奇妙旅程

響短短二十四小時之內，我經歷左一次奇妙旅程。

昨晚我決定左響今日既例會要以正能量去鼓勵同事，但係決定歸決定，心中總係有種不能言喻的忐忑。返到公司，準備好哂開會既資料，就召開我店既每週例會。開始時大家既氣氛都好 relax，不過我就覺得似鬆散多 d。第一個議題係檢討各人業績，大家既業績都好強差人意。我問佢地滿唔滿意自己既業績，個個都面帶笑容咁話唔滿意，好交行貨既態度。當時一時忍唔住點點怒火，就叫佢地認真 d 講下自己有咩需要改善。佢地又係交行貨，話努力 d 啦，大包圍啦，諸如此類冇內容既空話。就響呢個時候，我改變了主意。

檢討業績既目的，唔係交功課比老細睇，係為自己月尾份糧作好打算，佢地咁鬆散既態度實在唔可能令業績有咩改善，於是我當頭棒喝咁訓示佢地。講到一半，雯雯忍唔住喊起上黎，之後另一位事 Candy 都一齊喊。雯雯同 Candy 都係資深既同事，佢地認為自己已經盡哂力，公司都唔體恤，太不近人情了。見佢地喊到收唔到聲，於是 take 左個 break。

Break 完之後，雯雯走左出黎，同大家講︰『其實我地都好盡力去做，有時多野做到連飯都冇得食，但係公司都唔體諒我地既情況。』講完就走返埋位，咁我問老細︰『你有冇野想發表一下？』老細話冇，咁我就繼續會議。氣氛明顯係沉重左，大家都認為我係衰人，係迫害佢地既幫兇，所以大家都冇心機再聽落去。黎到呢度，放下嚴肅既面孔，同佢地講︰『我都知大家辛苦，我日日響度同大家一齊，你以為我會唔知咩？大家都係搭埋一隻船，我都唔想隻船沉 ga。同大家檢討業績，就係想你地好…』說話都未完，我一時感觸都眼框紅紅。感觸既係，我都係打工，我既責任就係要卒數，因為要向老細交待。不過同事們既努力都不可抹殺，響手掌又係肉，手心又係肉既情況下，我都動左惻隱之心。

會後，心情好複雜，有少少沉重，有少少釋懷。沉重既係我又比左壓力同事，令佢地不安，違背左我要鼓勵佢地既原意。釋懷既係，我都盡左自己應盡既責任，不會被老細責怪我包庇同事。雯雯食飯時同我講，知道我今日訓示佢地都係職責所在，仲加左少少同情分比我 tim。有少少出人意見哩，比我鬧完仲會同情我。反而 Candy 就嬲左我，佢認為我訓示佢係唔體諒佢，絕對係大反派。

之後我打電話比尖沙咀既行政同事 Louis 收下風，問下老細見到班女仔喊哂有咩反應。Louis 話老細覺得好奇怪，都唔明 d 女仔點解喊。哈哈哈！果然係 5 號仔作風，情感天線開叉的。不過當時我仲係有 d 耿耿於懷，老細係冷血動物喎…

傍晚時份，Louis 打電話黎申訴，老細今日丙佢工作效率低，黑色暴雨警告仍然生效。不過我有工作要匯報，都一定要搵老細 report 一下。硬住頭皮都要搵佢啦，電話接通前，我估老細 d 聲氣應該係麻麻的，不過我竟然估錯，佢心情似乎幾愉快。同佢傾下傾下，知道佢對我今朝訓示班同事極度支持，因為我代佢出左口悶氣，叫我聽日去尖沙咀開例會時都要 keep 住咁嚴厲。哈哈哈~ 買大開細 tim~

佢既言語間透露左佢唔多滿意 Louis 既工作效率同埋佢老婆既心不在焉。一聽到呢度，我條天線即時 "叮" 一聲，係時候勒！老細對尖沙咀既信任動搖勒，係我翻身取回發球權既時候勒！首先試探一下我有冇捉錯路先。我同老細講︰『大家性格唔同，佢地比較中庸 d，不過有時可以企得硬 d 既。例如尖沙咀既同事出問題，佢地可以第一時間處理既就處理左先，如果次次都等我去開會先至訓示同事，都已經太遲了。』語畢，老細大表讚同。冇試錯位，繼續！

之後我就講左尖沙咀需要改善既地方，老細叫我聽日唔駛客氣，一定要響開會時全部拎哂出黎處理，對象除左同事之外，仲有老板娘 (有私心 ga 我，仲唔報仇咁報？今次奉旨處理埋佢)！近排好耐都冇試過同老細傾成個幾鐘電話，比佢宣洩下冤屈氣時，我又赻機搶返個發球權，妙極！

老細既言語間，佢好 buy 我今日既強硬作風，好似洗太平地咁清洗佢地散漫既工作態度，開正我果瓣啦。仲有，今日放工埋數時，我店生意不錯呀，雯雯仲開左張大單，佢不單止冇沮喪，仲好積極 tim，好彩冇押錯注。職場，同鬥獸場冇分別，響某 d 情況下唔係你死就係我亡，唔想死，就要繼續鬥落去…

本來今日返工時心情沉重，開會時更沉重，彷彿直插谷底。不過中午過後，知道對手失勢，老細重新信任我，同事又做到野，開心到爆呀！呢一日既心情變化，認真奇妙。