公平

做管理既人，好多時都要面對公平既問題。同事會響好多方面評估管理層夠唔夠公平。例如︰薪金、工作時間、工作性質、年資、表揚方式、責罰程度等等一大堆既野。職場本身就唔係一個輕鬆既地方，做管理層既更加唔輕鬆。先唔講責任同埋工作壓力，呢 d 野係人都知做管理既絕對要負更大既責任同埋壓力會比較大。淨係響處理同事間既公平問題都要好小心，尤其我既下屬係全女班，更加唔可以掉以輕心。

首先講下薪酬，其實我地同政府都係一樣，做得耐果班都係千禧年之後入職既，當時既人工大家都知唔會高得去邊。不過當時只要唔駛失業都已經還得神落，僱員根本冇討價還價既條件。而家薪酬全面上漲，最近我地請左位同事資歷稍低既叫價都高過店長，經討價後佢既人工都同資深既同事相若，如果呢單野爆左比同事知都幾地震。本來我地都唔想出咁高人工請新同事的，不過之前請左幾個人，壓左佢價之後，佢都係做唔長，因為佢搵到更有財力既僱主，好快就離我地而去。老細為左人手可以穩定 d，唯有出高少少人工，希望 d 同事唔好玩音樂椅，減輕請人同訓練既成本。至於舊人方面，因為我地係中小企，唔係話加就加，好多野要考慮，謬謬然加人工，好有可能令公司出現赤字，所以要做到同工同酬，相信短期內都幾難。

除左薪酬之外，工時都係另一問題。我地做服務業既，唔可能日日都準時收工，如果有客人仲響店內，都唔可以拉閘走人。往往最多時候需要 OT 做埋 d 客既就係資深美容師，因為佢地做得耐，多捧場客，做唔切就迫住要 OT 做埋 d 客。至於新人，夠鐘放工又冇客做既我地都會放佢地走，唔可能因為少數同事 OT 而要全店員工乾等兼硬蝕 OT 錢，所以形成新同事既工時比舊人短。呢 d 情況已經爆緊鑊，因為舊同事會覺得唔公平，人地可以準時走，佢地就要做夜 d，連僅餘既私人時間都剝削埋。

至於賞罰方面勒，正常係要賞罰分明的。不過有時新同事犯錯並唔一定係佢存心犯錯，有機會係佢不知者不罪，咁我地都唔可能下下見到有人犯錯都丙鑊甘既。之但係舊人犯錯，響某程度上都唔係第一次，於是佢地會比我地丙得甘 d，以佢地既理解，我地就係處事不公。讚揚方面更頭痛，新同事做得好當然要讚，因為要 keep 住佢地鐘意呢間公司，先至可以 keep 住佢地唔走。當然讚既野係有得讚先至讚，冇得讚都唔會夾硬黎。舊人就會覺得我地照顧新人，少左照顧佢地。女人始終都係愛比較的，你讚左某某一次，就必須要搵個機會讚另一位某某一次，如果唔係佢地就會覺得我地大細超，你都咪話唔頭痛。

最致命既係，老細對 2 間店都係大細超，我地做管理既要維護公正嚴明既形象就加倍吃力。老細係唔會責怪尖沙咀店既，佢地做成點都好，有冇數都好，都唔會有任何怨言的。不過我地就要負責跑埋尖沙咀唔夠既數，淨係呢點都好難服眾。大家都係打份工出份糧，點解老板娘間店就可以唔駛卒數，而我地就要比老細卒到命都冇？一句能者多勞係開脫唔到的，大家都有眼見，有感受，並唔係你三言兩語可以改變到不公平既印象的。響我果邊既美容師，平日比我卒都已經夠好受啦，跑左自己條數都仲要比人卒，背後既目的就係要做埋人地條數，雖然佣金照收姐，不過條氣唔順丫嘛。比著我做細果陣，跑夠就收工唱 K，絕對唔會因為其他同事冇數就大義凜然咁幫同事跑埋掛？有錢收都係咁話啦，一個半個月就當挑戰下自己姐，個個月都係咁，你當我係 "凱子" 呀？咁跑法，人都癲啦。

公平響我地公司，真係唔存在的。可惜既係，同事真係希望我地公平。

默哀…