動腦筋

剛才做左陣銷售訓練，主要都係訓練佢地講解美容療程既方法。有位同事 Pansy 好努力咁抄筆記，抄左一大堆之後，我就叫佢試講一次比我聽。講既過程資料都叫做足夠，不過完全冇說服力，越聽越悶，又點會打動到客人呢？

年資比較長既雯雯就提議 Pansy 要多動腦筋，唔可以將知識好似搬字過紙咁唸比客人聽，客人黎美容院既目的唔係黎上課，如果客人黎到次次都要聽一大段資料同理論，係極度趕客的。雯雯唔係得個講字 ga，佢即刻示範左如果將資料同埋理論溶入與客人有關既事物，令到客人有興趣繼續聽落去，仲令客人覺得好值得嘗試，咁就有銷售既效果勒。

雯雯示範完之後，就叫 Pansy 試講一次，佢就話自己個腦一片空白，咩都諗唔到，所以唔肯講。都未等我出手，雯雯已經忍唔住話佢勒。「做美容師唔係單靠手勢好就搵到食 ga，你要比客人知道你有幾專業同埋有幾細心，佢地先至會幫赻你 ga。唔可以次次問親你野都話一片空白 ga，除非你唔駛出糧就可以唔駛用腦勒。尤其而家競爭咁大，唔用多 d 腦係搵唔到食 ga！我地話你唔係要針對你，係想你好先至叫你諗多 d 野，我都唔可以次次都響你身邊幫你 sell 埋 ga，你都唔想做黎做去都冇進步掛？」

呢番說話由同事講出，比起由我講出既說服力大好多。因為唔係我一廂情願硬塞 d 野比佢，而係由有實力既同事話比佢知，希望 Pansy 真係會明白同事既苦心同埋當中既道理啦。

見到雯雯有咁大既進步，由唔識至到識，而家仲識教同事，我都好鼓舞 ga。以前我既導師有一句名言︰「你既成績代表左我既成績。」所以同事既成績即係我既成績，見到佢地唔單止學識我教既野，仲學識自己學習同埋繼承教學相長既精神，如願足矣！