惡魔

響同事心目中，菲菲絕對係一個惡魔。如果要同菲菲閉門面談既話，同事們都驚恐萬分。

今天晚上冇乜客 (真大鑊！)，見大家冇野做，店長 Annie 提議大家開個會，同大家傾下計。內容首先圍繞昨日開會既事，同事們都講出自己既感受。講下講下，就講到同事們既相處上，大家都講出同事們既優點 (好丫，先講優點，有進步！)，再提出同事改善既地方，氣氛好一家人。講哂所有人，都自自然然講埋我，同事們對我既意見係︰最初覺得我好惡，好不近人情，有 d 冷血，不過相處一段時間之後，開始知道我都係打份工，好多時對佢地嚴苛都係出於職責所在，所以對我既抗拒都少左。

我都知我好強硬，因為初初做事時所有老頂都好強硬的，所以我理所當然地認為做出色既領袖必需要強硬。不過自從與 Annie 共事之後，就體會到領袖都可以好有愛。因為 Annie 對同事就好似家人咁，所以大家都好珍惜呢間公司，好少可有亞頭咁關心同事，開解同事，好似屋企入面既家姐一樣照顧班妹妹。情感上，同事係比較喜歡 Annie 的，佢係一個將軟硬兼施發揮得淋漓盡致既領袖。

仲有，昨日其中一位同事 Candy 本來係嬲左我的，經今日大家既交流，佢就冇再嬲我了。

我呢個惡魔，註定唔會得到同事既愛戴，不過我好清楚我要繼續向上爬，需要既係老細既信任，同事愛戴與否，唔係唔重要，不過唔係最重要。

公司內需要不同既人去做不同既事，既然大姐姐有 Annie 做，惡魔就由我做啦。