攪清楚

我店既舖係租的，死約仲有三個月就到期，生約又冇明文規定一定要租返比我地 (當年老細仲未有律師幫手睇約，唔識更改呢 d 條文)，呢單野都已經夠頭痕了。屋漏就一定兼逢夜雨的，業主決定賣左間舖佢，令老細更加心驚膽跳，怕要隨時要執包袱走人。好在業主都叫做有返 d 良知，賣盤時講明係要租返比我地先至賣，所以我地暫時都唔駛擔心另覓新舖既問題。

不過新業主認為我地既租金太平宜了，所以響我地死約完左之後，要我地簽新租約，大幅加租百分之五十！好在我地原本既租金真係唔算高，所以加左百分之五十都唔駛死。老細一向最最最緊張錢的，加佢租喎，仲得了既？不過佢又唔想搬舖住，唯有頂硬上啦。之後老細就搵我傾，話加左租之後生意要增加百分之五十云云。好在我都仲清醒，同佢冷靜分析形勢。首先加左租就梗係要博命 d 搵錢啦，不過我地既 target 係 keep 人工加租金響生意額既一半就已經 ok 勒，如果只係加左租，人工或者人手冇加既，又點需要做多百分之五十既生意呀？我計過勒，只係需要做多百分之十就得勒。

之後老細又講︰「但係我個個月既支出都好緊下喎，有乜理由做左十個巴就可以攪得掂呀？我自己份糧都未出呀…」

未聽老細呻完，我就講︰「冷靜 d 先，以我地既經驗，只要營業額達到人工同埋租金既一倍，就有能力做現金儲備嘛。我店既營業額個個月都達標喎，問題絕對唔係出現響呢度。你諗真 d，你定比尖沙咀既所謂 target 只係剛剛夠交租同出糧，佢地仲要從未達標，問題就係出響尖沙咀度，因為果邊蝕錢，所以你要將我店既利潤補貼尖沙咀呀。所以你未有 cash flow 既問題 lor。」

老細好似如夢初醒咁問︰「下？係咩？果邊既成本好高咩？」

我即時計比佢睇，佢先至知實情係點。之後例牌又問︰「咁點解決？」

解決方法未講，先派下定心丸先︰「我店既同事當然要加把勁去跑多十個巴仙啦，不過呢度唔成問題。尖沙咀果邊就要攪返好同事既質素先，而家 Louis 走左，新請既同事又唔需要出咁高人工，打埋條數，你響人工度慳左既錢，岩岩夠你交加左既租金。所以數字上你係唔駛額外駛錢的。」呢招果然有效，老細即時定哂，吁一口氣︰「係喎，駛費冇多到喎，只係人工變左租金之嘛… 嚇得我丫~」

解決方法黎勒︰「好在 Louis 走左，新請既同事係比較 junior 的，雖然決策上佢唔會參與，不過行政同日常運作我唔駛擔心先。因為 Louis 唔鍾意做 admin 既工作，而家請既人既履歷全部都係 admin，起碼呢一 part 你可以放心先。仲有，我會多 d 過尖沙咀，一黎帶住新同事做野，二黎係睇住班女。當我地星期一炒左唔聽話既美容師之後，就會有殺一警百既效果，到時班女唔敢兇返你轉頭，除非佢地都唔想做姐。以前大家都知 Louis 唔聽我支笛，佢地可以趁我行轉背時玩陽奉陰違，而家新同事係 report 比我的，我仲授權佢監察住班女，佢地就唔會有挑戰公司底線既行徑出現勒。如果有，都係照炒唔駛比面，咁佢地就會慢慢知道公司係認真的，留低既就會認真工作，因為唔認真果班一定好快炒哂。只要公司行政果 part 攪好左，我就可以催谷生產力勒。」

好在我即時比老細攪清楚問題既所在，唔係邊間加租就卒邊間，應該係邊間有問題就攪邊間。咁先至玩得命長久的。