脾氣的背後

Candy 生性脾氣暴燥，少少事都大發雷霆，嬲哂成公司既人，一副生人勿近既模樣。佢與同事既之磨擦可謂天天新款，我都連續幾日既一早同佢有磨擦。同事冇義務忍受一個咁既同事響度，一時唔高興就發脾氣，發完脾氣就走去 tum 返人。頭果幾次呢 d 招數都當算駛得，不過日復日既情況底下，已經有同事 (包括我) 都唔會受佢果套，會以冷面孔回應佢。大家都係返工做野，冇人有權對其他人發脾氣，就算我同 Annie 有事要訓斥同事，不過絕對唔會用發脾氣黎招呼同事。

之前有同 Annie 傾過關於 Candy 既脾氣問題，研究過佢既行為模式，相信佢既家庭缺乏溫暖，同埋極度害怕受到傷害。為左保護自己，Candy 會採取先發制人既方式，惡過你，等你唔會埋佢身。諗深一層，其實佢係一條可憐蟲。Annie 同 Candy 比較熟，聽完我既講法之後，第一個反應係︰「你點知佢屋企 d 野 ga？」

「我唔知 ga，只係憑佢既行為推斷出黎咋。」

Annie 一臉狐疑，唔知我點樣估到。

其實好容易估，因為 Candy 既內心太渴望愛，家人比唔到愛佢，朋輩比唔到愛佢，同事更加比唔到愛佢，自不然會認為世上所有人都唔愛佢。為左保護自己脆弱的心靈，就會扮一隻生人勿近的刺蝟，咁就唔會比人傷害到勒。呢樣野，我已經暗中向 Candy 旁敲側擊咁問過佢，原來我既推斷真係冇錯。

家庭對於一個人既影響，真係非常之大！