二手貨

你地唔要既電腦同埋數碼相機會點處置呢？賣左佢？儲起佢？定係送比人？

我老爸同 Tiger 既二手貨就去左我度勒。好似我用緊果部 laptop 就係老爸既舊愛。自從佢買左部好鬼勁既新玩具之後，老媽子見佢有咁多電腦響屋企，就慫恿我老爸將呢部用左 3 年既舊愛比左我。好在咋，我都有一部同老爸既一模一樣既 laptop，不過已經比 Tiger 據為己有了。老爸呢部正好填補空缺。

上星期 Tiger 買左部數碼單鏡反光機，好鬼大部的。有左新歡之後，佢終於肯比返部 04 年買既 Cyber Shot 我勒。陰功，由佢最新出時買左到而家，先至真正去到我手，等到我頸都長呀。

點解菲菲要接收二手貨又唔買新的？原因都幾攪笑，我身邊最親既 2 位男士，都認為菲菲係電子產品白痴，所以唔會比 d 新買既野我用，只會等佢地買左新野之後先至比 d 舊野我。不過我又唔介意喎，因為我真係一個電子產品白痴，我驚 d 又貴又新既野去到我手會好快玩完，所以我都唔會主動去買呢 d 「玩具」的。連我部手機都係 Tiger 話好我先至買咋，我真係唔識分咩叫好，咩叫唔好，我淨係知有得用就得勒。