管理文化

管理，原來係可以好精采的。

雖然我地公司細，得果廿人唔夠，不過老板之下都有 4 個管理人員，當中包括︰2 間分店各有一位店長，同埋 2 間分店都有一個 "坐館" 去處理行政、卒數、人事之類既一大堆非技術性工作。我呢，就係其中一間店既打雜經理勒。雖然只有 2 間店，但係管理文化可以相差好遠。

先講下自己做果間先啦，我地呢邊人比較多，地方比較大，員工資歷比較深同埋 sales target 比較高。我對呢間分店既同事，只有 "理"，好少去管。因為呢度資深既同事多，同埋佢地都有一顆競爭的心，對於跑數方面都不需要太多著墨，反而比較多做 case study，令佢地開單既銀碼會大 d，同埋比佢地發揮會多 d。佢地唯一要我操心既就係人事問題，始終人人爭上位，磨擦少不免。所以要多留意佢地既動靜，同埋佢地既情緒，始終服務行業，保持前線員工既正面情緒係好重要的。

另一間分店就完全唔同，除左店長之外，冇一個同事做超過一年，同埋果邊既同事流失率奇高，可能同果邊既管理方式有關。果邊冇乜點管，亦都好少去理。即係店長好少理會同事日常既工作情況同埋困難，亦都唔會理會 d 同事識唔識做某一 d 技術上既工作就硬塞比同事做，但求佢自己唔駛做就得芳。每當遇到老細責難生意不好、流失客戶或者行政有問題時就搵個同事出黎祭旗，總之就係唔係佢責任。開會商討發展計劃時就萬般阻撓。以我所見，好多時工作上既問題都係店長自己疏忽，就將所有責任推在員工身上，仲邊度有員工甘心為佢做事？

做管理層既，唔係應該有責任去令下屬完成任務咩？同埋應該有責任去教導下屬去改進，令下屬為公司盡心盡力做事咩？做管理既成日搵 d 下屬出黎狽黑鑊，仲有人願意跟佢工作嗎？

呢位店長，就算工作表現再出人意表，都係唔會比人炒的，因為佢係老板娘！