教學相長

雖然我唔識做美容，但事實上我係美容院既 Trainer，當然我負責既唔係技術部份啦。我係要 train 班同事銷售技巧、揣摩客戶心理、如何 closing、如何舖橋搭路增加銷售額、產品及服務演繹技巧等等… 初初做訓練時，會比較 "表演"，因為我既表演慾超哂標，極度享受成為焦點人物嘛。之後，我體會到做訓練既樂趣最重要唔係有得表演，因為一星期 2 次 show time 都已經足夠有突，當過足癮同埋回復平常心之後就感受到真丕既樂趣。

最初既樂趣就係美容師願意積極參與、願意互動同埋啟發左佢地既創造力。因為初初做訓練時，美容師就好似課堂入面既同學仔，一個二個呆若木雞等完結，佢地最有反應就係 train 完既時候，我都有少少氣餒 ga。不過好在亞媽生成我性格倔強，不肯認輸，所以扭盡六壬令佢地主動參與，見到佢地溶入訓練之中，係我第一個真正既滿足感。

之後，佢地參與多左，即係上堂時精神左，咁我既準備功夫就要小心 d。因為一個不留神就會比佢地抽出錯處，都幾尷尬的。所以第二個滿足感，就係當我做更多準備功夫時對各方相關知識既認知深刻左，同埋思考慎重左。訓練做得越多，不論知識定係思維都有所得著，呢個滿足感最畢生受用。

最近，見到美容師用左我教既野獲得不錯既成績，同埋見佢地思考方面都廣闊左，立體左，我就真真正正感受到咩係施比受更有福。見到佢地有所成，仲開心過自己有得益。教學相長，係其中一條永恆既真理。