工作範圍

店長 Annie 放大假，響佢放假既日子，我順手兼埋店長果份。大家同一間店，冇分彼此的，反正我又攪得掂，冇所謂啦。

今日係我店開例會既日子，Louis 都會黎的，因為老細頒左令，2 間店開例會，我同 Louis 都必須出席。我出席就梗 ga 啦，因為我要做訓練同卒數丫嘛。之前講過，老細話我同 Louis 係平起平坐的，所以佢都唔可以缺席。

早上 Louis 黎到，未到開會時間，我就 check 緊 email，咁岩有客打電話黎落 booking，我接左電話之後處理左個客既要求，之後 Louis 用好奇怪既眼光望住我。佢問︰「你聽埋電話 ga？即係做埋店長果份？」。當時我覺得好奇怪，接個電話姐，有咩咁出奇？原來佢響尖沙咀係從來都唔接客人既電話的，響佢心目中，呢 d 唔係佢既工作範圍。又幾得意喎，我地細公司，呢 d 手板眼見既工夫，唔駛分階級掛？聽個電話好平常姐，唔一定要某 d 職級既人先至聽得掛？

呢樣野都幾得意，響我心目中，只要我做得到既，而又需要我幫手既，就已經係工作範圍。唔駛白紙黑字寫 Job Duty 咁麻煩，邊寫到咁多丫。我又唔介意幫同事做下 d 跟頭跟尾野，同 d 客斟茶遞水我都照做，做得服務行業既，客人入到黎，佢理得你係經理定係老散丫，總之就係要有人 serve 佢丫嘛。如果個客知道係經理斟茶比佢，佢仲開心呀，虛榮嘛~ XD

講返轉頭，Louis 好介意邊 d 係佢既工作範圍，如果唔係佢工作範圍既野，佢係絕對唔會做的。所以佢見我接個電話都好大驚小怪，響佢心目中，我好霸的，又點會做埋呢 d 野丫。有樣野佢未明，我之所以響度霸得起，除左我真係好惡之外，就係 d 同事服。我唔會老點人做野，仲會幫手做，不過大家做野一定要達標，唔可以得過且過。既然我都可以示範如何做，就更有 power 去服眾。這就是我咁霸既原因。亞媽教落，出黎做野唔好怕蝕底，永遠都係你先付出，才有收獲的。