講下傳銷

響我個新聞組既網友，最近傾開傳銷既問題，大部份人都認為傳銷係呃神騙鬼既。十幾年前已經接觸傳銷，都認識好多傳銷人，當中不乏當時得令既領袖，對傳銷界都有少少認識，就響度班門弄斧，講下傳銷啦。

我係主動接觸傳銷既，事緣我既畢業論文係講傳銷既成功之道，所以就主動去搵一 d 做得成功既傳銷領袖去瞭解一下。咁岩我有同學既朋友係傳銷領袖，所以就自動送上門同佢做左個訪問。之後仲訪問左好多其他傳銷商，漸漸都同佢地混熟左。臨畢業時都 join 左當時其中一間最勁既公司，其實都係玩玩下，諗住 d 人都幾好玩未就當做識下多 d 朋友。雖然我都唔算認真做，不過佢地既訓練都上到足，反正三行人必有我師，睇下傳銷界都好 ga。

自從自己既工作越黎越忙之後，都冇再續會勒，不過同班傳銷人都有聯絡，傳銷界既消息都仲幾靈通。時代不斷轉變，傳銷公司都有好多轉變，好多做得好既轉差，沉寂左既又返生，不斷有新公司湧現又不斷有公司離場。有 d 係正正當當做傳銷，有 d 比人拉人兼封舖，咩事都會發生。唯有不變既係，傳銷公司都係 sell 夢想，一個成功的夢想。

早幾年好多年青人都搵唔到工，唔想雙失既人部份走左去做傳銷。傳銷公司係另一個夢工場，好識得諦造年青創富神話，表面上只要你肯努力就會發達。事實既真相係，佢地先要付出金錢時間同埋人面，先至有呢一個 "機會"。付出金錢同時間都唔緊要，就算唔成功都可以當係一種學習，不過付出寶貴友誼就未免太沉重了。年青人有冇諗過，成功唔係單指搵到幾多錢，而係多方面呢？例如思維、處事、世情之類既東西…

傳銷式夢想係鼓吹搵到錢就萬能，到處受人尊重。唔認同呢套觀念既人就係負面同埋不思進取，仲惡過邪教。冇錯冇錢真係萬萬不能，不過世上可以搵錢既途徑何其多！而其他搵錢既途徑都需要付出努力，不過唔需要你蒙蔽自己來出賣人面，利害衝突響邊，識得理性分析既人既應該好清楚。

我所認識既傳銷領袖，大部份都轉行了。根據佢地既詮釋，跳左出傳銷既框框，原來更海闊天空！