激勵

數數日曆，已經廿八號勒，公司響三十號截數，一眾同事都為自己今個月份糧博哂老命，實在可喜可賀。之不過我呢個魔鬼煉金術師並非浪得虛名的，雖然生意不錯，但係響呢幾日都仲落哂重藥再谷恆 d 士氣，希望我店可以更有成績，令同事搵多 d 錢同埋威返舖，咁就功德無量勒。

2 間店既人口分佈不平衡，我店 fit 馬多，所以大家必須要出準力先至爭到餅仔，而另一間店都幾人才凋零，只有一位同事算係有實力之士，其他人都只係 hea 下等出糧果隻，所以果位同事可以攬哂全店八成既生意，結果係佢條數一支獨秀。公司每個月既營業獎金幾乎個個月都係佢袋哂，不過依我所見，唔係佢特別叻，而係佢既同事特別懶，所以造就左佢生意好似特別好姐。於我店，因為勢均力敵既關係，幾位同事都要加幾倍努力羸哂 d 對手先至有機會袋下獎金。今個月，有位同事特別勇猛，今日單日已經追左一大截數，於是我再落多味藥比佢，鼓勵佢發力跑埋呢幾日，誓要拎返次每月獎金，威比其他人睇，證明佢係堅料黎既。

呢 d 招數唔可以成日用，一定要響合適既時機用，如果唔係會失去效力，變左乾卒，會有反效果的。今日呢個時機出現勒，如果同事受落既，唔單止係佢吐氣揚眉既機會，仲係我店重掌總舵既機會，所以呢一舖一定要變魔術，奇蹟會降臨響願意付出既人身上。