Drilling - 舊文重溫 (寫於2006年6月10日)

Drilling 響銷售行業即係模擬銷售訓練。好多以服務為主既行業都流行以呢 d 方式去訓練前線銷售人員。加入左美容院既員工訓練行列之後，我都大力推動呢種訓練方式。

響訓練既其間，不但可以瞭解多 d 佢地日常 sell course 時會點 sell，仲可以瞭解多 d 美容行業既運作。而家先至明白，點解有咁多客人投訴美容院 hard sell，因為佢地既銷售模式仲係停留響 "講價" 同埋威嚇既階段。呢 d 都係 d 過時同埋冇效既方式，試問有邊個消費者會鐘意比人迫 ga？而家做銷售要成功同埋長久，一定要個客心甘命抵咁比錢出黎，仲要佢覺得物超所值先至得嘛。

我引入左好多銷售既心態同埋方法比佢地，例如瞭解客人心態、發掘客人既心底話 / 底線、定目標、定實踐計劃之類… 仲有如何發問、如何同客人溝通、如何令客人信服之類… 不過響推行既過程真係有好大既挑戰。最有趣既係，當我教佢地新方法既時侯，佢地會話︰不嬲我地都唔係咁做 ga~

如果佢地不嬲用開既方法係 work 既，老細就唔駛多此一舉搵我黎 train 啦。同埋佢地都只不過係廿來歲，但係腦袋就好似老人家咁，以前做開係點，而家就拒絕改變。我都明白人係唔鐘意改變的，但係事實上世界天天在變，我們可以唔變嗎？唔變會被社會淘汰的。

正如 drilling，佢地唔習慣咁既訓練方式，不過呢個方式正正就係最好既練習方法。響見客前有練過，見客時就唔會出太多亂子嘛，成功率都高 d 丫。昨天做完 drilling 時，竟然有同事哭… 佢覺得咁 train 壓力好大… 不過我呢個魔鬼教練就覺得咁小事都捱唔過，又點響呢個競爭劇烈既市場上立足？