曙光

菲菲自小雙眼患有隱疾，訪尋過不少中西名醫都藥石無靈，連手術都冇得做，亦有西醫斷言我呢世都好唔返，唔惡化已經好好彩。基本上我都放棄左求醫，因為各種中西醫都判哂我死刑，我又唔係醫生，又搵唔到更好既辦法，唯有相信冇得救同埋等「死」。

上星期，媽媽話比我知有個骨醫好掂，佢早 2 年左腳動過手術之後，要每日食止痛藥先至行得，媽媽經朋友介紹睇完果個骨醫之後，竟然可以完全唔駛食止痛藥，仲行得快過以前。見有咁既神醫，我都想去睇下，因為我條尾龍都唔多妥，都諗住去攪攪佢。點知呢位骨醫唔單止幫我攪哂成身既骨頭，仲斷出因為我頭骨生得唔岩位，所以引致屢醫不果既眼疾。佢話我對眼本身應該冇咩大問題，但係因為出世時頭骨生得唔好，所以令眼球、鼻骨、腮骨同埋牙較都縮埋一齊。佢研究左一陣之後話有機會同我攪返正個頭骨，不過要多次覆診先至可能復原。嘩！有機會喎！覆幾多次診都要去啦！

人手矯正頭骨係好痛苦的，因為做既過程真係極痛，不過心想有好轉希望，幾痛都忍忍忍！做完第一次之後，視野確係有少少好轉，連個樣都有少少唔同，好似整容咁… 哈哈哈~ 睇左咁多次醫生，終於有曙光既感覺！不過下次去睇既時候，都係唔搵媽媽一齊去勒，因為唔想佢再經歷心痛既場面。佢見我痛成咁，足足喊左半個鐘，我都唔忍心要媽媽再承受果種愛莫能助同埋自責既壓力。陪我睇左咁多年無謂既醫生，佢承受既痛苦絕對不會少過我。

雖然我冇宗教信仰，不過我都感恩上天比左呢個經歷我。挑戰自己係我既興趣，今次呢個挑戰，唔單止係興趣咁簡單。希望上天仲繼續睇住我，比我過埋呢一關！