度橋

我既工作成日都要度橋，即係諗計仔。要諗既範圍包括推廣項目、激勵士氣、應付同事同埋最緊要係應付老細 XD。諗野已經成為我生活既一部份，行街又諗，返工又諗，連頭先沖沖下涼都度到計仔。

事緣老細今日下旨要我諗下響餘下既一星期點樣可以追多 30% 既營業額，幫補下火災損失左既生意。呢個波我接到應哂，交唔到波，因為我想同 Annie 一齊度下橋時，佢冷冷的一句︰「你諗啦，我諗唔到。」就閃左勒。當時心中有氣 ga，不過算啦，如果佢都諗到，老細就唔會叫我諗啦。

返屋企既路上，諗黎諗去都冇咩頭緒 (忽然醒起唔知邊個講過，創作係孤獨的，應哂！)，返到屋企時諗到唔想諗就放棄勒，聽日再諗過啦。於是走左去沖涼，可能比水淋下，個人醒左 d，即刻有一條極簡單又多元化既橋「叮」左我一野，呢個 idea 可以吸引多個範疇既新客，又唔駛大量既準備功夫，正呀！當然，橋既內容就不便透露勒，呢 d 咁精警既野絕對係商業秘密，到有行家跟風時再同大家講啦。好多時我度既橋，好快就有行家跟風，所以我地要不停轉新橋，等佢地想追都追唔切。哈哈哈~

今晚有覺好訓勒，YEAH！