派傳單

中小型美容院既推廣方式，冇連鎖美容院咁多款式。我地冇錢請代言人，冇咁多錢掃哂各大傳媒既全版廣告或者黃金廣告時段。我地只可以好似打遊擊咁出下細細既廣告版位，求傳媒黎寫下鱔稿之類黎增加一下知名度。都好在，我地美容院唔係大，所以每次廣告雖然只有十零廿隻 call in，都叫做 ok，因為太多新客反而會得失左舊客，每月大概二十個新客已經好足夠。不過，呢班新客只會去尖沙咀既店，我果邊係住宅區，唔響附近住既人係唔會專登黎的。加上我果區咩鐵都唔經，想搵下流水客都冇。

為左解決呢個問題，我果邊就會派好多傳單的。我地都肯花錢去設計傳單，好多客都讚我地既傳單靚。不過只係有靚傳單係冇用既，都要有人幫手派先得 ga。咁岩而家暑假，要搵暑期工派傳單實在太容易勒，不過班暑期工既工作態度真係不敢恭維。鐘意就唔返工，同佢地 set 好時間表，佢地又話早又話晏，要我地就佢既時間喎，究竟邊個打邊個工呀？上星期響勞工處又登左請派傳單既招聘廣告，一日之內接左 30 幾個電話，大部份都係暑期工，最後我只係取錄左 2 個中年女士，貪佢地盡責 d (希望)。

雖然派傳單唔係 d 有前途既工，不過公司都唔會白白花錢而得唔到效果嘛。有 d 盡責既派傳單員，唔單止會派，仲會帶埋個客黎，呢 d 就係 heart 勒。呢位派傳單亞姐人工比其他人高，不過絕對係值得既。