謊言

有一個 supplier 既代表，為左我地肯落單，就咩都會應承我地，例如數期、贈品及各種售後服務。我地見佢肯提供咁多方便同支援比我地，我地都好願意同呢間 supplier 合作。之前 Louis 同呢間 supplier 攪得極不愉快，連老細都對呢間公司有微言。

呢間公司既 sales，每次要我地落單都誓神劈願咁咩都應承哂，一到出貨之前就諸多留難，又要我地先錢後貨，又 hold 起我批貨唔貨唔肯比我。上星期我地因為欠下客人太多貨，都要同佢地落單。落單時講好左，我先找哂之前既數，今張單就下個月比埋，仲要佢地比返欠我地既贈品，佢都一口應承。

點知昨日本應要送貨既，佢就話佢公司唔肯出貨比我，一定要我地先找數先至會比貨我地。原先我都同佢講︰「只要你比左貨我，我就有把握同你傾早 d 找數。不過因為之前你地追數太密，又冇共識，所以老細對你既信心都唔大，都係見到貨之後先至可以同佢傾找數既事。不過我都會盡力幫你，只要你兌現你既承諾，今日比貨我就萬事有商量。」佢就話會同我爭取云云。事情由朝早攪到黃昏，佢都不斷 call 我要我比張期票佢先至肯送貨，又話唔夠貨，要爭住我地幾樣先。期票呢下野就唔駛問都知老細唔會理佢啦，貨都算勒，你比住部份我先，等我應付左 d 客先都好丫。點知到晚上，佢話只可以比住 2 支貨我先。當時我真係嬲都忍唔住鬧佢︰「而家你當我係乞兒呀？我訂左咁大批貨你比 2 支我？我唔要呀！」之後就 cup 左佢線。冇幾耐之後，真係有人送左 2 支貨黎，我就叫左佢走，我話一係你就成批比我，2 支我係唔會收既。

到今朝，個 sales 又打電話黎問我要支票，我一時氣上心頸，就講︰「咁你以後都唔駛送貨黎勒！」講完即刻 cup 線。一個鐘之後，佢公司有人打電話黎話果個 sales 已經冇做勒 (快成咁？)，而佢地既 manager 就好想今日見我，想瞭解清楚件事，我都比埋最後一次機會佢地，睇下佢地比咩解釋我。

佢地既經理上到黎之後，起碼用左十分鐘時間道歉，仲話果 sales 已經即時辭左職，所以即時上黎希望補救返件事。一傾之下，先至發現個 sales 大話連篇，佢一直都同佢公司講我地係即時比錢既，但係我地明明係 deal 左一個月找一次數嘛，原來個 supplier 都願意提供一個月找數既條款，但係個 sales 就唔知點解自己要收數先。仲有佢地已經準備好哂贈品比我地，但係竟然不翼而飛，唔知個 sales 點樣 "處理" 左我批贈品。仲有好多其他野，都寫唔哂咁多，總之就係我地既要求根本上個 supplier 已經 approve 哂，但係一去到 sales 度就 hold 住哂我地既貨就迫我地比錢，先至攪到大家咁不愉快。

既然人地都上黎解釋清楚，仲響 2 小時內比哂 d 貨我地，我就比埋呢次機會佢地公司，睇下佢地換左人跟我地既 a/c 之後有冇改善。原則上呢間 supplier 既貨都好好賣，我都唔想因一時之氣就攪亂公司既生意，希望佢地會兌現今日所講既野啦。