清晰

清晰、公開同埋公平，係菲菲一貫做管理的法則。

管理銷售隊伍，要有清晰的目標，不可以用 "越多越好" 黎做標準。銷售人員要知道做到咩數先至叫做達標，再做幾多先至叫做有獎，要做到幾盡先至係 No. 1。咁不但可以令銷售人員知自己仲要做幾多野，仲可以令管理層知道銷售人員既實際狀況。而制定目標方面，會先考慮公司既需要，即係要搵幾多錢。呢個目標絕不可以馬虎了事，如果訂得太高，只會令同事覺得遙不可及，失去動力跑數。如果訂得太低，公司會有財政危機。同埋每個人既目標都唔會一樣，要視乎個人能力而設計，但差距又唔可以太大，免得同事認為公司不公平。因為狽重數既同事會認為公司偏幫唔駛狽咁多數既同事，所以定目標都係一門藝術。

為左令同事有良性競爭，每週例會都會公開每一位同事既業績同埋達標率。咁大家就可以知道自己合唔合格，仲有幾多數要做。如果要嬴其他同事仲要做多幾多野，仲有比領先既同事知道佢地好有可能會比人追上。響公開業績時，除非成績太差，基本上都唔會採取勁卒既態度。如果想真正達成良性競爭既局面，要大力褒獎做得好或者個人達標率高既同事。人人都希望自己被褒獎，所以都會暗中落力，希望下次輪到自己嘛。

公平方面，就係響處理跑數以外既一切事務時必須遵守既規則。美容院全女班，最唔好比 d 同事覺得你大細超，咁就會間接幫佢地形成小圈子。我諗冇一個老細鍾意見到自己公司分黨分派，攪事攪非，浪費精力響無謂既鬥爭上。所以做一個識撈既管理，暗中控制小圈子活動係非常重要的。點解要暗中呢？因為事實上一大班女仔，要完全冇小圈子係妄想，做管理既唔係要打壓小圈子，而係要正面運用佢地既力量。圈內人團結，會互相幫忙開單做客，好多野都唔駛你煩。如果一圈人要對付令一圈人，管理層先至需要出手攪掂佢。不過攪掂既方式都唔可以用硬功，一定要用軟功。因為是但一幫以為你係幫緊另一個圈子既話，就永遠都管唔掂佢地，佢地已經標籤左你係某一圈既代言人，呢一樣要最小心。

雖然女人係感情既動物，不過響工作上都要運用理性去管，用感性去理，先至會事半功倍。