復出

公私兩忙再加上抱恙，想寫 blog 都忽然大腦閉塞，唔知寫咩好。

呢幾日發生太多太多事，都唔想一一詳述，不過現時大致上係覺得鬆一口氣的。新同事人選已經敲定，麻煩事又攪掂大半，新工作日程又編排好，工作間又回復整潔 (早幾日亂到比人鬧…)，身體又冇咁辛苦 (仲行得走得未暈到街上)，唯獨是有一件事仲纏繞住我的。上星期我口快快應承左幫銀狐打筆記，當我見到本筆記時真係既驚且喜。喜既係本筆記既內容真係正到不得了，驚既係本筆記係 A4 size、黃頁咁厚同埋 d 字好密… 睇下就已經夠嚇人了。比著平時都唔係問題，問題係呢排體力透支，個 turbo 想開都開唔到咁 "行"，唯有首次認下低威，同佢講定做唔切啦。起碼比定個心理準備佢，等佢搵人補下飛都好丫。

仲有一單野係好攪笑的，今日銀狐搵我食飯，佢都係一個專業 trainer，之前我地都一齊攪過訓練，嚴格黎講係佢攪訓練而我就從旁協助。一個訓練通常係有一個 trainer 加一隊 crew，當時銀狐係 trainer，我同另外 2 個人係 crew，負責 support 成個訓練既流程。呢個訓練都係差唔多 2 年前攪 lu，到左今日，銀狐先至爆比我知，當時其中一個 crew member (女士來的) 好唔妥我，佢認為我利用銀狐上位，而銀狐為左幫我上位就利用左果位女士幫手云云。聽完之後，首先係一頭霧水，我幾時利用過銀狐呀？果次佢先至係 trainer，其他人鬼知我係乜水咩，我都係幫頭幫尾既亞四之嘛… 有咩位上呢？ R 哂頭。

之後先知道，原來果位女士唔鍾意銀狐對我好 d，所以睇我唔順眼。Oh my God！又一酲冤枉乾醋，真係九唔搭八。我同銀狐係十幾年老死，好多人都知，佢對我好有幾出奇？銀狐有老婆，我有男友，果位女士有老公，唔係咁都有醋吃呀？好出人意表喎！聽完唔單止唔嬲，仲幾乎笑死了。幾十歲人都唔化，幫佢唔到。唔怪之得之後我地一齊去上 training 時果位女士既態度咁古怪啦，原來佢既前設思想都幾估佢唔到。