網上欺凌

大家有試過嗎？嚴重既好彩我都未試過，不過響網上比人不斷挑釁就試得多。

早幾年響某新聞組度開左幾個谷做版主，好開心認識左一班志同道合既網友，仲時不時會攪活動成班人出黎玩，遊走虛實之間，實在好響往。

不過有時發表下意見，有人唔同意你既講法既，就會用多角度去質疑下你。又或者有版友想問下你野，諗住你係版主一定咩都識，當你表示有野係唔識既時候，就會成為眾矢之的。本著越辯越明既正面討論形式當然好歡迎啦，但係香港人既怨氣普遍都好高 (尤其係新聞組，唔知點解好多 "活躍" 份子既思維都幾負面的)，佢地會將版主形象化為權力人物，為左宣洩現實社會對權力的不滿，會對版主作多方面既挑釁。所以，呢 d 挑釁我真係試唔少。初時覺得自己好無辜，經過幾次比人挑釁或者騷擾之後，都睇化了。人地要炸你版、將你個 email 周圍去咸網同徵友網度登記、響其他知名新聞組度唱你… 都係人地既 "自由"，我已經不會理會呢 d 事同埋呢 d 人。反正佢地既耐性有限，唔玩得幾耐，試過最耐既都係玩左我一個月左右。

轉個角度睇，我又無損失既，不過佢就要花時間心機去 "玩" 我之嘛。唔知佢係玩緊我丫？定係玩緊自己呢？

多番回應，只會越描越黑。只要不回應，事情好快會過去。網上，同娛樂圈有分別嗎？有人攻擊你，證明你既野係有人睇的。萬一遇到呢 d 事，唔需要唔開心，正義係企響堅強既人身邊的。