自毀前程

昨日先去尖沙咀做左半日訓練，之後返自己店苦戰左半日，終於計好哂全公司既糧，攪掂哂所有 monthly reports，bal 埋 cash book，做埋 stock take (冇計啦，細公司，真係一腳踢的)，仲有時間玩左幾盤 killer sudoku，爽！為左令尖沙咀既 Louis 可以專心做 product sourcing，我連尖沙咀既數都立埋黎做，仲比左十幾個 contact 佢，等佢唔駛周圍搵嘛。今日有 d 空檔就打個電話比 Louis，關心下佢既工作進度，但係真係唔明，數又唔駛佢計 (最煩都係呢樣啦)，訓練又唔駛佢出席，照計佢應該有好多時間完成佢手上僅餘既工作，但係佢既工作都係零進展。每次打親電話比佢，佢都話比我知佢好忙，唔傾咁耐，好快就收線，所以我一直以為老細交托比佢既野已經攪掂。真係匪夷所思，究竟佢忙 d 咩呢？

佢既工作效率，好明顯唔係秘密，因為今日我攪掂左聽日響尖沙咀開會既議題之後 (其實呢樣野本來都係 Louis 做的，不過佢次次都冇做，唯有我做埋啦) ，就打電話比老細匯報一下，老細就同我呻左好耐，全部都係有關佢對 Louis 工作效率既不滿。有時唔可以搵我同佢比的，因為我做野真係快到嚇死人。之不過，佢既工作效率似乎真係太慢勒掛？最難攪，最惡哽既我都做哂，淨返 d 輕鬆工作比佢，都做唔掂，真係有問題哩。

講返少少歷史先，點解會有 Louis 呢個人出現呢？原本係得我一個一腳踢，2 間店既所有非技術性工作都落響我一個人身上，一直都相安無事。錯就錯在今年年頭時有人高薪挖我角，我就貪心地辭職了。走既時候，就請左 Louis 黎頂我個位。之後我既新工發展出現問題，好快我就冇做了。本來想做下獨立自由人，接下 training 或者 coaching 做既，咁自不然都會搵下 d 舊老細睇下有冇機會啦。老細知我冇做之後，就叫我返去幫手，於是我又返黎美容院，繼續做一個打工仔。響呢一件事，我好感激我老細 ga，唔係因為佢請返我咁簡單，而係佢既量度同埋佢真係欣賞我，先至不計前嫌比我回巢。所以我真係好尊重我老細的。

我既強項唔駛講啦，不過缺點就係響工作上好霸道，決定左既事，一定要做到底，遇神殺神，遇佛殺佛。Louis 係一個謙謙君子，老細怕我蝦佢，所以我一返黎時有開宗明義咁講過，大家係平起平坐，不分高低的。於是，我地就一人響間店度做差唔多既野。就係因為尊重老細既一句平起平坐，所以我係唔會干涉 Louis 既工作，免得老細難做。不過日子過去，就算我唔出聲，老細一見我地既工作進度有咁大既差異，少不免都有 d 不滿的。

最近 Louis 既工作表現出奇地差，今日老細仲不停係咁呻，仲鬧鬼佢係 "衰仔" (好似老豆鬧仔咁既？)，好明顯佢既忍耐已經到左頂點。老細仲叫我 mark 低有咩工作係叫左 Louis 做而佢仲未攪掂既，聽日會同佢傾下咁喎。

最弔詭既係，老細講左一句咁既說話︰「聽日開完尖沙咀例會之後，我會同你再開多一個會。不過唔會響尖沙咀開，我會黎你果邊傾。」如果你係我，你會有咩聯想？

Louis 響呢度要有光明既前途，睇怕有 d 難度。