趕客

今日同我地合作左一年既設計公司炒左一鑊，好大可能影響我地繼續合作既基礎。事緣我地上個月傾續約既事，佢地不斷話今年既成本上漲同埋佢地接左好多大客，價錢方面需要調整同埋可能冇時間同我地做。佢仲不斷講我地應該撥多幾倍 budget 做 marketing，言下之意係嫌我地比得錢少。到呢度，我已經覺得唔多 like，我地公司雖然係細公司，不過我地衰衰地都叫做係客丫，有乜可能同我地講我地比唔起錢同埋唔夠人地大姐，咁即係點？本來續約呢單野都應該係告吹勒，佢又返轉頭同我地傾條件，話價錢方面有商量，大家可以再傾。咁佢就 "皇恩浩蕩" 咁比個 special price 我，希望我地可以繼續合作。於是佢地比左 2 個 quote 我地，想我地 2 選 1，當中佢地仲應承幫我地做 product photo shoot，幫助我地推產品。響呢個時候，老細都覺得我地黎緊呢一年都要做多 d 產品推廣，同埋佢新報既價錢都 OK，所以我地因應我地既需要，選左平 d 既 plan。之後大家都簽好哂合約，正式啟動今年既工作勒。

昨日，我 send 左份 draft 比設計公司果邊，希望佢地幫我整一個 ad，仲要影埋產品相，點知佢反口話我地個 plan 係唔包影相的。唔係掛？當初就係因為佢肯幫我地影相，我地先至重新考慮續約既問題，而家簽左約就唔肯影？冇理由掛？之後佢話份約冇包影相喎，乜你冇睇清楚先至簽咩？ (約唔係我簽的，之後問返老細先至知真係冇呢個 term) 簽約既野，我承認公司響處理呢方面係有疏忽，不過佢地蓄意將傾好左既條件不列入合約之內，居心何在？

仲未完，佢仲夠膽搬返 D 陳腔濫調出黎，話我地比唔起錢，佢又接左好多大客，之後唔會再做 SME 既生意，又話我地 join 個平既 plan 係唔包影相的。佢仲話我地攞著數攞得盡，做野唔好咁 tricky，好似我地唔岩咁。聽到我火到黎，一路以黎我地簽約既基石原來係一個騙局！蓄意唔列入呢點，唔知邊個 tricky 呢？

雖然我真係好興，不過本住解決事情既心態，我都問佢而家單野點解決先？佢話都可以解決既，就係報返個價比我地影相 lor。唔係下化？呢 d 唔係叫解決辦法，係趁火打劫呀！傾到呢度都冇野可傾，大家冇可能達成共識，佢話既然大家有信任既問題，可以 terminate 左張約佢。

好老實講，我地要換設計公司實在太易勒，已經有幾間 stand by 等我地答應，而家佢咁樣即係明趕客，嫌我單生意細，故意搵件事黎炒一鑊，之後各不相干。OK，我地雖然係細公司，不過我地比得出黎既都係真金白銀，從不拖數，亦好尊重佢既死線，換黎既係一種侮辱，好興！

換設計公司就梗 ga 勒，呢單野比我學識左幾樣野︰

1. 就算份約唔係我簽都要跟返，起碼老細簽之前係保持儘量安全合理
2. 我唔會再比任何單一公司縛住我地既計劃，之前我地真係冇咁多錢，先至侷住簽死一間，而家我地會搵起碼 2 間去做，有良性競爭之餘我地仲可以確保唔會比一間公司撬起哂我地既 plan
3. 中小企都唔係好蝦既，我唔再容許任何人以我地既規模黎侮辱我地比唔起錢

客人無論大好細好，都叫做係客丫，就算你要趕客，都可以用一個好 d 既方法丫。既然佢唔想做我地生意，就請唔好比個 tricky 既 quote 我，咁樣，只會影響佢既商譽。