禮物

臨收工時，有個女仔捧住一個好大既盒黎到我地舖頭搵其中一位美容師雯雯。雯雯好奇怪點解會有一個唔相識既女仔會比一個大盒佢，但係個女仔冇表明身份，只係話個盒係雯雯既男友送比佢既就走左勒。我地都好奇怪，因為雯雯係冇男朋友既。之後打開個盒一睇，入面全部都係零食，仲有一張印刷精美既字條。雯雯開心到失控，又唔知邊個送份咁貼心既禮物比佢。正當佢不知所措時，我發現字條上係有署名既，於是佢就即時打電話比對方，對方原來就響附近，就約左今晚食飯。

之後雯雯問我︰『佢送咁大盒零食比我，係唔係追我呀？』唔係下化？無啦啦送咁大盒零食，印埋字條仲響附近等你，唔係追你係咩呀？咁都要問？哈哈哈~ 見到佢咁開心，都感染到少少溫馨既感覺。

響返屋企既途中，不自覺地諗起自己以前都收過 d 好有心思或者係好感動既禮物。禮物唔需要貴重，當中既心思真係千金難求。淨係近呢幾年都有唔少︰

1. 2004年既生日收到我最好既朋友的一隻生日熊匙扣，到而家仲同我 d 鎖匙扣埋一齊
2. 2005年既生日收到一位傾慕者送既 Little Twin Stars 公仔，原來我幾十歲人都有人認為我係小妹妹… 同埋唔知佢係咁岩撞中定係知道，我最愛既唔係吉蒂貓，係 Little Twin Stars，都好開心 ga (不過我有男友，佢冇機會了)
3. 都係 2005年既生日，一位日本料理廚神 (有獎為證，堅係廚神) 整左個 Cheese Cake 比我，我既至愛黎的！
4. 上年生日有位朋友用我個名整左個心口針送比我，好獨一無二呀！
5. 上個月我遇到小意外破左少少相，亞媽比左佢戴左好多年既玉墜我，媽媽真偉大！
6. 今個月我男友終於第一次 (識左八年先至係第一次) 送左條頸鍊比我，等到我頸都長呀，戴多幾條都得！ XD

太多勒，唔數勒…

一份有心思既禮物，我係唔會忘記的。我真係好幸運，有好多人錫我，生活再辛苦都有呢 d 甘露滋潤下，即刻變得燦爛好多。