愛情來的時候

愛情來的時候，你會怎樣？會日日掛住拍拖？冇心機做野？定係以其他更沉醉既方式去迎接一段戀情？

我既「朋友」April 為左迎接一段戀情，斷送左好多友誼。April 本來真係我既朋友，起碼我一直都當佢係我既朋友。我地一齊上過 training，亦一齊攪過 training，又有共同朋友銀狐，大家見面既機會多，話題亦有深度，響多方面黎講我地都算係同聲同氣既戰友。而且佢比我既印象都係一個爽直既人，我最鍾意同女中豪傑做朋友，因為大家都可以暢所欲言，唔需要擔心唔覺意講錯一句說話就冇左個朋友。

早排從銀狐口中得知，April 原來早在 2 年前已經對我不滿，仲成日響銀狐面前數落我。第一次知道既時候，我覺得非常愕然，從來冇諗過一個我都有幾分尊敬既人，對我不滿左咁耐都冇同我講過，仲要響我最好既朋友面前數落我。不過算啦，世途險惡，你當人地係朋友，人地係唔需要當返你係朋友的。所以我聽完之後就算，反正呢排大家都冇咩聯絡，佢講左 d 咩對我黎講根本唔重要。

今日同銀狐傾下閒計時，佢特然好嚴肅咁講︰「我真係頂 April 唔順，佢為左討好佢既新男友，竟然出賣哂佢既所有朋友，連我都想出賣埋。佢成日話你利用我，其實係佢不斷利用佢身邊既人就真。」聽到我一頭霧水，我都唔知佢點樣為左新男朋友而出賣朋友。原來 April 剛拍拖既男友原本係佢既 coachee (April 係一個企業教練)，個男既本來有一個準備結婚既女友，但係為左同 April 一齊就同女友分左手。呢件事已經令 April 既形象大受損害。不過感情既野，旁人唔應該比任何意見的，始終呢 d 都係佢地自己既事。

近排佢男友要攪生意，就搵左銀狐同埋我地既另一個朋友 Peggy 做 Biz Coach。做企業教練係唔需要參與任何企業運作的，只需要協助企業找出盲點並加以改善就功德完滿勒。如何成為一位出色既企業教練響度暫且按下不表，呢件事既主旨係，April 要求銀狐同 Peggy 為佢男友既生意籌集 200 萬資金。唔係掛？自己攪生意唔係搵定水喉咩？點解你搵朋友幫手做 Biz Coach 又會變左要朋友交數比你攪生意？April 本身都係一個企業教練，佢自己冇理由唔知教練係唔可以參與公司既任何運作掛？原來理由好簡單，佢以邀請朋友做教練為名，實質係要呢班朋友每人夾返份「股份」比佢男友攪生意。

咁都唔緊要，佢有佢迫姐，大家可以唔理佢的。April 見大家都唔理佢，就出到「負責任」呢 d 成長課程既鬼話，猛攻朋友們不負責任，冇兌現自己既承諾。哈哈哈哈哈！通常話人地不負責任既人就係最不負責任既人，佢冇理由唔知掛？我以前認識既 April 唔係一個是非黑白不分既人，點解為左一個男人會變成咁？

好在佢一早已經冇當我係朋友，所以冇出賣我。Thanks God！

不過最可惜既係，愛情來的時候，竟然係斷六親既時候，希望 April 早日回頭是岸。善哉善哉！