做過亞四，都試過比其他同事點到你慌，所以而家有學徒返工，就好自然比班美容師好似報仇咁點到佢暈。

美容界世途險惡呀，所有野都係表面風光咋。妹妹仔，過到呢一關先啦，連少少苦頭都吃唔到既，唔適合佢見人歡笑背人爆粗既「美麗事業」呀。

面對自己

2007-09-09T15:42:00.000+08:00

近幾個月，我嘗試令自己變得感性，但仲未成功。我唔知點解好想變得感性，好想體會某一 d 感覺。不過我仲未放鬆到自己既心靈，每次放鬆到某一階段就回復「理智」，重現理性既狀態。唔知係我既修維太高滅絕左人性，定係道行太低，仲未有力量去面對自己。

失守

2007-09-07T18:03:00.000+08:00

今日又買左對鞋，一時忍唔住手，已經係第五對勒…

雖然仲想買對 boot，不過要嚴重警告自己，最快都要十月先至可以買！

打回原形

2007-09-05T23:15:00.000+08:00

星期六睇左骨醫，稍為移返好既頭骨，呢一兩日有打回原形既跡象。本來諗住月尾先至去睇多次，睇怕我要睇得密 d。骨頭既野，唔可以一朝一夕攪得掂，唯有減省下 d 不必要既開支，留定多 d 錢黎睇醫生啦。

今晚決定早 d ZZZzzz，因為昨晚發左個好夢，今晚竟然想去尋回呢個好夢。哈哈哈~

八月總結

2007-09-04T23:06:00.000+08:00

埋左八月盤數，開心到笑。

八月係美容業既所謂淡季，但係我地公司既生意偏偏升極都仲有。八月份既生意係七月份既 1.6 倍，簡直係再省多次招牌之作。按平均生意額計算，係 06 年既平均生意額既 1.48 倍。呢個數字不單止令我好振奮，仲令同事好振奮，因為佢地今個月全部都係富婆。哈哈哈~

又因為人事調動既關係，薪酬支出都只係上升左 3.2%，其他支出都係維持一般水平，成本控制一流，即係純利高左好多，我都忍唔住要讚下自己。

雖然我唔係老細，不過可以將盤生意玩到咁正斗，我相信已經代入左老細既角色。

談性格

2007-09-04T22:45:00.000+08:00

最近睇緊一本書，係論 94 位女性既性格。一向喜歡研究性格學既我一見書名就諗都唔諗就買左。睇左一半，覺得作者其實對性格學一 d 認識都冇。書中所論既女性大部份都係歷史人物，佢地既性格係點，我當然無從稽考。不過作者響論述各人既性格時，用左大量形容詞同埋成語。例如︰剛烈、乖張、堅忍、傳統性格 (我都唔明咩叫傳統性格)、叛逆 (呢個係主觀形容，完全同客觀分析扯唔上關係)、從夫 (呢個仲唔明)、賢慧之類一大堆。當然要表達含意，就需要用下形容詞啦，不過用得太多同埋太空泛，只覺作者文筆虛浮，言中無物。其中睇左半本書，都只係睇到男性心目中既女性形象，對中立既性格研究完全起唔到啟發既作用。

性格學唔係一個用形容詞堆砌出黎既「學說」，先唔講派別，基本上大多數性格學都有根有據。有部份學說以行為左基礎，有部份以動機作根源，全部都有「因」有「果」，唔係求其塞幾隻形容詞可以討論到。

算啦，我都係當果本書係歷史故事睇好過。

不過睇書既時候，好多時都有同作者交流既感覺。呢位作者，真係交流得好辛苦。因為我好難認同佢既講法。為左練下自己既「堅忍」同埋「寬大」，我會睇哂佢既。

桃花

2007-09-03T22:35:00.000+08:00

好多人都想行桃花運，尤其係女性。

少女菲菲當然都鍾意行下桃花運啦，多人追喎，邊個女仔唔渴望？不過多人追都真係好麻煩的，所以長大左之後，我就唔再恨行桃花運了。自從銀狐鑽研八字之後，就叫我唔駛擔心，我呢世都有桃花，想唔行都唔得… 哈哈哈~ 真係有啼笑皆非既感覺！不過桃花都唔一定係男女關係，受歡迎都係桃花既一種，咁我都安心 d。

好多時一大班朋友出黎玩，我都好快會吸引左一班人響我身邊，當中男士既比率都幾高。呢 d 狀況，往往就令在場既女士對我產生敵意，因為當中有部份單身女士係抱住打獵既心態而黎，但係班獵物黎哂我度，之但係我又唔諗住打獵喎，個場面都幾 funny。

近排菲菲又再度活躍於友儕既活動，次次都成為焦點人物，一黎我終於從古墓中走出來見人，二黎我呢排正能量旺盛，次次聚會都表現得好興奮，自不然會多人圍。副作用即時見效，去左去幾次活動就惹起某 d 女性朋友既不滿，友儕間竟然傳我背住男友搵食既流言，仲有女士叫我早 d 結婚，唔好再攪攪震云云。

聽完唔單止唔嬲，仲有 d 鄧佢可憐。就算我唔出場，都唔等於佢既機會多左喎。男女關係幾時變左做 Zero Sum Game ga？要受人歡迎，開下自己竅先啦。

執著

2007-09-03T22:09:00.000+08:00

星期六去完睇骨醫，就去飲滿月酒。新媽媽係我早 2 年上課程既同學，我地有十幾個學員同埋導師都有去恭喜佢。

因為我剛攪完個頭骨，眼部浮腫，仲有 d 瘀痕 tim (十足十家暴受害者咁樣… XD)，班同學都走黎慰問我。佢地知我搵到個有希望既醫生，大家都好開心，有幾個仲好似開心過我咁… 哈哈哈~ 我地成班人坐埋一圍，但係我都係同旁邊既幾個同學比較傾得埋，成場我地幾個自己響度雞啄唔斷，不亦樂乎。酒席既中途，唔知邊個講返起當時上堂既情況，有好多經典既場面，其中有 D 係同我有關既。不過，我真係好討厭每一次大家聚會都講返 2 年前上堂既事。難得大家 2 年前做過同學，而且仲 keep 住有聯絡，我會想同大家交流近況，而唔係次次都搵返 d 舊聞黎想當年。其中一位導師 Crystal 最惹我不滿，成日話我 draw，連飲緊滿月酒都仲要拎返出黎講。我當時係好嬲的，不過都係果句，菲菲係唔輕易響公眾場合同人有過折的，所以我選擇唔出聲。旁邊既朋友有幾個都知道我唔鍾意佢次次出黎聚會都搵舊聞黎抽我水，見我面色沉沉地，都唔再講落去。

散席時同 2 位住屯門既同學一齊走，上次想車我返屋企既 Joseph 又出動想車埋我，我都婉拒了，費事又出現令佢尷尬既場面。Crystal 本想等我應承 Joseph 時可以搭順風車 (佢都住元朗嘛)，我就係唔比機會佢，寧願同傾得埋既朋友搭西鐵轉多程車都唔比佢跟住我。唔知係佢執著我當時既行為丫？定係我執著佢次次都講返舊時既野出黎當笑話呢？總之我就係好唔鍾意佢。好心佢幾十歲人就睇開 d 啦，過左去既野仲次次拎黎講，你唔悶咩？做人要展望將來呀！