強

呢幾日既事情發展得太快勒，都黎唔切消化，事情又在進展中了。今天我收工時知道雯雯做左張大單，都幾開心，因為佢正在為自己既本週目標博命，可喜可賀！到佢地收舖時，Annie 比電話我報喜，今日共開左 3 單大野，條數靚仔非常。

之前老細認為我太強硬，成日攪喊同事，令同事有壓力，結果呢班嬌嬌女係跑唔到公司要求既數。之後佢又認為我唔夠強硬，d 工作氣氛太散漫，所以生意不濟。

魔鬼又好，天使又好，老細要我做邊樣都得，不過個人認為要鍛鍊出優秀既銷售隊伍，用強係必須的。用強硬既方式唔代表我心理變態，前文都提及過，做銷售既心態好重要，如果連比上司丙幾野都頂唔住既，唔好意思，你都係做返份文職算把啦。用強，有好多好處的。首先可以鍛鍊下屬，仲可以做到汰弱留強既效果，咁隊 team 自然會好 fit。另外，fit 既 sales 都好有自信，如果跟著件縮頭烏龜，一係個上司比 d sales 蝦返轉頭，一係 d fit 馬走哂，條 team 永世都起唔返。

所以我漸漸理解點解我以前 d 上司會咁兇狠，做唔到數會比佢鬧到無地自容。其實佢地都係訓練緊我既心態，如果我頂唔住，而家個 blog 就冇呢 d 話題可以寫了。為了造福香港既下一代，我都會繼續兇狠下去，令更多人有更堅毅不屈既心態。香港，極需要堅毅既人！