黑色暴雨

呢排老細既心情，好似掛左黑色暴雨警告咁，好得人驚。連日黎既黑口黑面不特止，日日問住 d 生意進度 (就係呢幾日生意嘛嘛)，同埋問我地有咩具體方法去解決。我、店長同埋尖沙咀既同事都因為危城告急都傾左幾次，我地 agree 左幾個方案，派左和平使者 (即係尖沙咀果位同事) 去同老細傾。傾左幾粒鐘之後，結果係佢比老細 KO 左，即係 ban 哂我地所有建議。老細要我地鬧 d 同事，要佢地負責云云。又話我地諗 d 野要佢洗錢 (Total budget <$10,000)，話我地敗家喎。仲有，佢認為佢老婆既功勞好大，我地唔可以抹殺左佢既貢獻。

我唔知老細點去衡量 "功勞"，不過我按照最簡單既方式去衡量功過。我地公司全民皆兵，即係人人都要 sell 野，咁最簡單就係計下位同事一個月做幾多錢生意，係佢既人工幾多倍。最差既同事都幫公司搵得返佢份人工，當然扣除皮費都要蝕啦，不過賬面上叫做平衡到。老板娘既 "人工" 遠比佢既生產力低，我只可以說服自己，果一筆唔係薪酬，係家用，咁我會好過少少。

講返我地比人 ban 哂 d 建議勒，我真係覺得好沮喪，因為我地度既野唔係求其亂 up，真係因應左實際環境而度既，全部比佢 ban 哂，我真係 down 左半日。聽日要同班同事開會勒，我真係唔想鬧佢地，因為而家最需要做既係鼓勵，鬧係唔會鬧出成績的，尤其係全女班，負面情緒會蔓延得好快。早排都有人想辭職，好不容易先至挽留到，我唔想鬧一鬧會收到幾封辭職信。冇人，點跑數？

撫心自問，2 間店既同事都算係有心做既，不過佢地有好多野需要提升咁解姐。我地應該提升佢地既能力，而唔係鬧。我諗，聽日我都係唔會鬧人，情願開完會之後比老細丙。我比佢丙下又唔會死既，不過 d 同事無心戀戰就大件事勒。