欣喜

幾個月前公司來了一位新美容師，佢黎左香港只有幾年時間，對香港既文化都仲未係好熟悉。而且佢廣東話既表達能力都係一般，初初黎到時佢都遇到好多障礙。例如佢同同事溝通時成日辭不達意，攪出好多誤會，而且佢記性認真麻麻，呢頭講完一陣就唔記得，成日激到性急既店長死死下。仲有，佢唔多習慣我地既經營方式，一般比得起錢既客人我地都會做到最好，而比較平民化價錢既客人我地只會做基本應該要做既野 (都唔係求其做，只係層次上有分別)。而佢呢，太用心對客勒，做客前都唔留意個客比咩價錢，就統統做到最盡，d客梗開心 ga，不過有好多後遺症之嘛。第一︰d客人係唔可以 mark 實邊個美容師做既，所以公司都有規定各種服務既指定動作，方便每一位美容師都知道唔同既客人要點做。如果果位同事太細心幫個平民化價錢既客做，下次輪到其他同事做既時候，其他同事會按公司既指示做，咁個客就覺得我地既服務水平不一，你叫其他同事點向客人交待？第二，美客院既服務由幾十元至千幾元不等，如果客人付出幾十元，得到既服務同比左千幾元既客人係一樣既，咁我點 upgrade d 客人做貴 d 既服務？咁即係倒米，以後 d 貴價 plan 唔駛旨意賣啦。因為以上既情況，同事曾經一度杯葛佢，因為佢做壞哂規矩，令到大家做客同埋 sell 客時都出現阻力。

另外，原本既同事都經過一年以上既銷售特訓，響賣野方面既技巧都提升左唔少，對比起新同事，仲要係新移民，差別實在太大勒，好多時客人再買野時都會選擇資深既同事，所以新同事既生產力一直偏低。

就住以上既情況，我同店長都向佢解釋過做不同既客要留意公司指示，sell 任何野前都要店長幫手，仲要不停重複又重複咁同佢講，因為佢真係好冇記性。不過好在佢都係願意學習同埋都幾勤力，響其他同事賣野時佢都有從旁留意，雖然佢仲有一段路要走，不過精神可嘉。漸漸其他同事見佢都唔係有心攪咁多大頭佛出黎時，對佢既態度都叫做好左少少，起碼冇杯葛佢先丫。

昨日我同店長去左尖沙咀開左大半日會，返到本店時睇到佢開左 2 張單，係響冇同事協助下完成，當時我既喜悅係非筆墨所能形容。佢已經開始掌握到響度工作既竅門勒，黎緊既日子，希望佢可以為自己爭返一口氣。

做訓練既人，最開心莫過於見到學員有突破自己既能力，識得自己扭轉逆境，呢 d 先係響香港生存之道。希望其他土生土長既香港人可以學習一下，唔好成日怨天怨地怨唔公平，命運係掌握響自己手上的。都係果句︰奇蹟係會發生響願意付出的人身上。