銷售

做左咁多年銷售，B2B做過，B2C又做過，B2G都做過，最好玩既莫過於B2C，因為對手就係決策人，即時知效果嘛。而家我已經退下火線，唔需要我 SELL 勒，我只需要教識班同事點 SELL 就OK勒。初初教佢地時，真係覺得不如我自己SELL返好過啦，聽見佢地SELL客有時都幾火滾 (可能我初入行時我D老頂仲火滾… 哈哈哈~~)。不過教左咁耐，見到佢地成長左，識得掌握客人心理，識得咩時候入咩位，同埋D單越開越大張，心中既滿足感都幾大。

其實SELL客既野，最差既就係SELL，你越SELL個客越缩。反而完全唔SELL，只係針對客人既取向或需要而不斷吸引客人，佢自己會送上門，只要響呢個關鍵時刻適當地加一腳，張單自自然然會落你袋。我常常教D同事，最緊要係令客人放鬆，令佢地放鬆戒備，之後要客人跟住我地安排好既"心路歷程"進發，佢自然會拎錢出黎比你駛。不單止咁，D客仲會好鐘意繼續比錢你駛，因為佢駛錢駛得好舒服。所有人只會做自己喜愛既事，被迫既事，做一次當係自己唔好彩，總不會明知呢間係黑店都仲要中個頭埋去比人 durk 掛？

呢排見到D舊客返單率高左，證明左呢套方式極 work。各位版友，先唔好話呢D係老生常談呀，實際上有樣野好叫知易行難呀。要真正做到，都要下一番苦工，同埋要有堅忍既精神GA。