取悅別人 - 舊文重溫 (寫於2006年6月26日)

時常有人話我講野好串，不留情面，一句到尾就篤人死穴，唔係一個平易近人既人。最近連老細都話我唔好對 d 員工咁苛刻，唔駛下下講中佢地既死位既。我問老細，你想要咩結果？一係要一班好開心既員工，不過千其唔好問我生意既野，開心既日子好易過，d 客唔開單係唔需要用方法迫的。一係要有多 d 生意，不過代價就係要有人事上既磨擦，皆因呢個社會真係有競爭先至有進步。

記得響 5 月時，有個新同事都幾霸，成日踩其他同事唔掂，到最後，被踩得最勁果個破哂開店以黎既個人生意紀錄，仲係史無前例咁 hit 到最高果條 commission bar。響我既角度，呢單野就梗係有損人和，不過老細月尾埋數時應該都幾歡欣。出黎打工做生意既野，求財姐，要交朋結友既唔該放左工先啦。

昨日老細又問我點先至可以令生意更多，我話方法梗有 ga，不過你怕痛唔敢做之嘛。佢話我講野玄，我話呢 d 唔係玄，係你唔肯面對現實姐。(其實我篤老細既死穴都唔留手… XDD)

社會中識得取悅別人既人總係比較受歡迎，初出茅廬既我都喜歡以取悅別人既方式黎得到大家既認同同埋建立人際關係。初時都覺得幾開心，周圍既人都好喜歡我呢個朋友，不過久而久之，當你發現朋友有改善既必要時，就唔知點幫佢。同佢講有地方要改善咩，佢會覺得不悅，如果朋友唔開心我就覺得自己既人際關係會破裂。呢個錯誤既觀念一直纏繞住我，直至我比身邊既好友直斥不是既時候先至醒覺。朋友係對我好先至鬧我，唔怕我唔開心，只怕我行差踏錯。佢不單止改變左我一 d 做人既方向，仲改變左我對朋友既態度。就係唔會為求得到朋友既 "認同" 而取悅朋友，反而會為左令佢更進步而 "一語中的" 咁指出佢既不是，係朋友既係唔會嬲我的。如果真係嬲我既，我亦唔會介意，因為心底覺得我話你係袋錢落你袋，你唔要既未算數 lor。

漸漸呢種態度蔓延到我既工作崗位上，要做好一件事，唔係 "開心" 就得既，明知行錯路就一定要 d 同事行返岩果條路，忠言一定逆耳，良藥往往都是苦的。不過唔緊要，好多時比我 "gut" 完既人響冷靜落黎既時候都會明白我既原意並不是要逞強，而係要為佢好。如果佢真係唔明既，只怪佢慧根有限了。