劊子手

奉老細之命，同 Louis 商討佢 last day 既事。原因係呢 d 粗重野老細係絕對唔會出面的，所以有損形象既野由我一手包辦。理論上佢係要一個月通知先至可以離職既，星期五時佢同我提過，因為佢 20 號要返新工，同埋想響返新工之前離港幾日，所以要提出早 d 離職。既然佢早有預謀要即走，仲戇居到講哂底牌比我知，咁我就冷冷地單刀直入︰「早 d 走都可以既，只要補返代通知金就得勒。」

Louis 一聽到公司要佢賠返代通知金之後，即刻好唔開心，話公司不通情達理。唔係勒掛？而家係你要辭職，仲係因為要返新工而唔能夠比到公司一個月既通知，賠返代通知金都好合理丫。可能佢以為老細平時好似冇咩所謂咁樣，連代通知金都可以唔追掛。不過佢道行真係太淺了，跟左老細七個月都完全唔知老細緊張 d 咩。老細最緊張既就係錢，唔係一般果隻緊張，係最最最緊張果隻。同埋謙謙君子只係佢既外表，老謀深算先至係佢既真身。你日日對住佢都唔知，唔走都唔慌有運行啦。

仲有，佢真係唔清楚我既為人。善良柔弱係我既包裝，心狠手辣、冷血無情、唔係你死就係我亡就係我職場既本能。你都辭職了，我仲需要包裝嗎？更何況老細都唔 like 你既辭職處理方式，我要提升信任度就當然要做少少落井下石既功夫啦。雖然今次係佢主動辭職，不過氣氛就好似我做左劊子手咁。唔好意思，希望你下一個對手會手下留情啦。

當佢知道公司決定左追到上勞工處都一定會追討代通知金之後，就對全公司既人黑哂口面。老細知道之後，就話︰「男人之家咁冇風度既。」咁都仲未算，Louis 之後決定左 last day 係 17 號，即係仲有 2 個星期啦，佢就前所未有咁有效率地將所有 contact 同埋跟既緊既野 past 哂比我，咩都唔做。老細知道後仲興，佢話︰「咁佢呢 2 個星期未白逗人工？」

「咁又唔係既，扣埋佢要補比公司既代通知金，佢今個月只係出 2 日糧。你未當佢幫手看下門口聽下電話 lor。算啦，唔好咁勞氣勒。」做埋人地果份既我反過黎安慰老細，打工真係唔容易… XD

不過呢 d 日子唔會拖好耐的，上星期 post 左 vacancy 之後，今日收到一大堆 CV，聽日約左 5 個見，希望當中有合適既人選啦。