玩出火

Louis 昨日同今日都告 "病假"，下午仲收到佢既 email 話會再告多十日病假，直至佢提出既 last day 為止。簡單 d 講，佢係決定唔再出現，寧做縮頭烏龜。佢係早有安排的，響佢放 "病假" 之前既一日，已經收拾好哂佢既所有野走，仲好好手尾咁交低鎖匙比其中一位同事，叫佢交返比公司。咁已經有足夠理由去懷疑佢唔係病，而係有預謀唔返工。

對於呢 d 不負責任既行徑，公司係絕對唔會姑息的。已經同老細傾左，我地係會去勞工處度索償代通知金。仲有，下星期我地已經約好律師傾其他法律問題，呢單野都會列入 agenda 之內。咁大個人，玩野都玩得蠢過人，要玩人首先要立響不敗之地，佢而家完全處於下風，仲要所有證據都對佢不利，唔通佢會以為公司會不追究嗎？以前都有前同事玩請 "病假" 而不履行通知期，全部都上哂勞工處，全部都係公司勝兼索埋償。Louis 冇理由唔知 ga，唔通佢真係戇居到以為佢有特權可以例外？

仲有另一位同事，係尖沙咀既美容師，試用期都未過，理應扮下勤力博下好感嘛，不過佢既行徑都係似博炒多 d。首先佢唔服從高級美容師既工作指令，響我地公司既架構，高級美容師唔係人工高 d 經驗豐富 d 咁簡單，仲有管理其他美容師既權力。所以個同事違抗上級既指示已經唔多識撈，仲要響上我堂時發脾氣，繼而掉筆同埋離場抗議，好明顯佢真係唔想撈。已經決定左，過左星期六同日既工作高峰期之後，星期一會即時解僱。

雖然尖沙咀少左 2 個人，但係運作上唔會出現好大既問題，因為走佬既同將會被炒既都係冇生產力既人。公司唔係善堂，唔會白白花錢養廢人，清除瘀血先至可以行得暢順嘛。

同公司玩野？都要睇下你有幾多斤兩先至好出手啦，分分鐘玩出火的。