銷售工作壓力 - 舊文重溫 (寫於2006年6月2日)

新既一個月，公司條數又要歸零從頭跑過。做 sales 本身已經係辛苦，再加上每月追 target，彷彿冇休息既時候，有時 sales 會因為呢 d 工作壓力而放棄。

做左咁多年 sales，起起跌跌咩都試過。試過做 top sales，破公司紀錄；又試過連續幾個月食旦，深明做 sales 既道理就係要夠堅毅。而家 train 緊 2 條 sales team，中間所需既堅毅係比自己跑數大好多。要令 "花無百日紅" 既銷售行業變成 "細水長流" 既收入進賬，並唔係單懣積極心態就可以解決。

同事們由唔妥我至到多謝我，我想當中我所付出既心血應該冇白費。昨日有一位長期冇數既同事一開就開左張大單，見到佢開心錯愕既眼神，令我諗起自己初出茅廬時開第一張單既感覺。那種興奮、患得患失、吐氣揚眉、鬆一口氣… 種種複雜既心情一湧而至，久久不能平復。不過我亦明白下一個挑戰就係要幫助呢位同事渡過下一個難關，因為佢響短期內都唔會成日開到大單，到時就會有莫明既失落感。

做 sales training 唔係卒數咁簡單，仲要照顧埋同事響每一個階段既心理狀況，先至可以令佢地做得有安全感，唔會覺得冇數就比公司怪責，增加無謂既心理壓力。