尋找精神食糧

趁今日《哈利波特》既結局篇開賣之際，就夥同我既十幾年老死銀狐一齊避開書展既人潮，去左書店搵下書，尋求下精神上既滿足。不過人算不如天算，原來間間書店都好多人…

第一站去左新既尖沙咀商務，果然名不虛傳，個環境真係好嘈。行左一個圈，有少少迷路 (其實菲菲本身就係路痴，大家唔駛覺得奇怪)，之後左搵右搵之下，只見有一坐山係特別搶眼的，冇錯，果坐山就係一大堆厚過辭海既《哈利波特》。繞過左坐山之後，想搵下 d 講性格學或者心理學既書，不過搵左一陣都搵唔到心頭好 (太深唔識睇，太淺又唔想睇~ XD)。正當有少少失望之際，銀狐就靜悄悄地遞上陶兆輝既新書 (可能唔係熱辣辣既新書，不過我未有呢本) 比我。嘩！果然係老死，唔駛講都知我想睇咩書，開心到丫~ 陶博士係其中一位我好喜愛既導師，佢既書我有齊哂，下次上佢堂時一定要搵佢簽返個名先。

離開商務時，我只係買左一本書，銀狐就冇斬獲，所以我地轉戰旺角既田園書店。

響暢銷書、新書、同埋講心理學既書架度搵呀搵都搵唔到想睇既書，真係有少少沮喪。銀狐就搵左 2 本佢果行既書，好開心咁準備散水。又係正當我想放棄之際，隨意望向歷史文學果邊，終於發現左第一本好野。果本書係 Q 版三十六計，哈哈哈~ 又幾得意喎，所以就揀左呢本。之後仲揀左一本漫畫榮格同埋一本講名人性格既書 (不過入面好多名人都已作古，冇得對照…)，對總算對今次既搵食之旅有所交待勒。

十年前我就好鍾意睇西方作者既著作，尤其好強勢咁講提升自己、激勵鬥志、挑戰目標、步向成功果一類既書。可能初初出社會做事，都想裝備一下自己，令自己盡快響社會度立足。同埋當時既菲菲最著重既就係個人成就，所以對呢一類書特別有興趣。不過呢類書睇得多，講黎講去都係幾幅被，響冇咩新意之下，漸漸都唔太想睇。

不過近呢一兩年，睇書既口味轉左，比較鍾意睇性格學、NLP、Coaching、瞭解人類同埋古人既學說，例如道德經、孫子兵法之類。雖然西方著作都有睇，不過比例就少左好多勒。而家開始對中國幾千年既智慧感興趣，所以都睇多左呢方面既書。可能銀狐既工作關係啦，佢一定會研究中國文化的，比佢薰陶之下都認識多左中國智慧，學下做龍的傳人嘛。