開放日

好少中小型美容院會攪開放日，一般都係大型美容院先至會攪。雖然我地公司細，響舊年開始，我就推動公司攪開放日。因為我地客源不足，唔想每個月追數都要向舊客開刀，最好既解決方法莫過於搵新客。攪開放日既好處係成本低，唔需要花大量金錢都可以實實在在咁搵到新客，同埋都好有成功感，因為我敢於去做好多中小型美容院完全唔敢去做既事。

初初攪開放日，大家都唔知得唔得，好在我既頭炮都叫打得響，成本只係幾千蚊，開放日當日既生意都夠所有同事出一個月糧，所以老細都放心比我攪開放日。唔經唔覺，我都幫公司攪左年幾開放日，幾乎每個月都攪。雖然唔係個個月都有咁好生意，不過班同事習慣左每月都有一日博殺日之後，佢地既平均表現都提升左，平均生意額一年間升左一倍，我都叫做對公司有返少少交待啦。

今日輪到老板娘果邊間店做開放日，不過我永遠都會記得今日。

老板娘有一個強項，就係以行動證明我既建議係唔WORK既。佢一定證明到GA，因為只要佢咩都唔做，仲要唔比佢D下屬按照我地定既方向做，結果必然係唔WORK。早幾個月既開放日，老板娘唔CALL客、唔理我地既著急、唔理公司既生意… 試過有一次開放日捧蛋，另一次就只係做左少於一千蚊生意。佢用呢D"證據"向老細證明開放日係唔WORK既。今日，老板娘已經唔再想理會開放日，所以佢返屋企閉關讀書，完全冇返工，所以另一間店既店長就過左去幫手。因為佢之前完全冇叫同事CALL客，今日全日只有3個BOOKING… (另一間店既開放日，一般都有廿幾個BOOKING，最勁試過一日接四十幾個BOOKING)

去幫拖既店長，為左證明開放日係得既，雖然只有3個客，都唔氣餒，奮勇作戰下有2個客JOIN左COURSE，令大家都刮目相看。佢做完野之後，同班同事講，冇野係冇可能的，問題係你做定係唔做姐。其實呢番話，講同唔講都冇分別，因為問題唔係出響同事度，係響佢地既亞頭度，佢地為左保住飯碗可以改變D咩？