小風波

三十號係埋數日，除左生意盤數要埋之外，同事響呢個月內既功績都係時候要結算一下。響度先講少少美容行業既內部運作先，咁大家先會明白以下既內容。響我地公司既美容師係低底薪高佣金既，即係佢地大部份既收入都係來自佣金。而佣金方面又會分 2 類，一類係銷售佣金，即係 "跑數"，呢部份大家都知係咩不用詳述勒。另一類稱之為工佣，即係美容師每做一項服務都會獲分發佣金，行內稱之為 "跑工"。前文提過美容服務有平有貴，順理成章工佣方面都有高低之分。一間美容院可以提供既服務類別實在太多，所以工佣既計算方式都幾繁複。響去年夏天，為左方便所有人計算工佣，我定出左一 d 簡單準則去計算，仲 list 埋個表比 d 美容師跟住黎抄，等大家月尾埋工佣條數時可以方便 d。

今日 2 間店既店長除左幫同事跑埋最後一日數之外，仲要 check 埋 d 同事既工佣計得岩唔岩 (我地會叫 d 同事自己計左先，方便佢地自己知仲有幾多工要跑，之後由店長 check)，點知尖沙咀果邊今日因為計工佣而發生左小風波。

首先尖沙咀店長 (即係老板娘啦) 打電話黎問其中一項工佣既計算方法，我解釋左比佢知，佢就話以前唔係咁計喎，問我係唔係攪錯左。我就話 check 完之後覆返佢啦。為左確保我覆比老板娘既答案係對既，我翻查左我既紀錄、工佣表、同事既紀錄同埋問埋店長，都係得出同一結論︰我冇攪錯。咁我覆返老板娘啦，佢都仲質疑我既答覆係有問題既，響同我傾完之後就走去問尖沙咀負責行政果位同事勒。果位同事都係回覆佢同一個答案，老板娘覺得非常唔滿意，發哂脾氣咁兇果位同事，之後個同事打電話黎求救，又一單遠水不能救近火啦。咁岩果位同事打電話黎既時候，老細響我呢邊分店，老細得知呢件事之後有 d 氣結。佢氣結既唔係我地激親佢老婆，而係佢老婆做野成日都係咁唔上心，明明個 policy 改左成年，都仲係好似唔知道咁，仲突然發老脾話我地全部人唔岩，你話幾失禮呢。

最後呢單野由我店既店長擺平左，因為佢係老板娘最唔抗拒既員工。其實店長講既野，同我地講既係一模一樣，哈哈哈~ 點到你唔服！