開會快閃黨

唔知大家一星期要用幾多小時開會呢？我既開會"里數"都幾多，如果可以用開會時間換機票，分分鐘歐洲來回機票都換到。保守計算過，我一星期起碼要開 20 小時會議，有時老細興起可以開馬拉松會議，最高紀錄係由 11:00 直踩至 18:00，集中力少 d 都頂唔住。有睇呢度既朋友都知我老細好叻回帶，一件事可以講左十幾次都叫做未有定案，成日都議而不決，但係決左就即刻要行，戰鬥力少 d 都趕唔到死線。

今日去左尖沙咀開每週例會，開左幾粒鐘之後諗住走人，點知見佢仲有野講，終於扮要同 d 同事訓話，閃左。呵呵呵~ 之後尖沙咀既同事仲話我冇義氣，竟然唔留低一齊作戰云云。你估我第一日返工咩，明知老細都係響度重播舊議題，有得閃仲唔閃？之後老細話要問左我既意見先至可以決定喎，好明顯係問左都仲要討論幾粒鐘，所以由得佢自己諗下先。

適逢今日係星期一，可以準時收工，我仲唔把握時機返自己 office 等夠鐘？平時博到幾多點都得，人地有 Happy Friday，我有 Happy Monday，梗係要對自己好 d 啦，如果唔係點頂到星期六呀？我星期六都要返工嘛，叉唔夠電好易玩完~