緊急工作調動

經昨日老細同老板娘開火之後，今日老細黎搵我傾有關尖沙咀既工作安排。據老細既最新指示，我店要抽調一位美容師過尖沙咀，因為唔會再安排客人比老板娘做。至於行政工作方面，Louis 會繼續負責果邊既行政工作，老細就按照我定下既 benchmark 去 check 佢既工作進度 (呢 d 野我唔方便出面，所以由老細做)。訓練方面，我 keep 返我果 part，再加店務管理，而我既好拍檔 Annie 就會幫手做技術訓練。工作大綱會響星期一既管理層例會度 "討論"，其實係宣佈，因為老細明顯信唔過由 Louis 一個人攪尖沙咀既行政工作。老細既顧慮係，除左佢工作效率唔高之外，就係太過 "和平使者"。當公司有壓力或者新行政措施頒佈出黎時，有時都會遇到同事既反對情緒，Louis 會偏向安撫同事。就係佢唔想同事太有反向既情緒，形成響執行方面就唔夠落力勒。公司既政策要推行，好靠行政既同事跟進得好唔好。如果政策頒佈左唔執行，頒佈黎做咩？

呢一刻，老細好強政勵治 feel。老板娘既工作問題已經纏繞左大家好耐，因為昨日既導火線，令老細痛下決心要整頓尖沙咀既所有野。Annie 對老細既決定有少少質疑，驚佢三分鐘熱度，攪攪下又比返老板娘攪，咁就冇癮勒。呢樣就唔擔心得咁多，如果老細容忍到比佢老婆再攪亂檔既話，我打工既只會接受安排，不過會先提醒老細前車可鑑，如果佢一意孤行既我都唔會阻止。始終，佢同佢老婆先至係股東，唔通我可以左右人地兩公婆既事咩？