3 號

有朋友同我講，話最討厭 3 號仔 (註︰此 3 號係指九型人格入面既第三類型性格)，因為覺得佢地太勢利，凡事只向錢看，只想和有錢人打交道，看不起不是大富大貴的「朋友」。在這裏我要為 3 號仔平反！

首先，要判斷別人是九型人格中是屬於哪一類，絕對不是靠一個人的外在行為而決定的。九型人格的分類是建基於動機而非行為的。有太多人急於為別人定型，見別人有甚麼舉動就狠批別人是甚麼類型，實在過份輕率。除非已經真正充分掌握了別人內在的動機，否則有好大機會是不能準確判斷別人是哪一種類型。而且學性格學的大前提，不是到處為別人貼標籤，為別人冠上號碼。學性格學是要令你更認識自己及別人，理解與不同的人相處要有不同的方式。要令自己對別人更有同理心，而不是用來分化和攻擊別人的。

在九型人格中，第三類型人是怎樣的一種人呢？以下是一個簡單介紹︰

第三型的人有自信、野心、成功、耐力、行動敏捷，他們一生追求金錢和地位，是極佳的推動者，能給別人一種「無所不能」的信念。他們時常會出現假面具的一面，用變色龍來形容他們可說非常對稱。

當他們專注目標時，會發揮無論如何的精神，他們的生命、工作、休閒都是全部列入安排，而且一個目標未完成時，下個計劃又準備開始了。他們有無窮的精神，只要達到目標，從不計較，他們的腦袋裡有多重任務，許多目標。而每個目標有需要時也會給予時間去專注，但至於過程的細節，他們會沒有那麼投入。

第三型的人有強烈競爭性，因為他們將焦點放在「勝利」，但有點不同的是，他們只是向自己挑戰而已，並沒有擊敗他人的意圖。

他們很少冒險，除非他們有靠山，而且他們只接受那些感覺到成功在望的計劃。若真的失敗了，他們會把失敗定義為「部份的成功」或「一個學習經驗」來看待，除即迅速展開下一個新計劃。

對第三型的人來說，受讚同及被喜愛是成功的一部份。他們甚至以為每個人都是這樣想的。而令他們最具破壞影響的事情，就是一致公認他為「失敗者」，他們很重視形象，很在意別人怎想他，也很重視別人的回應。

他們很少和自己的感覺連繫，並不是說他沒有情緒，而是到空閒的時候他們才去感覺。

一般的第三型因事業有成，動力足夠，有時候在無聲無色之間產生到一股魅力，很容易受到異性垂青 (特別是男性)。但因第三型目標實在太多，他們會認為伴侶會影響到他們的目標，伴侶對他們來說只是一個伴侶，甚至乎會覺得身邊的另一半只要人生計劃必須實行的一部份而已。而對第三型的人，講出「我愛你」這3 個字是他們的死穴。

積極的第三型是具同理心及社會意願的領導者，能用熱情鼓勵他人，努力向上爬，重視賽果和成就，自信而精力充沛，環境適應力強，有魅力及受歡迎。

消極的第三型是輕蔑傲慢，野心份子、不帶感情、為達到目的支配他人、恐懼失敗與恥辱、高估或低估自己、不擇手段、高處不勝寒。

喜愛成功和「勢利」是有分別的。成功的定義很廣泛，不一定限於事業和金錢。要建立一個家，要培育出色的人才都是「成功」的一種，很視乎當事人的取向。因為第三類型人都有機會傾向第二類型而將目標變成助人的目標，或傾向於第四類型而將目標變成感性的滿足。這些都不是金錢可以衡量的，但都有目標這個重要元素。而且對於第三類型人來說，沒有目標可達，就彷彿沒有了生存意義。目標這回事，對於第三類型人來說，是最內在的動機。

勢利，只是某部份仍未成長的人有待改善的地方，並不是性格定位的元素。

談性格

最近睇緊一本書，係論 94 位女性既性格。一向喜歡研究性格學既我一見書名就諗都唔諗就買左。睇左一半，覺得作者其實對性格學一 d 認識都冇。書中所論既女性大部份都係歷史人物，佢地既性格係點，我當然無從稽考。不過作者響論述各人既性格時，用左大量形容詞同埋成語。例如︰剛烈、乖張、堅忍、傳統性格 (我都唔明咩叫傳統性格)、叛逆 (呢個係主觀形容，完全同客觀分析扯唔上關係)、從夫 (呢個仲唔明)、賢慧之類一大堆。當然要表達含意，就需要用下形容詞啦，不過用得太多同埋太空泛，只覺作者文筆虛浮，言中無物。其中睇左半本書，都只係睇到男性心目中既女性形象，對中立既性格研究完全起唔到啟發既作用。

性格學唔係一個用形容詞堆砌出黎既「學說」，先唔講派別，基本上大多數性格學都有根有據。有部份學說以行為左基礎，有部份以動機作根源，全部都有「因」有「果」，唔係求其塞幾隻形容詞可以討論到。

算啦，我都係當果本書係歷史故事睇好過。

不過睇書既時候，好多時都有同作者交流既感覺。呢位作者，真係交流得好辛苦。因為我好難認同佢既講法。為左練下自己既「堅忍」同埋「寬大」，我會睇哂佢既。

3 4 5 6

奇怪的標題，有趣的組合。

3︰菲菲
4︰老板娘
5︰老細
6︰Annie

大家知唔知係咩？係我地響九型人格入面既號碼。

4 號同 5 號都係量能向內既號碼，2 公婆都係向內的，間屋一定好靜… XD

致 Recluse 兄 - 再談性格學

多謝 Recluse 兄對 MBTI 一文既意見。先講下九型人格既起源，我真係要 check 下係邊度先，因為之前上堂都係聽導師講，冇翻查過就照信如儀，我會儘快搵出答案的，多謝提點！

其實要從人類既表面行為去判斷一個人係咩類型，我相當只有 DISC 先至可以 (因為呢套理論都只係因應表面行為而粗略分 4 類)，其他既方式都唔可以單靠觀察或者做問卷可以找出真正答案，尤其係九型人格，因為呢套方法係以 "動機" 作基礎，根本唔可能一眼就分得出。

講返 MBTI 先，依菲菲愚見，要分 E 同 I 唔係靠行為去分辨，而係以動力既根源去分辨，所以表面真係睇唔出的。E 型人既動力根源係比較多相互影響同埋求寬的。而 I 型人就則注重內在精神同埋求深的。如果要從表面睇，E 型人傾向於講左先至諗，即係個口快過個腦。而 I 型人就傾向諗清楚先至講。 E 型人性格係真正地外向，出席親聚會都好投入的。呢點要好小心，因為大家出黎社會做事既，都會響特定既社交場合有特定既手腕，同埋呢 d 手腕好多時都係後天訓練返黎的。如果要分辨自己係 E 定係 I，首先要問一問自己，究竟我真係每一次同大班人一齊都樂在其中丫？定係有時係為左唔好掃人興而表現得開心投入呢？所以 E 同 I 係只有自己先至知，其他人見係都好似幾 "外向" 就會認為你係 E。

無論係 E 或者 I 都好啦，都會因應環境而需要 adjust 一下自己既行為。所以單靠行為判斷係唔準的。而且都好有機會係兩邊既取向都相近都唔出奇 ga，唔係咁多人係極端 E 或者 I。同埋行為係以 T 同 F 作區分的，並唔係 E 同 I。如有錯漏，請指正！

菲菲比較蠢，需要花大量時間去觀察，同埋同朋友討論先至敢分辨某人係邊一類。菲菲亦都有緊記一點，不會標籤任何人為某一類，因為人人都唔喜歡被人標籤。學左性格學都係以 "運用" 為主體，只要多觀察同埋多細心推敲，都可以從多角度既 "證據" 去辨別人地係邊一類。最直接既方法，莫過於以 "行為驗證行為" 去判斷。簡單 d 講，如果你認為某人係邊一類既，都會知果一類人對提問既反應，只要肯去開口同人溝通下，再觀察證據，就比較準確。

仲有，真係好多謝你既鼓勵，我會更加努力的！如果再見到我 "寫完先至諗" 既話，請多多提點！

MBTI

有讀過下性格學既人，都會知咩叫 MBTI。呢幾隻字係 Myers-Briggs Type Indicator 既縮寫，係將人既性格分 4 個層面去分類，每一個層面有 2 種分野，加埋有 16 個配搭 (好在係加埋，唔係乘埋)。2年前有學過下，到而家都係流於皮毛階段。淨係要摸熟九型人格都唔容易，仲要學識辦認 16 種性格同埋佢地既特質、相互關係，都幾花心機。

早幾日心思思搵返本書出黎睇，唔睇由自可，一睇就不得了，因為睇睇下發現自己彷彿係冇學過一樣，要由零開始學起。最大鑊本書實在太學術勒，雖然作者盡量做到有趣味性，不過書中既理論都唔係單靠趣味可以掌握的。本書寫得好有心機，不過睇左頭幾個 chapter 已經一頭煙，連自己係咩 type 都未肯定，你話幾惡攪呢。

唔知呢度有冇人有研究開性格學呢？真係好想有高人指點下迷津…

性格

近幾年，我對性格學產生左濃厚既興趣，所以不斷去睇有關書，同埋去上下有關既 course。自知資質魯鈍，都不敢班門弄斧，不過都有少少心得想分享一下。

性格係天生既，呢點係不容置疑。性格係 d 咩呢？係人面對外界作出反應既模式。性格係改變唔到既，大家眼見既改變只因為受左教育、經驗影響、人生煉歷等等既因素影響左表現方式，但係核心係唔會變既。舉個例，一個事事嚴謹既人唔會真正識識得鬆弛，佢既內心都會嚴謹的。瞭解一個人既性格，可以改善相處、溝通、鼓勵、合作、兩性關係、工作關係等等既一大堆問題。所以我就好有興趣學勒，有用丫嘛。 XD

性格學有好多學說，我才疏學淺，只係認識左幾樣。以行為模式而作粗略分類既有 DISC，只靠表面行為而初步判斷性格類型。不過世上幾十憶人，又點會只有 4 種丫。另一種係天主教流傳已久既九型人格。九型人格係係以探討動機為核心，所以單憑行為係判斷唔到類型的。要判斷，就要透過大量既印證先至可以做到。而另一種就係 MBTI，呢種係分 16 個類別的，比九型仲難正確掌握。MBTI 可以由內至外咁分類，我都仲未熟讀呢 16 類哩。

性格學既學問其實係好精確同實用的，要掌握當中既學問，我仲有排修煉。響進行銷售訓練時，我都會引入最基本既 DISC 做教材。因為 DISC 只有 4 個分類，同事易於學習，同埋響銷售時，你根本冇時間去探討人地既核心，唯有搵 D 以表面證供就可以歸類既方案啦。呢 D 易學又易用丫嘛~

唔知呢度有冇朋友都係研究性格學呢？如果有既，請留返片言隻字比我，讓我有機會向大家學習下丫。