遊魂記

今早同老細開每週例會，議題都係陳腔濫調，都係講下業績，講下人事、講下訓練同埋講下市場推廣之類既野。可能老細今日不停回帶，會中我都冇咩心機聽，因為內容同上次既會議有八成係一樣既。不過老細愛回帶，作為佢既 "忠誠 fans"，都一定要表示支持同埋認同既。幾小時既馬拉松會議過後，當然就係食安樂茶飯既時候啦。

食飽飯，例牌都會比個電話尖沙咀果邊既同事，做下親善大使，慰問下同事兼詢問下業績之類。接我電話既正係今日一齊開會既同事，同佢傾左幾句之後，佢突然問我一句︰『你覺唔覺得老細今日遊哂魂咁呀？講野都冇 focus 既？』語畢我回心一想，又係喎，老細今日都係東拉西扯，講左幾粒鐘都冇結論，亦冇 action plan，簡單 d 講即係開完等於冇開過，白白浪費左大家幾粒鐘都冇任何結果既會議。哈哈哈~~ 可能我已經習慣左老細不斷回帶，都冇留意老細自己 lost in space，完全冇就住某 d 工作定下方向或指引，更加冇實際既推動方案。咁我又冇提醒佢 (可能一早講左幾樣野都比佢 ban 左，所以我都唔再出聲，問到我都冇意見… 哈哈哈~)，所以就令大家今個星期冇左軸心勒。我諗聽日都係問下佢某 d 工作既具體要求好 d，免得佢會怪責我地辦事不力嘛。