淡季．旺季

又到月尾，又係追數既最後衝刺階段勒。我店既同事狀態都幾勇猛，雖然唔叫得上係大勇，不過都係響衝線狀態，希望可以刷新上年七月份既紀錄啦。尖沙咀既同事，我諗佢地今個月既生意應該唔多掂，因為今日見佢地成班人都冇心機做野咁，要 mo 起佢地都有排攪。

唔講尖沙咀住，遠水不能救近火，都係攪左有力果班人先。而家追數要緊，每日倒數，要攪都留返下星期先至攪 (老細都唔建議我攪果邊住，呵呵~)。七月同八月，係美容行業既傳統淡季，不過睇數字都唔算太差。上半年既生意已經刷新左 06 年上半年既生意紀錄勒，岩岩步入下半年，冇理由撻 Q 的。而且睇佢地既氣勢，今個月埋單應該會破所謂淡季既紀錄。

菲菲對於旺淡季呢 d 野完全不放在心上，因為事在人為，只要肯努力，咩季都會搵到食。淡季只係生意唔好既藉口，理論上咩季節都會有人去美容院，不過客戶群會有所不同姐。所以要響淡季突圍，就要 target 響暑假都會得閒做 facial 既人，即係冇子女既人。因為暑假時好多客都要陪仔女，唔會有咁多時間黎美容院。不過冇仔女既客人就唔同勒，佢地冇分咩季節的，一年四季都要黎 ga 啦。雖然纖體唔係我地既強項，不過推陳出新絕對係我地既強項。

細公司既好處就係應變快，唔需要好似大公司咁要長 d 時間去決策。基本上我地諗到既野就可以做，只要老細肯首就得勒。我地架構簡單，隨時都可以搵老細傾，上午諗到既野，下午就可以做勒，你話好好哩。

我度果條橋已經獲得老細既支持，已經進行中勒，希望可以快 d 為公司注入一批有實力既新客，令公司既生意上升得快 d。響傳統淡季都有生意升幅，亦都係菲菲挑戰自己既其中一環。再過幾日，就知可唔可以再創紀錄勒。