技倆 - 舊文重溫 (寫於2006年6月10日)

技倆和技術有分別嗎？唔知大家覺得有冇分別，不過我覺得 2 者無論響心態上同埋層次上都有唔同。

先講技倆丫。我覺得技倆 2 字代表了為求達到目的而做既一些事情或講既一些說話。心態上感覺唔多正派，有心術不正之嫌。而技術哩，就係一種能力，層次比較深入同埋感覺上技術係中性的，無偏向正或邪。

有太多人響商業社會上生存，憑既係技倆，並非技術。可能佢地響一時三刻達到某一 d 目的，又或是得到某一 d 甜頭，不過技倆只可以用響心理層次不夠高既人身上。換轉一 d 心理層次較高 (俗稱 "心水清")，對於技倆不但會無動於衷，而且會對使用技倆既人多加留神，因為唔係人人都可以抵擋技倆既誘惑。

技倆可以係甜言蜜語，可以係刻意奉承，可以係踩低別人抬高自己，可以係好多好多包了糖衣的慢性毒藥，受落時好過癮，到毒性發作時就返唔到轉頭了。

做左管理一段時間，聽得最多既係下屬既甜言蜜語，食飯時有下屬關照叫下外賣，買埋生果甜品任君選擇… 不過呢 d 糖衣好薄，好快就見到毒藥了。呢頭請你食野，以為我的心已被佢攻佔時，就會乘機說其他同事既不是… 哈哈哈~~ 呢 d 就係技倆，不入流之餘，仲加強左我對佢既戒心，更加留意佢既工作… 唔係個個老頂都愛擦鞋的。