年青一代

呢排要請 junior staff，有好多少女黎見工，越見得多，越為而家年青既一代而慨嘆。

好多黎見既女仔都係十幾廿歲既青春少艾，佢地見工時好多都係我講多過佢地講。問左一個問題，都要諗成十秒先至有一個極簡短既回答。響見工既過程，完全感覺唔到靈魂既存在。對答完全冇自信心，冇熱誠，冇夢想，同條咸魚冇咩分別。

服務性行業一向要以客為先，服務至上，連基本既笑容都冇一個，你叫我點請得落手？仲有，有部份女仔工作左唔到一年，份履歷都寫左好幾份工，份份工都唔過試用期，咁我又點會放心請佢地？點解而家年青既一代會咁冇 heart？連見工既標準答案都冇一個，究竟佢地知唔知如何可以令僱主放心聘用？

就算勉強請左 d 女仔返黎，好多時都係做唔過試用期就拜拜。有 d 人認為公司對好數既同事特別好，所以唔公平；有 d 就認為公司規矩多唔想遵守；有 d 就身子好弱，成日「病」。總之一句講哂，就係只想有收獲，但係唔想付出。有個女仔做埋呢個月又唔做勒，因為嫌辛苦，有咩工作係唔辛苦又搵到錢的？有既話，我都想去做。