效率的真相

老細係一個思考型既人，九型人格入面既 5 號仔。優點係鍾意理性思考同埋分析，缺點係思考時間太長，導致決策效率太低，惡果就係我要成日開 turbo 去執行佢遲來的決定。都係果句，我地打工既唔可以埋怨老細決策慢，只可以用我地快速既行動去趕及所有 deadline。可能我同呢個老細打工都一段時間，都習慣左開恆 turbo 去做野，以補回佢思考既時間。不過呢樣野並唔係每個同事都可能做到。最近就聽到老細埋怨尖沙咀果位行政同事效率低。

本來性急既我初初都認為果位同事效率麻麻，不過慢慢體會到，唔係人人都頂得順太遲既決策同埋太短既死線。都係我唔好，寵壞左老細，無論佢既決策有幾遲，只要真係唔好 over 左死線，我就一定攪得掂，久而久之，老細就會 take it for granted。果邊位同事返左工都冇一年，可能佢之前既老細唔駛諗咁耐，都仲有足夠時間比佢完成工作，所以唔多慣我地 "急速" 既節奏。而另一方面，佢仲未識得應付呢 d 情況既藝術。係呀，應付呢 d 情況係有藝術 ga。

舉個例，明知單野既死線係 30 號，我會同老細講死線係 25 號，留返 5 日 buffer，有咩事都有時間救 (最常見係老細 last minute 先至決定到)，如果早過死線完成又有 credit，你話幾盞鬼哩。呢 d 招數我常常用，所以老細一定覺得我有效率，因為就算佢好遲先至有決定，我都可以早過死線攪掂，你話幾 fantastic 哩！

打工真係要用腦的，唔係做野要用腦咁簡單，仲要做人方面都要用腦，咁先至命長久嘛。

希望新同事快 d 領會到呢下野啦，我唔方便教佢，因為呢 d 野一教左佢，老細好快就會知道我有呢道板斧，咁佢又會花多 5 日去做決定勒，到時死線就真係要死了。