淚水的意義

又係尖沙咀例會的日子，例牌地 d 同事又係鴉雀無聲連番悶場，尖沙咀的同事實在太冇反應勒。會議開到下半部，我建議大家輪流企出黎，講下對公司既感受，由最資深果位 S 同事開始。初初佢都唔知講咩好，經我同店長 (我既好拍檔) 引領之下，就開始講左少少野。不過都係 d 表面說話，講左一陣之後，我就趁機開啟左佢既既心扉。

當時我問︰『你響度做野有冇大家庭既感覺？』語畢，S 同事即刻眼濕濕，仲檸轉面喊起上黎。之後有另一位 Y 同事即時企左出黎同大家講︰『之前我做果份工既時間比較耐，所以大家都可以好似一家人咁，可以好 close。可能等我做得耐 d，就可以有大家庭既感覺。』佢一邊講一邊喊，好大感觸既一句說話。呢個時候，喊緊既 S 同事即時檸返轉頭面向我地，接住講︰『其實呢 d 唔係時間既問題。』言下之意，即係佢地唔係因為唔熟絡而有溝通障礙，而係因為其他野。第 3 位K 同事響呢個時候都已經忍唔住喊左出黎，亦都發表左佢既想法︰『之前我做果間公司，人事太複雜，好多是是非非，令人透不過氣，呢度人雖然少，但係唔會有是非杯葛呢 d 問題。我響舊公司比同事杯葛，覺得好難受，明知提早解約要賠錢，都冇辦法留低，呢度既同事都好好，做野都好開心。』

S 同事一邊抹眼淚一邊講︰『其實響呢度，開到單唔係只係為左錢，都好想有人鼓勵下，比下建議我地，有時個腦實哂都唔知同客人講咩好，自己一個又未必諗到咁多，其實公司既訓練真係幫左我好多，好多時我用返你地教既野去同客講都好成功，如果可以多 d 提點同鼓勵，我地會做得更開心。』響呢一刻，雖然佢地全部都喊都個妝溶哂，但係呢一刻佢地既剖白令我覺得佢地好美麗，一種發自內心的美麗。我都好開心佢地肯講出心中既說話，同埋同事肯定我地既工作，當時我既喜悅係難以形容的。做訓練既人，遇到呢一刻最感動。

之後佢地仲互相道歉，因為平日工作上都有少少磨擦，慢慢變成誤會，大家都趁呢個機會向同事致歉，同樣大家都冰釋前嫌，破涕為笑。呢一刻，我感受到佢地開始願意為呢個大家庭貢獻自己，亦感受到佢地開始互相信任同埋接納。我真心希望每一位同事都視同事如家人一樣，只有互助互愛，先至可以真正發揮出團隊精神，同事先至有歸屬感。

會後，老細同我地幾個管理層開會，佢問我地對呢件事有咩睇法。我既睇法係，終於破冰了，溝通源自信任，今日佢地願意坦誠面對，絕對係好開始。眼淚，真的很有意義。

後記︰
尖沙咀既行政同事，見所有同事都哭成淚人，有 d 手足無措，曾示意店長打圓場，好在店長冇咁做。咁難得佢地願意講心底話，冇理由要阻止佢地的。唔係每一間機構都願意花心思去瞭解員工既需要，唔係每一個地方都容得下赤子之心，既然佢地願意信任，我地又何必打住呢？

今日，令我十分難忘。我更愛呢份工，因為我知道同事都需要我。而且我更印證左我既觀察力，佢地唔出聲唔代表冇意見，只係代表佢地唔願意甚至唔敢發表。佢地唔發表唔代表冇事發生，唔開心日積月累只會白白令同事離開而不知所以，如果我地要同事真正同心協力，就要令佢地工作得開心。今日好彩有個機遇比我解到佢地既心結，可以鞏固一下尖沙咀岌岌可危既境況。呢招兵行險著都幾牙煙，好彩我真係冇評估錯誤，否則呢件事唔會有個令人感動的結果。

再補充一句，老板娘會後都唔知點解同事會喊，呢單野先至最 kick 手。