鍥而不捨

鍥而不捨係我地公司最近既最 hit 名詞，常用於鼓勵同事響面對刁鑽既客人時，都要保持鍥而不捨既心態，唔好害怕客人既刁難，一定要開到單為止。又或者係面對舊客戶，要佢不停繼續消費時，唔好理會客人既 "合理推搪"，都要以鍥而不捨既心態去完成交易。

最初，我要推行 "鍥而不捨" 既精神都遇到好多阻力，因為同事對於挑戰都係抱消極態度，認為冇必要下下都要咁鍥而不捨。原來，第一個需要鍥而不捨既人係我。本住擒賊先擒王既心態，我要先說服店長，要佢都有鍥而不捨既心態，佢先至可以帶動到同事有同樣既精神。事情都進展得好合理，我坐鎮果間店既店長當然冇問題啦，店長都係一個喜歡表現能力既人，所以佢以身作則，響同事面前攪掂多個刁鑽客人，令同事相信，繼而實行，所以我睇既果間店響好短時間之內就收復左月初既失地。而由老板娘睇既果間店，佢依然係采我都傻，所以生意都冇咩起色。

鍥而不捨既精神，代表永不放棄，所以我同本店既店長，亦都出力去埋老板娘間店度教育佢地班同事，仲示範如果攪掂刁鑽客人，令果邊既同事見到如何處理呢 d 客人。我地既做法，冇錯係令佢地出現左小陽春，我地走左之後，一切回復平靜。店長始終係火車頭，你行得快，d同事都冇得行得慢。你唔行，成架車都會停。停左都唔係問題，撻返著未得 lor。不過老細同我地傾過，認為我地既行為係比左壓力果邊既同事，不過佢地冇生意，老細又會怪罪於我地，我地可以點呢？

好，既然已經豁左出去，就繼續鍥而不捨，我地唔理老細既 "勸喻"，已經計劃左再教育果邊既同事。因為我地好明白老細之所以咁講，係佢老婆唔鍾意我地去踩佢個場，不過我地去 "踩場" 既目的，並不是要逞強，係要救亡。希望到埋數既一日，老細會明白啦。