男女有別

公司內絕大部份係女同事 (美容院嘛)，除左老細之外，就只有尖沙咀既行政係男同事。基本上我睇果間店係全女班，兼且所有人包括店長都係打工既，好多時做起野上黎會比尖沙咀店順暢好多。尖沙咀果邊，店長係老板娘，行政係男士，仲要係響度做左唔夠一年，好多時都唔敢得罪老板娘。有睇賤扑既人都知我地既老板娘唔同一般既老板娘，佢返工唔係為左睇實 d 員工，而係為左有個地方比佢 hea 同埋發下老板娘既威，除此之外，所有佢主理既行政工作都係一團糟。問題就係出響呢個奇特既架構上。

響我果邊，所有公司既指示都必須執行，如果同事有唔依指示做既，會比我同店長 "處理"，即係唔可以亂黎。同埋大家都係女性，唔會有 "憐香惜玉" 既情況，其實都幾地獄。不過同事之間都明白我地係公事公辦，做錯事比我地丙完都唔會有咩反抗情緒，最多都係唔開心一兩日就冇事。久而久之，大家彷彿係一家人咁，有咩事都會有商有量，士氣都幾唔錯 ga，所以條數都幾 ok。

而尖沙咀果邊，好多時老板娘自己做錯野，負責行政既同事又唔敢得罪佢，所以好多手尾要跟。至於同事方面，因為美容師全部都係女仔，作為男同事，有時都唔會好似我地咁丙佢地。當然唔係下下都要丙，不過佢響處理問題時太手軟，導致好多問題越積越大鑊，到爆煲時就一定有人要離開 (都搵替死鬼背黑鑊嘛)，所以果邊既生產力唔穩定同埋經常有人事變動。大家做管理既都知道培育人才並不容易，下下培育到一半就走左，你都咪話唔傷。

今日我又發現左尖沙咀有 call 客既問題，就打左電話去比果邊行政同事，問下佢地既工作情況有咩需要我地幫手解決既。問題就講左一大堆勒，又係例牌推莊比老板娘，話佢辦事不力，冇迫 d 細既做野之類。呢 d 藉口聽到我都悶，我就問佢有冇主動指示 d 同事做野，咁就唔駛比老板娘 kick 住。佢好有苦衷咁講︰『你估我唔想咩？你知啦，一同佢 d 細既講，佢就黑起口面覺得我越權，大家響埋同一個地方返工，費事攪到面阻阻啦。』

我都同老板娘共事過，即係我都響尖沙咀返過工，好清楚佢係咩性格。當然出黎社會做事都要顧下人感受啦，不過當事情辦得唔好，老細係唔會怪責佢老婆 ga，只係會怪責我地辦事不力咋。之前我就唔理老板娘既面口，照 order d 細既做野，做得唔好都係照丙，所以我響尖沙咀果幾個月係唔需要煩行政既野。因為老細唔會因為老板娘黑口黑面就炒左我，但係會因為我辦事不力而影響我飯碗。響平衡利害衝突之後，我唯有做一個乞老板娘憎但係老細會照既員工。職場，始終係龍潭虎穴，有時真係唔到你仁慈。

男士響女性多既工作環境，有時真係唔可以做到我咁絕。因為，男左有風度，唔通可以好兇狠咁對待女同事咩？過到自己既心理關口咩？我諗唔係冇，不過唔響我公司姐。