儀態

有吸引力既女士一定要有儀態，但儀態並唔係行路扭下檸下，拎野時翹起手指尾既表面功夫，係有內功要修的。外表好似好有儀態既女仔，都會做出極冇儀態既事，令人倒盡胃口，尤其男士會避之則吉，單身女士密切留意以下貼士！以下係幾種公共交通工具會見到既事，全部響菲菲眼中，甚至係廣大既男士眼中都係儀態盡失兼扣哂分既表現。

自踏入社會做事開始，菲菲返工去街都必定會化妝，因為化妝係女士既基本禮貌。每日都會化好妝梳好頭照哂鏡先至出門口。好多時響公共交通工具度見 d 女仔化妝，真係覺得好冇儀態。我只可以接受女仔補妝，即係補少少粉或者補下唇膏之類。但係真係接受唔到響架車度示範變瞼，由豬扒變貂嬋，將女性神秘既一面咁坦蕩蕩呈現響群眾面前，太嘔心了。化妝係一種禮貌，響公共場合化妝就係冇禮貌。尤其好多女仔化妝時都會有好多面部表情變化，無論你化完妝時有幾靚都好，一見你化妝時既各種表情，真係好趕客。

化妝都事少，最少唔影響到人，只要你唔望佢就冇事。有時見女士心急整理儀容，會響車度剪指甲。呢下野菲菲真係頂唔到。果 d 啪啪聲都已經夠刺耳，加埋 d 指甲碎好似放煙花咁周圍彈，真係好駭人！咁唔衛生，無論你有幾靚都好，咩分都扣哂啦。

仲有一樣係響架車度食野，表演各式既食相。菲菲真係唔明點解要響架車度食野。乜香港人既生活真係忙到連坐低食野既時間都冇？定係想比大家知，佢既 time management 一流，連搭車既時間都唔放過，要搵 d 事黎做下填左個空檔？認真費解… 菲菲自問工作都幾忙，工時都算長，但係都會有時間坐定定食下飯，所以真係唔多明…

大聲講電話 (中間仲要夾雜大量粗口同埋人地既事非)、廣播 MP3 (懶型)、個 NDS / PSP 開哂喇叭咁玩 、同友伴大聲談笑之類，全部響菲菲眼中都係無儀態既行為。無論你個手袋有幾貴，套衫有幾靚，個電話有幾新款，身材有幾索都係 side 氣，有以上是但一種行為已經夠哂，只會比人冠以貶義既「港女」稱號。香港既女士們，係時候反思一下，吸引力唔係你黎自你既既外表，係源自你既行為同埋內涵。