箭靶

大家既公司入面有冇箭靶呢？即係全公司既人都好狠憎佢，佢既是是非非多過天上既星星，仲要全部都係負面新聞，佢狐假虎威，佢上到位唔係因為佢有料，係因為佢擦鞋…

我公司都有，正是本人。

我唔會因為自己做左箭靶而唔開心，因為我既工作本身就唔討好。我常常同老細講︰「做老細唔駛下下都走去鬧鬼 d 下屬既，你最緊要係樹立一個親民既形象，只需笑臉迎人就得 ga 勒。」因為基層員工有時真係好容易受表面既行為而被蒙蔽。佢地會為一個好人老細打生打死，就係唔服一個惡死既老細。

不過老細都有執行家法或者怒斥員工既需要，呢 d 野，我全部包起黎做。因為我要老細保存一個美好既形象，咁佢先至可以凝聚同事之間既力量，成為佢地既精神領袖。同埋其他所謂高層希望得到同事既支持以彰顯自己既勢力，佢地係唔會自願做箭靶的。有時仲會企響同事既角度同公司 fight，惹怒老細都未知。而我，就代老細出口傷人，佢想鬧邊個、想炒邊個、唔妥邊個既工作態度，全部由我把口講。而有同事需要表揚、讚賞、鼓勵等等，全部由老細自己做返。咁佢既形象就成為絕對正面，可以做到平衡既效果。

成為箭靶，係我既工作，亦係我既選擇。好在我都唔係第一日出黎做野，響心理準備同埋善後工作方面都有返少少道行，同事既箭係插我唔死的，因為老細心中明白我做緊既正係佢好想做但係又唔可以做既野。響細公司做野，老細既意願就係一切，要玩得叻，唔係擦下鞋就可以的。基層員工會因為一時之氣唔撈，佢地既根基都唔穩陣，我又點會靠佢地黎建立自己既勢力呀？傻豬黎既！