壓力

奉老細之命連續 2 日去不同分店卒數，公佈左好多銷售上面既數字，現實係殘酷的，要面對需要好大既勇氣。2 間店都係，一公佈詳細數字，知道自己有幾不濟時，好多同事都流下眼淚。尤其係尖沙咀店，所有數字都慘不忍睹，有位同事更喊足全個會議。

我都係做 sales 出身，比上頭卒數係必然既事。做得銷售既，就要預左自己身負重任，因為響某程度上，公司既生死存亡都交托響銷售人員身上。而家既同事比較 "唔話得"，一卒數就流眼淚。好在老細將呢個殘酷既工作交比我，因為 Louis 始終係男士，對女同事唔多唔少都有惻隱之心，見到女同事流哂眼淚，仲忍心卒落去嗎？因為我都係女仔，又係做銷售出身，對卒數時既各種情況都有哂心理準備，唔會輕易因為同事喊就心軟。有一句說話常常對同事講，就係︰你對客人仁慈即係對自己殘忍。套用響銷售管理方面，就係︰對同事仁慈就係對公司既業績殘忍。

銷售人員最基本既素質係要心態夠強。銷售既工作真係唔容易，又要努力排除萬難跑數，又要應付公司無止境既要求，又要面對收入不穩定既壓力，一大堆都需要極強既心態先至可以做到。如果連公司卒數都頂唔住，真係要認真考慮一下，應該提升自己去達成目標丫？定係要轉行呢？中小企既經濟壓力一向都好高，要響市場上站得住腳，跑數真係指定動作。

老細見同事們都抵唔住卒數，都幾激氣。不過最激氣都唔係班同事，係佢老婆。會後，老細召開高層會議，問大家對同事既既反應有咩意見。大家都認為同事太溫室小花，少少事都支持唔住。因為我只係公佈數字同埋問解決方法，都冇鬧，咁都卒得好溫和丫。佢老婆就持反對意見，認為同事已經盡哂力，係客人有問題，所以開唔到單。Oh my God！唔係下化？客人冇責任同你開單 ga，係做銷售既人負責令客人開單先至岩喎，呢 d 咩邏輯呀？老細響呢個時候按捺不住，同佢老婆嘈起上黎，講都火起仲想趕佢老婆出會議室。

呢下野都幾增廣見聞 ga，打左咁耐工，從來都未見過亦都未試過老細下令某人離開會議室，對象仲要係佢老婆，你都咪話唔刺激！不過佢鬧還鬧，都冇真係趕佢出去。之後議題講到訓練方面，老細想我加強尖沙咀既訓練，我當然冇問題啦。不過問題係佢想我一日之內走幾轉，我就有少少意見勒。咁我提出不如做訓練果一日遲一小時返工啦，反正我都唔會準時放工的，咁又可以唔駛走黎走去咁費時失事。呢個時候，老板娘想還擊，問我︰『你咁夜放工有咩做呀？』我都費事理佢，反擊都搵 d 有智慧 d 既方式丫，我 OT 又唔駛公司補水既，你理得我幾點放工同埋做 D 咩丫。同埋好多時晚上都係同老細電話會議既時間，我有咩做，老細最清楚。

講返壓力，同事唔習慣工作壓力，響某程度上我可以理解。不過身為老板娘，唔單止唔著緊公司既生意，仲同 D 同事企埋同一陣線反駁公司既合理要求，真係不可思議！

呢件事仲有下文的，留待真正發生時再講啦。